ក្រិកបិទធនាគារនិងចាត់វិធានការទប់ស្កាត់លំហូរចេញសាច់ប្រាក់ទៅបរទេស
រដ្ឋាភិបាលក្រិក បានប្រកាសបិទទ្វារទីផ្សារមូលបត្រ និងធនាគារទូទាំងប្រទេសជាបណ្តោះអាសន្ន យ៉ាងហោចណាស់ក៏រហូតដល់ថ្ងៃទី ៦ កក្កដា ព្រមទាំងវិធានការគ្រប់គ្រងមូលធន ពោលគឺទប់ស្កាត់លំហូរចេញសាច់ប្រាក់ទៅបរទេស។ ទីផ្សារមូលបត្រនៅស្ទើរតែគ្រប់កន្លែងទូទាំងពិភពលោកកំពុងតែធ្លាក់ចុះ នៅថ្ងៃចន្ទនេះ ដោយសារតែឥទ្ធិពលនៃវិបត្តិក្រិក។ ចំណែកខាងអឺរ៉ុបវិញ នៅតែបន្តខ្នះខ្នែងស្វែងរកកិច្ចសម្រុះសម្រួលគ្នា ដើម្បីព្យាយាមបញ្ចៀសគ្រោះមហន្តរាយបង្កឡើងដោយវិបត្តិក្រិក។
ចុះផ្សាយនៅថ្ងៃ៖
ស្តាប់ - ០៦:២៩
គិតចាប់ពីឆ្នាំ២០១០មក សាច់លុយប្រមាណ៨០ពាន់លានអឺរ៉ូបានត្រូវដកចេញពីប្រព័ន្ធធនាគារក្រិក។ បន្ទាប់ពីបានឮនាយករដ្ឋមន្ត្រីប្រកាសធ្វើប្រជាមតិ ឱ្យពលរដ្ឋសម្រេចព្រមឬមិនព្រមទទួលលក្ខខណ្ឌអឺរ៉ុបជាថ្នូរនឹងប្រាក់កម្ចីមក ប្រជាជនបានសម្រុកនាំគ្នារត់ទៅដកលុយចេញពីធនាគារ កាន់តែច្រើនឡើងៗបន្ថែមទៀត ទើបរដ្ឋាភិបាលក្រិក គ្មានជម្រើសអ្វីផ្សេងក្រៅអំពីចាត់វិធានការ បិទទ្វារធនាគារទូទាំងប្រទេស ពេញមួយសប្តាហ៍ បិទទីផ្សារភាគហ៊ុន និងដាក់វិធានការគ្រប់គ្រងមូលធន។
ហេតុអ្វីវិធានការគ្រប់គ្រងមូលធន ?
នៅរាល់ពេលមានវិបត្តិហិរញ្ញវត្ថុធ្ងន់ធ្ងរ វិធានការគ្រប់គ្រងមូលធនគឺជាការចាំបាច់។ វិធានការនេះ ធ្វើឡើងក្នុងបំណងការពារធនាគារក្រិកកុំឱ្យក្ស័យធន និងដើម្បីកុំឱ្យពលរដ្ឋស្លន់ស្លោ នាំគ្នាទៅដកលុយអស់ពីធនាគារ។ ហេតុដូច្នេះហើយបានជានាយករដ្ឋមន្ត្រីក្រិកបានអំពាវនាវឱ្យពលរដ្ឋរក្សាភាពស្ងប់ស្ងាត់។ នៅក្នុងក្របខណ្ឌនៃវិធានការគ្រប់គ្រងមូលធននេះ ធនាគារបិទ ការផ្ទេរ-ផ្ញើលុយចេញទៅបរទេស ឬទិញទំនិញនៅបរទេសត្រូវហាមឃាត់មែន ប៉ុន្តែការចាយវាយទិញដូរ តែក្នុងប្រទេសនៅតែប្រព្រឹត្តទៅដោយសេរី ពលរដ្ឋនៅតែអាចទៅដកលុយខ្លួនឯង ពីធនាគារយកមកចាយវាយបាន ក្នុងមួយថ្ងៃ ៦០អឺរ៉ូ យ៉ាងច្រើនបំផុត។
វិធានការបែបនេះធ្លាប់មានឃើញប្រើជាញយដងនៅ ប្រទេសថៃ នៅម៉ាឡេស៊ី កាលពីមានវិបត្តិហិរញ្ញវត្ថុឆ្នាំ១៩៩០ និងនៅអាហ្សង់ទីនកាលពីឆ្នាំ២០០១ ព្រមទាំងនៅអ៊ីស្លង់ នៅស៊ីប កាលពីឆ្នាំ២០១៣។ ទិសដៅនៃវិធានការគ្រប់គ្រងមូលធន គឺដើម្បី ការទប់ស្កាត់លំហូរសាច់ប្រាក់ចេញពីប្រទេស។ បើអស់លុយសេដ្ឋកិច្ចលែងដើរ ប្រទេសលែងមានដំណើរការ ដូច្នេះគេត្រូវបិទព្រំដែនហិរញ្ញវត្ថុ តាមរយៈវិធានការគ្រប់គ្រងមូលធន បិទធនាគារ ដែលពេលខ្លះមានរយៈពេលខ្លី ត្រឹមពីរបីថ្ងៃ មួយអាទិត្យ ឬយូរខ្លាំងជាងគេដូចនៅស៊ីប ១២ថ្ងៃ។ ប៉ុន្តែនៅពេលបើកធនាគារវិញ ការដកលុយសុទ្ធចេញពីធនាគារ ឬផ្ទេរ ផ្ញើចេញទៅបរទេស ត្រូវមានកំរិតកំណត់ មិនថាសម្រាប់ជាលក្ខណៈបុគ្គល ឬក្រុមហ៊ុនរកស៊ីទេ។
វិធានការទប់ស្កាត់លំហូរចេញសាច់ប្រាក់នេះ អាចជះផលវិបាកយ៉ាងណា ចំពោះក្រិក ?
ដោយហេតុថាក្រិកមានលុយមកពីក្រៅ ក្នុងធនាគារក្រិក តែប្រមាណ១៥% រដ្ឋាភិបាលត្រូវផ្តោតការគ្រប់គ្រងមូលធន ទៅលើសកម្មភាពផ្ទេរប្រាក់ចេញចូលតូចតាច និងការដកលុយយកចាយវាយធម្មតា។ ដូច្នេះ ទើបមានការប៉ះពាល់យ៉ាងខ្លាំងដល់ជីវភាពរស់នៅប្រចាំថ្ងៃរបស់ពលរដ្ឋ។ ក្រុមហ៊ុន អ្នករកស៊ី តូចតាច អាចនឹងត្រូវរងគ្រោះខ្លាំង ព្រោះមិនអាចទិញដូរទំនិញបាន ប្រសិនបើត្រូវប្រើលុយសុទ្ធ។ នៅពេលធ្វើដំណើរចេញក្រៅប្រទេស ពលរដ្ឋម្នាក់ៗ គ្មានសិទ្ធិយកលុយតាមខ្លួនច្រើនចេញទៅជាមួយឡើយ។ សេដ្ឋកិច្ចជាតិត្រូវរងផលវិបាកខ្លាំង ពិបាកនឹងរកឃើញកំណើនសេដ្ឋកិច្ចឡើងវិញណាស់ ព្រោះអ្នករកស៊ីមិនហ៊ានចូលធ្វើវិនិយោគឡើយ ដោយខា្លចកប់លុយនៅក្នុងនៅទីនោះ។
វិធានការគ្រប់គ្រងមូលធន បើបានដាក់ប្រើហើយ មិនអាចលើកចេញវិញ ភ្លាមទាំងស្រុងបានឡើយ ជាឧទាហរណ៍ ប្រទេសស៊ីប ដល់ទៅពីរឆ្នាំ អ៊ីស្លង់ទើបលុបចោល បន្ទាប់ពីប្រើវិធានការនេះអស់៧ឆ្នាំ។ អ្នកដែលរងគ្រោះខ្លាំងជាងគេ គឺសុទ្ធសឹងជាពលរដ្ឋសាមញ្ញថ្នាក់កណ្តាល និងក្រីក្រ ហេតុដូច្នេះហើយបាន រដ្ឋាភិបាលនីមួយៗ មិនងាយសម្រេចដាក់វិធានការនេះឡើយ។ អ្វីដែលសំខាន់នៅពេលនេះ គឺគេមិនដឹងថាតើវិធានការនេះនឹងរឹតតែជំរុញឱ្យក្រិកកាន់តែងាយដើរចេញពីតំបន់ចាយប្រាក់អឺរ៉ូយ៉ាងណាទេ។
សុទិដ្ឋនិយមការចរចាក្រៅឆាកនៅតែបន្ត
នៅថ្ងៃស្អែក ទី ៣០ មិថុនា ជាថ្ងៃចុងក្រោយដែលក្រិកត្រូវក្ស័យធនហើយ បើរកខ្ចីលុយអឺរ៉ុបមិនបាន ទៅសងមូលនិធិរូបិយវត្ថុ។ ប្រកាសបិទធនាគារ ចាត់វិធានការគ្រប់គ្រងមូលធន បិទទីផ្សារភាគហ៊ុន ... បានធ្វើប្រាក់អឺរ៉ូធ្លាក់ថ្លៃ ទីផ្សារភាគហ៊ុនអឺរ៉ុប បានដាំក្បាលចុះស្ទើរគ្រប់ប្រទេស សូម្បីតែទីផ្សារហិរញ្ញវត្ថុអាស៊ី ក៏ត្រូវទាញទម្លាក់ដោយវិបត្តិក្រិក ដោយភាពមិនប្រាកដប្រជានៃប្រាក់អឺរ៉ូនេះដែរ។
ប្រឈមមុខនឹងស្ថានភាពបែបនេះ ថ្វីបើជាផ្លូវការក្រិកនិងសហភាពអឺរ៉ុប និយាយគ្នាលែងត្រូវ អឺរ៉ុប សម្រេចទុកឱ្យក្រិកក្ស័យធន ប៉ុន្តែការចរចាក្រោយឆាកនៅតែបន្តមាន មិនមែនបិទខ្ទប់ទាំងស្រុង លែងធ្វើដឹងឮអ្វីទេ។ គ្រប់គ្នានៅតែជឿជាក់ថា នឹងមានកិច្ចព្រមព្រៀងជាមួយក្រិក គេអាចនៅមានពេលអ៊ុតរហូតដល់អាធ្រាត្រថ្ងៃអង្គារស្អែក។
ប្រទេសធំៗរបស់អឺរ៉ុប ដូចជាបារាំង និងអាល្លឺម៉ង់ ទោះបីជាដាច់ខាតជាមួយក្រិកយ៉ាងណា ក៏មិនស្ងៀមដែរ។ នៅថ្ងៃនេះ ប្រធានាធិបតីបារាំង ដែលសោកស្តាយចំពោះគំនិតធ្វើប្រជាមតិរបស់ក្រិកខណៈដែលការចរចាជិតបានលទ្ធផលទៅហើយ បានកោះហៅគណៈកម្មការកំពូលៗមកប្រជុំបន្ទាន់ពិសេស ឧទ្ទិសទាំងស្រុងដល់វិបត្តិក្រិក។ ឯលោកស្រីប្រមុខរដ្ឋាភិបាលអាល្លឺម៉ង់ ដែលបានទទួលជួបនៅថ្ងៃនេះ ប្រធានសភា និងប្រធានគណបក្សនយោបាយអាល្លឺម៉ង់ផ្សេងៗដើម្បីពិភាក្សានិងផ្តល់ព័ត៌មានស្តីអំពីស្ថានភាពប្រទេសក្រិក និងផលវិបាកនៃការដើរចេញរបស់ក្រិកពីតំបន់អឺរ៉ូ បានបង្ហើបលទ្ធភាពព្រមត្រលប់ទៅចរចាជាមួយក្រិកទៀត ប្រសិនបើនាយករដ្ឋមន្ត្រីក្រិកប្តូរគំនិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ