តុលាការព្រហ្មទណ្ឌអន្តរជាតិធ្វើការជំនុំជំរះមេដឹកនាំស៊ែប២នាក់ ពីបទប្រល័យពូជសាសន៍
ជនឈ្មោះ រ៉ាដូវ៉ាន់ ការ៉ាដហ្ស៊ីឆ និង ឈ្មោះ រ៉ាត់កូ មឡាល់ឌីឆ ត្រូវបានតុលាការព្រហ្មទណ្ឌអន្តរជាតិ លើសំណុំរឿងអតីតយូហ្គោស្លាវី ធ្វើការជំនុំជំរះក្តី នៅក្រុងឡាអេ ដោយចោទពីបទប្រល័យពូជសាសន៍ ដែលជនទាំងពីរ បានធ្វើទៅលើ សហគមន៍ជនជាតិបូសនី កាន់សាសនាអ៊ីស្លាម កាលពីក្នុងអំឡុងសង្រ្គាម នៅអតីតយូហ្គោស្លាវី នាឆ្នាំ១៩៩៥។ ការសម្លាប់រង្គាលនៅក្រុង ស្រេប្រេនីកា ដែលមានមនុស្ស ស្លាប់ចំនួន ៨ពាន់នាក់ ត្រូវបានតុលាការអន្តរជាតិទទួលស្គាល់ ថាជាអំពើប្រល័យពូជសាសន៍ ក៏ប៉ុន្តែអង្គការសហប្រជាជាតិ នៅមិនទាន់សម្រេចទទួលស្គាល់នៅឡើយទេ ដោយសាររុស្ស៊ី បានបោះឆ្នោតបដិសេធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ខែកក្កដា ឆ្នាំ១៩៩៥ នៅពេលដែលសង្រ្គាមនៅអតីតយូហ្គោស្លាវី ហៀបនឹងបញ្ចប់ទៅ ដោយមានអន្តរាគមន៍ ពីអង្គការសហប្រជាជាតិទៅហើយ ប៉ុន្តែក្រុមទាហានស៊ែប បានឆ្លៀតឱកាសសម្លាប់មនុស្សបាន៨ពាន់នាក់ នៅក្រុង ស្រេប្រេនីកា មានទាំងកុមារ និងមនុស្សចាស់ ដែលសុទ្ធសឹងជាជនជាតិបូសនីដែលកាន់សាសនាអ៊ីស្លាម។ មេដឹកនាំទាំងពីរ ដែលនៅពីក្រោយ អំពើព្រៃផ្សៃនេះ គឺកំពុងស្ថិតក្នុងការជំនុំជំរះ របស់តុលាការព្រហ្មទណ្ឌអន្តរជាតិ ក្រុងឡាអេ។
ជនទីមួយឈ្មោះ រ៉ាដូវ៉ាន់ ការ៉ាដហ្ស៊ីឆ ជា អតីតមេបញ្ជាការយោធា ស៊ែប ដែលត្រូវបានគេស្គាល់ថា ជាអ្នកដឹកនាំកម្លាំងដោយផ្ទាល់ ក្នុងការកាប់សម្លាប់រង្គាល លើជនជាតិអ៊ីស្លាមបូសនី។ ជននេះបានអះអាងទាំងងងើលថា អ្វីដែលគេធ្វើ គឺដើម្បីការពារប្រជាជាតិស៊ែប។ ចំណែកជនទីពីរឈ្មោះ រ៉ាត់កូ មឡាល់ឌីឆ គឺជាជំនិត របស់មេដឹកនាំស៊ែប ស្លូបូដាន់ មីឡូសេវិឆ ដែលមនុស្សទាំងពីរនាក់នេះហើយ ជាមេបណ្តុះគំនិតជ្រុលនិយម បង្កអំពើប្រល័យពូជសាសន៍លើប្រជាជនបូសនី និងក្រូអាត ដែលកាន់សាសនាអ៊ីស្លាម។ ជនជាប់ចោទទាំងពីរនាក់នេះ ត្រូវបានចាប់ខ្លួនកាលពីឆ្នាំ ២០០៨ និង ២០១១។ តុលាការព្រហ្មទណ្ឌអន្តរជាតិ ស្តីពីអតីតយូហ្គោស្លាវី នឹងត្រូវចេញសាលក្រម កាត់ទោសជនទាំងពីរនាក់នេះ នៅមុនដំណាច់ឆ្នាំ២០១៥។
រុស្ស៊ីបដិសេធមិនទទួលស្គាល់ថា ជាអំពើប្រល័យពូជសាសន៍៖
ទោះបីជាតុលាការព្រហ្មទណ្ឌអន្តរជាតិ បានចាត់ទុក ការសម្លាប់រង្គាលនៅ ក្រុងស្រេប្រេនីកា ជាអំពើប្រល័យពូជសាសន៍ក៏ដោយ ក៏ប៉ុន្តែក្រុមប្រឹក្សាសន្តិសុខអង្គការសហប្រជាជាតិ នៅមិនទាន់ទទួលស្គាល់ជាផ្លូវការនៅឡើយទេ។ ការប្រជុំបោះឆ្នោត កាលពីថ្ងៃពុធទី ៨ កក្កដា បានក្លាយជាបរាជ័យ ដោយសាររុស្ស៊ីបានបោះឆ្នោតបដិសេធ។ អគ្គរដ្ឋទូតរុស្ស៊ីប្រចាំអង្គការសហប្រជាជាតិ បានពន្យល់ថា រុស្ស៊ីបដិសេធ ព្រោះអត្ថបទ ដែលចាត់ទុកការសម្លាប់រង្គាលនៅសេប្រេនីកា ថាជាអំពើប្រល័យពូជសាសន៍ មានលក្ខណៈហឹង្សា ហើយលំអៀង ដែលវាអយុត្តិធម៌ សម្រាប់ជនជាតិស៊ែប ដែលក៏ជាជនរងគ្រោះ ដូចអ្នកដ៏ទៃដែរ។ មួយវិញទៀតរុស្ស៊ីយល់ថា ការថ្កោលទោសប្រល័យពូជសាសន៍បែបនេះ វានឹងមិនជួយអ្វី ដល់ការសម្រុះសម្រួលគ្នា កសាងសន្តិភាពក្នុងតំបន់នោះទេ គឺវារឹតតែធ្វើឲ្យមនុស្សស្អប់ គុំគួនគ្នា។
ការពិតនៅតែជាការពិត៖
សូមបញ្ជាក់ថាក្រៅពីរុស្ស៊ី ដែលបោះឆ្នោតវេតូ មានចិន អង់ហ្គោឡា នីហ្សេរីយ៉ា និងវ៉េណេហ្ស៊ុយអេឡា បានប្រកែកមិនបោះឆ្នោត។ តំណាងអគ្គរដ្ឋទូតអាមេរិក និងអង់គ្លេស ប្រចាំអង្គការសហប្រជាជាតិ បានធ្វើការរិះគន់ដោយចំហរទៅលើរុស្ស៊ី និងប្រទេសបួនខាងលើ ដែលប្រកែកមិនព្រមទទួលស្គាល់ការពិត។ ទោះបីគេសម្រេចទទួលស្គាល់ រឺមិនទទួលស្គាល់ថាវាជាអំពើប្រល័យពូជសាសន៍ក៏ដោយ ក៏ការពិត នៅតែជាការពិត ទាហានស៊ែប ពិតជាបានសម្លាប់រង្គាល ប្រជាជនបូសនីអ៊ីស្លាម ៨ពាន់នាក់ នៅខែកក្កដា ឆ្នាំ១៩៩៥។ នេះគឺជាការពិត ដោយឥតប្រកែកបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ