សមាជិកសភាបារាំងទៅគ្រីមេ ក្រោមព្យុះនៃការរិះគន់
សមាជិកសភាបារាំង១០នាក់ ភាគច្រើនជាអ្នកស្តាំនិយម ដែលសុទ្ធសឹងជាអ្នកមានជំហរគាំទ្ររុស្ស៊ី បានចេញដំណើរ នៅថ្ងៃព្រហស្បតិ៍នេះ ទៅបំពេញទស្សនកិច្ចនៅតំបន់គ្រីមេ ដែលរុស្ស៊ីបានចាប់មកធ្វើជារណបកាលពីពីរឆ្នាំមុន។ សមាជិកសភាទាំងនោះបានអះអាង ចង់ទៅមើលឱ្យឃើញច្បាស់ដោយផ្ទាល់ភ្នែកអំពីស្ថានការណ៍នៅគ្រីមេ ប៉ុន្តែដំណើរទស្សនកិច្ច ដែលឧបត្ថមដោយមូលនិធិរុស្ស៊ីនេះ បានរងការរិះគន់យ៉ាងខ្លាំងពីសំណាក់ក្រសួងការបរទេសបារាំង។
ចុះផ្សាយនៅថ្ងៃ៖
ស្តាប់ - ០១:៤៦
សមាជិកសភាទាំង១០នាក់ ដែលភាគច្រើនជាអ្នកស្តាំនិយម បាននាំគ្នាធ្វើដំណើរជាបន្តបន្ទាប់ ទៅកាន់ក្រុងកំពង់ផែ ស៊ីមហ្វេរ៉ូប៉ូល យ៉ាល់តា និងសេប៉ាស្ត្រូលប៉ូល និងជួបសន្ទនាជាមួយអ្នកទទួលខុសត្រូវតំបន់នោះ។ ជាផ្លូវការ កម្មវត្ថុនៃដំណើរទស្សនកិច្ចគឺ ដើម្បីចុះទៅពិនិត្យមើលដោយផ្ទាល់អំពីស្ថានភាពនៅទីនោះ និងរក្សាកិច្ចចរចាជាមួយរុស្ស៊ី។
តើសមាជិកសភាទាំងនេះ ទទួលស្គាល់គ្រីមេជារបស់រុស្ស៊ីឬយ៉ាងណា បានជាធ្វើដំណើរទៅតំបន់នេះ ? ប៉ុន្តែតំណាងសភាបក្សសាធារណរដ្ឋ Jacques Myard បានឆ្លើយតបថា ៖ “ទៅគ្រីមេ គឺដើម្បីមើលឱ្យឃើញការពិត ! ការពិតដែលថានៅទីនោះពលរដ្ឋភាគជាច្រើនជារុស្ស៊ី ជារុស្ស៊ី មិនមែនជាជនជាតិអ៊ុយក្រែន ដូចដែលអ៊ុយក្រែននិយាយនោះទេ។”
ប៉ុន្តែការច្បាមយកតំបន់គ្រីមេរបស់រុស្ស៊ី កាលពីឆ្នាំទៅ ត្រូវបានសហគមន៍អន្តរជាតិទាំងមូលថ្កោលទោស ហេតុដូច្នេះហើយបានជាក្រសួងការបរទេសបារាំងមិនពេញចិត្តនឹងដំណើរទស្សនកិច្ចរបស់សមាជិកសភាបារាំងនាពេលនេះនិងយល់ថាជាសកម្មភាពដែលរំលោភច្បាប់អន្តរជាតិ។ នេះជាប្រតិកម្មរបស់លោករដ្ឋមន្ត្រីការបរទេសបារាំង ឡូរ៉ង់ ហ្វាប្យ៊ូស។ ចំណែកលោកស្រីប្រធានគណៈកម្មការការបរទេសសភា អេលីហ្សាបែត ហ្គីហ្គូ ចាត់ទុកទង្វើរបស់សមាជិកសភាទាំងនេះថាធ្វើឱ្យខូចប្រយោជន៍ “ ដោយហេតុតែមានឈ្មោះជាសមាជិកសភា ដំណើរនេះគឺដូចជាទៅទទួលស្គាល់សកម្មភាពឈ្លានពាន ឬ ទទួលស្គាល់គ្រីមេជារបស់រុស្ស៊ី ដែលផ្ទុយស្រលះពីសេចក្តីសម្រេចចិត្តរបស់អង្គការសហប្រជាជាតិបានសម្រេច មិនមែនត្រឹមតែផ្ទុយប្រទេសបារាំងទេ។
ឯកអគ្គរដ្ឋទូតអ៊ុយក្រែនប្រចាំក្រុងប៉ារីស បានសម្តែងការរិះគន់យ៉ាងខ្លាំង ដោយមិននឹកស្មានថាតំណាងរាស្ត្របារាំងអាចធ្វើដល់ថ្នាក់នេះ រំលោភទាំងច្បាប់អន្តរជាតិ បញ្ចេញកាយវិការអមិត្ត និងដោយចេតនាដូច្នេះសោះ។ ប៉ុន្តែនេះមិនមែនជាលើកទីមួយទេ ! កាលពីខែកញ្ញាឆ្នាំទៅ តំណាងសភាមួយក្រុមក៏បានធ្វើដំណើរទៅម៉ូស្គូ ពេលកំពុងមានវិបត្តិអ៊ុយក្រែនយ៉ាងតានតឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ