អេហ្ស៊ីបសម្ពោធព្រែកជីកស៊ុយអេទីពីរ បារាំងជាភ្ញៀវកិត្តិយស
នៅថ្ងៃព្រហស្បតិ៍ទី ៦ សីហា ២០១៥នេះ អេហ្ស៊ីបបានបើកសម្ពោធព្រែកជីកស៊ុយអេ ទីពីរ តភ្ជាប់សមុទ្ទមេឌីទែរ៉ាណេ ទៅសមុទ្ទក្រហម ដោយមិនចាំបាច់ព័ទ្ធវាងមួយជុំទ្វីបអាហ្វ្រិក។ ព្រែកជីកដែលជាគំនិតផ្តួចផ្តើមរបស់ប្រធានាធិបតីអេហ្ស៊ីប Abdel Fattah al-Sissi ជានិម្មិត្តរូបនៃដង្ហើមថ្មីនៃសេដ្ឋកិច្ចអេហ្ស៊ីបផងនិងការទូតផង ជាពិសេសជាមួយបារាំង។ ប្រធានាធិបតីបារាំង លោក ហ្វ្រង់ស័រ ហូឡង់ គឺជាភ្ញៀវកិត្តិយសនាឱកាសនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ព្រែកជីកស៊ុយអេ ជាព្រែកជីកដ៏ល្បីល្បាញនៅលើពិភពលោក និងប្រកបដោយនិម្មិត្តរូបបំផុតសម្រាប់មតិសាធារណៈអេហ្ស៊ីប។ នៅឆ្នាំ១៨៦៩ អេហ្ស៊ីបបានបើកសម្ពោធព្រែកជីកភ្ជាប់ពីសមុទ្ទក្រហមទៅសមុទ្ទមេឌីទែរ៉ាណេ បន្ទាប់ពីចំណាយពេលអស់១០ឆ្នាំ។ ព្រែកជីកស៊ុយអេ បានក្លាយជាច្រកផ្លូវទឹកប្រកបដោយយុទ្ធសាស្ត្រសេដ្ឋកិច្ចនិងយោធា។ នៅថ្ងៃនេះ ប្រធានាធិបតីអេហ្ស៊ីប ចង់ចារបន្ថែមក្នុងទំព័រប្រវត្តិសាស្ត្រ ដោយបើកសម្ពោធគម្រោងការដ្ឋានព្រែកជីកទីពីរ សម្រាប់ឆ្នាំ២០២៣ ដោយមានប្រធានាធិបតី លោក ហ្វ្រង់ស័រ ហូឡង់ ជាភ្ញៀវកិត្តិយស។
ព្រែកជីកស៊ុយអេទី១ បានសាងសង់ឡើងដោយវិស្វករបារាំង និងបើកសម្ពោធដោយអធិរាជនី Eugénie មហេសីរបស់អធិរាជ្យបារាំងណាំប៉ូឡេអ៊ុង។ វត្តមានរបស់លោកហូឡង់ថ្ងៃនេះ មិនមែនត្រឹមរំលឹកប្រវត្តិសាស្ត្រនេះទេ តែមកពីឥរិយាបថផ្សះផ្សារបស់អាជ្ញាធរបារាំងចំពោះមេដឹកនាំអេហ្ស៊ីប។ ខុសពីបណ្តាប្រទេសបស្ចឹមលោកផ្សេងទៀត ដូចយ៉ាងអាល្លឺម៉ង់ និងអាមេរិកជាដើម បារាំងមិនដែលវាយប្រហារឬរិះគន់ចំៗជាសាធារណៈរដ្ឋាភិបាលអេហ្ស៊ីបរបស់លោក អាល់ស៊ីស៊ី ដែលធ្លាប់ទម្លាក់ប្រធានាធិបតីប្រសូតចេញពីការបោះឆ្នោតម័រស៊ី និងប្រើអំណាចផ្តាច់ការ ប្រហារជីវិតអ្នកទោសទាំងហ្វូងៗឡើយ។ បារាំងប្រកាន់ជានិច្ចជំហរនិយាយគ្នាជាលក្ខណៈឯកជនលើគ្រប់វិស័យ មិនមែនតែលើផ្នែកសេដ្ឋកិច្ចឡើយ។ យុទ្ធសាស្ត្រនេះ បាននាំដល់ការលក់យន្តហោះចម្បាំងRafale២៤គ្រឿង ទៅឱ្យអេហ្ស៊ីប និងបានផ្តល់ដង្ហើមឧស្សាហកម្មបារាំងទៀត។ នាវាចម្បាំង និងRafale បីគ្រឿងរបស់បារាំង បានសម្ញែងខ្លួនក្នុងក្បួនព្យុះហយាត្រាបើកសម្ពោធការដ្ឋានពែ្រកជីកទីពីរនេះ។
ចំណែកខាងប្រធានាធិបតីអេហ្ស៊ីបវិញ ឥរិយាបថរបស់ប៉ារីសនេះជាឱសថដ៏ថ្លៃថ្លាសម្រាប់ផ្តល់ភាពស្របច្បាប់ដល់អេហ្ស៊ីបលើឆាកអន្តរជាតិ។ លទ្ធផលបានឃើញផ្ទាល់ភ្នែក អេហ្ស៊ីបបានក្លាយជាប្រទេសដែលមិនអាចខ្វះបានសម្រាប់តំបន់មិនថាលើផ្នែកសេដ្ឋកិច្ច ឬសន្តិសុខ ប្រយុទ្ធប្រឆាំងនឹងពួកភេរវនិយមឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ