ភេរវកម្មបាញ់រះក្នុងរថភ្លើង ត្រូវបានបញ្ជៀស នៅប្រទេសបារាំង
ហេតុការណ៍ភេរវកម្មដ៏កម្រមួយ ហៀបនឹងកើតឡើង នៅក្នុងរថភ្លើងល្បឿនលឿន ដែលចេញដំណើរពីទីក្រុង អាំស្ទែដាំ ប្រទេសហូឡង់ ឆ្ពោះទៅកាន់ទីក្រុងប៉ារីសប្រទេសបារាំង ដោយបុរសម្នាក់ បំពាក់ដោយកាំភ្លើង AK និងគ្រាប់ជាច្រើនបង់ដ៍ ប្រុងនឹងធ្វើការបាញ់រះ ទៅលើអ្នកដំណើរ ក្នុងទូរថភ្លើង។ ជាសំណាងល្អ មានយុរវជនជនជាតិអាមេរិក៣នាក់ បានស្ទុះទៅវាយសង្រ្គុបលើភេរវករ ដណ្តើមកាំភ្លើង ពីជននោះ ដើម្បីបញ្ជៀសកុំឲ្យមានការបាញ់សម្លាប់រង្គាល។ ជនដៃដល់ត្រូវបានឃាត់ខ្លួន ដោយនគរបាលបារាំង ហើយសេចក្តីក្លាហានរបស់យុវជនអាមេរិកទាំងបីនាក់ ត្រូវបានសារព័ត៌មាននានា អបអរ និងកោតសរសើរយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៣២
អ្នកដំណើរក្នុងរថភ្លើង ដែលចេញដំណើរ ពីទីក្រុង អាំស្ទែដាំ ឆ្ពោះមកទីក្រុងប៉ារីស នៅមិនទាន់បាត់តក់ស្លុតនៅឡើយទេ បន្ទាប់ពីបានជួបហេតុការណ៍ដ៏រន្ធត់ ដែលជនមិនស្គាល់មុខម្នាក់ បានទាញកាំភ្លើង ប្រភេទ AK42 បំរុងនឹងបាញ់រះ ទៅលើអ្នកដំណើរ។ ប៉ុន្តែជាសំណាងល្អ មានយុវជនអាមេរិក៣នាក់ ជាអ្នកដំណើរ ដែលមានសេចក្តីក្លាហាន បានវាយបង្រ្កាប ជននោះទាន់ពេលវេលា ហើយបានបញ្ជៀសការបាញ់រះ សម្លាប់អ្នកដំណើរ។ បើយើងស្រម័យទៅ ថាតើវាអាចក្លាយជាសោកដនាតកម្ម រន្ធត់កម្រឹតណា បើសិនជាគ្មានការអន្តរាគមន៍ ពីយុវជនអាមេរិក ទាំងបីនាក់នេះទេ។
យុវជនអាមេរិក៣នាក់ ជាវិរៈបុរសជួយជីវិតអ្នកដំណើរ៖
ហេតុការណ៍ បានកើតឡើង នៅវេលាម៉ោងប្រហែលជា ៥និង៥០នាទីល្ងាច ក្នុងពេលដែលរថភ្លើង Thalys កំពុងធ្វើ ដំណើរ ឆ្លងពីប្រទេសប៊ែលហ្សិក ចូលមកក្នុងទឹកដីបារាំង ដោយបានឆ្លងកាត់តាមទីក្រុងលីល ដែលជាក្រុងភាគខាងជើងរបស់បារាំង។ ទូររថភ្លើងដែលជាកន្លែងកើតហេតុ គឺជាទូររថភ្លើងនៅខាងចុងគេ។ យោងតាមសាក្សីជាច្រើនអ្នក បានបញ្ជាក់ថាហេតុការណ៍នេះ បានកើតឡើងភ្លាមយ៉ាងឆាប់រហ័ស នៅពេលដែលមានបុរសម្នាក់ ចេញពីបន្ទប់ទឹក ស្លៀកខោព័ណស លែងខ្លួនទទេ ហើយលើកកាំភ្លើង AK42 បំរុងនឹងបាញ់រះទៅលើអ្នកដំណើរ។ រំពេចនោះ អ្នកដំណើរ៣នាក់ បានលោតទៅសង្រ្គុបពីលើ ដើម្បីដណ្តើមកាំភ្លើង ហើយនាំគ្នាព្រួតវាយ ជនដៃដល់ត្រង់ចំនុចក្បាល ទាល់តែជនដៃដល់ស្រងល់ ដួលលែងដឹងខ្លួន តែម្តង។
តាមប្រភពពីប៉ូលីសបារាំង បានឲ្យដឹងថា យុវជនអាមេរិកទាំងបីនាក់ ជាមិត្តភក្តិនឹងគ្នា នាំគ្នាមកធ្វើដំណើរកម្សាន្តនៅអឺរ៉ុប។ ម្នាក់ជានិស្សិត ពីរនាក់ទៀត ជាទាហាន អាយុ២២ឆ្នាំ ដែលធ្លាប់បានទៅបំពេញបេសកកម្មនៅអាហ្វហ្កានីស្ថានផងដែរ។ យុវជនពីរនាក់ដែលជាទាហាន ធ្លាប់មានបទពិសោធន៍ និងការហ្វឹកហាត់ មានការសង្ស័យ មិនទុកចិត្តអ្នកដំណើរម្នាក់ ដែលចេះតែដើរចុះដើរឡើង ចេញចូលបន្ទប់ទឹកញឹកញាប់។ បន្ទាប់មក ពូកគេបានឮសំឡេង ចេញពីបន្ទប់ទឹក ដែលពូកគេស្គាល់ថា ជាសម្លេងបញ្ជូលគ្រាប់ ក្នុងកាំភ្លើងAK។ គ្រាន់តែជនដៃដល់ ចេញពីបន្ទប់ទឹក រៀបនឹងលើកកាំភ្លើងបាញ់ ពួកគេបានលោត ទៅសង្រ្គុបពីលើ និងវាយជននោះ ទាល់តែដួល។
យុវជនអាមេរិក២នាក់ ដែលរងរបួស ក្នុងពេលប្រវាយប្រតប់គ្នា មួយត្រូវគ្រាប់កាំភ្លើង ដែលជនដៃដល់បាញ់ ត្រង់ចំណុចឆ្អឹងជំនីខាងមុខ ហើយម្នាក់ទៀត មុតនឹងកាំបិតត្រង់មេដៃ ស្ទើរតែដាច់។ ឥឡូវពួកគេកំពុងទទួលការព្យាបាលនៅមន្ទីរពេទ្យ។ ភ្លាមៗក្រោយអន្តរាគមន៍នេះ រថភ្លើងបានទាញសញ្ញាអាសន្ននឹងបានឈប់ជាបន្ទាប់នៅស្ថានីយ៍ក្រុងអារ៉ាស ហើយអ្នកដំណើរទាំង ៥៤៤នាក់ ត្រូវបានជម្លៀសចេញ ពីរថភ្លើងផងដែរ។ ចំណែកជនដៃដល់ត្រូវបានប៉ូលីសបារាំងឃាត់ខ្លួន និងកំពុងសួរចម្លើយ។ សេចក្តីក្លាហានរបស់យុវជនអាមេរិកទាំងបីរូប ត្រូវបានគេកោតសរសើរស្ញប់ស្ញែង មានទាំងលោកប្រធានាធិបតីអូបាម៉ា លោកនាយករដ្ឋមន្ត្រីប៊ែលហ្សិក និងលោករដ្ឋមន្ត្រីក្រសួងមហាផ្ទៃបារាំង បារាំង។ យុវជនក្លាហានទាំងបី ត្រូវបានលោកចៅហ្វាយក្រុង អារ៉ាស ប្រគល់មេដាយនិម្មិតរូបដើម្បីថ្លែងអំណរគុណ ផងដែរ។
ជនដៃដល់ ជាក្រុមអ៊ីស្លាមជ្រុលនិយម ធ្លាប់ទៅស៊ីរី៖
តាមប្រភពពីនគរបាលបារាំង ជនដៃដល់មានអាយុប្រហែលជា២៦ឆ្នាំ ជាជនជាតិ ម៉ារុក រឺក៏មានដើមកំណើតពីប្រទេសម៉ារ៉ុក។ នៅជាប់ខ្លួនជននេះ ប៉ូលីសបានរកឃើញអាវុធ AK42 មួយដើម កាំភ្លើងខ្លីអូតូម៉ាទិក មួយដើម និងគ្រាប់សរុបទាំងអស់៩បង់ដ៍ ហើយនិងមានកូនកាំបិតមួយផងដែរ។ បុរសនេះ ធ្វើសកម្មភាពតែម្នាក់ឯងទេ ដោយបានឡើងជិះរថភ្លើងនៅស្ថានីយ៍ ទីក្រុងប្រ៊ុយសែល ប្រទេសហ៊ែលហ្សិក។ តុលាការប៊ែលហ្សិក ក៏ទើបបើកការស៊ើបអង្កេតផងដែរ ក្រែងជននេះ មានការពាក់ព័ន្ធ ជាមួយនឹងបណ្តាញភេរវកម្មនៅប៊ែលហ្សិក។
សារព័ត៌មាន អេស្ប៉ាញ El Pais ដោយយោងតាមប្រភព ពីការិយាល័នគរបាលប្រឆាំង អំពើភេរវកម្មអេស្ប៉ាញ បានចុះផ្សាយថា ជនដៃដល់ ធ្លាប់រស់នៅ ក្នុងប្រទេសអេស្ប៉ាញ អស់រយៈពេល ១ឆ្នាំ រវាងឆ្នាំ២០១៤។ នគរបាលសំងាត់អេស្ប៉ាញ ធ្លាប់បានកំណត់មុខសញ្ញាជននេះ ថាបានចូលសេពគប់ ជាមួយក្រុមអ៊ីស្លាមជ្រុលនិយម។ យោងតាមប្រភពដដែល បានឲ្យដឹងទៀតថា ជននេះបានផ្លាស់ប្តូទីលំនៅ មកនៅប្រទេសបារាំង ហើយធ្លាប់បានធ្វើដំណើរ ទៅប្រទេសស៊ីរីផងដែរ មុននឹងត្រឡប់មកបារាំងវិញ។
អាជ្ញាធរបារាំង កំពុងធ្វើការស៊ើបអង្កេត ដោយមិនទាន់បានកំណត់មុខសញ្ញាថា នេះជាគម្រោងធ្វើភេរវកម្មឲ្យជាក់លាក់នោះទេ។ នៅព្រឹកថ្ងៃសៅរ៍នេះ ជនដៃដល់ ត្រូវបានគេបញ្ជូនខ្លួន មកដល់ការិយាល័យសួរចម្លើយរបស់ ក្រុមនគរបាលប្រឆាំងអំពើភេរវកម្មបារាំង នៅក្បែរក្រុងប៉ារីស។ បើតាម ព័ត៌មានចុងក្រោយ ជននេះនៅតែប្រកែក ថាគេមិនមែនជាភេរវករអ៊ីស្លាមទេ។
ប៉ុន្តែបើយោងតាមព័ត៌មានទាំងប៉ុន្មាន ដែលយើងបានដឹងមកនេះ គឺវាប្រាកដណាស់ ដែលថាជននេះ មានបំណងធ្វើភេរវកម្ម ដោយបាញ់រះទៅលើអ្នកដំណើរក្នុងរថភ្លើង។ លោក នាយករដ្ឋមន្ត្រីប៊ែលហ្សិក បានប្រកាសភ្លាមៗតែម្តងថា នេះគឺជាករណីភេរវកម្ម ហើយអាជ្ញាធរប៊ែលហ្សិក ត្រៀមខ្លួនសហការ ជាមួយអាជ្ញាធរបារំាង ដើម្បីវែកមុខបណ្តាញ របស់ជនដៃដល់។
វាយប្រហារតាមរថភ្លើង គឺជាការងាយស្រួល៖
ការជ្រើសរើសយកខ្សែរថភ្លើង Thalys មកធ្វើជាទីតាំងវាយប្រហារ មិនមែនជាការចៃដន្យទេ ព្រោះនេះជាខ្សែរថភ្លើង ឆ្លងកាត់ប្រទេសដល់ទៅបី គឺហូឡង់ ប៊ែលហ្សិក និងបារាំង។ ដូច្នេះ អ្នកដំណើរដែលជិះរថភ្លើងនេះ គឺមានចម្រុះជាតិសាសន៍ទាំងអស់ ហើយភាគច្រើន ក៏ជាអ្នកទេសចរណ៍បរទេសផងដែរ ដែលធ្វើដំណើរកម្សាន្តរវាង ទីក្រុងអាំស្ទែដាំ និងទីក្រុងប៉ារីស ដែលសុទ្ធសឹងជាទីក្រុងទេសចរណ៍ ដ៏ល្បីនៅអឺរ៉ុប។ គោលបំណង របស់ក្រុមភេរវកម្ម គឺធ្វើយ៉ាងណា ឲ្យមានអ្នកស្លាប់ច្រើន ហើយជាជនបរទេស មកពីប្រទេសច្រើនផ្សេងគ្នា។
មួយវិញទៀត បើនិយាយពីភាពងាយស្រួល គឺថាការវាយប្រហារ តាមរថភ្លើង គឺងាយណាស់ ព្រោះអ្នកដំណើរតាមរថភ្លើង មិនត្រូវបានត្រួវពិនិត្យតឹងរឹង ដូចតាមយន្តហោះទេ។ អ្នកដំណើរ អូសវ៉ាលី ឡើងរថភ្លើងតែម្តង ដូច្នេះ ចង់យកអាវុធ យកគ្រាប់បែកដាក់តាមខ្លួន ក៏គ្មាននរណាដឹងដែរ។ កន្លងមក មានទាហាន នគរបាល ដើរយាមតាមស្ថាននីយ៍រថភ្លើងដែរ ប៉ុន្តែវិធានការនេះ គឺវាមិនគ្រប់គ្រាន់ទេ។ ឆ្លងកាត់បទពិសោធន៍ ដែលបានកើតឡើង កាលពីម្សិលមិញនេះ គឺវាជាការចាំបាច់ណាស់ ដែលអាជ្ញាធរត្រូវ រិតបន្តិងសន្តិសុខ នៅតាមស្ថានីយ៍រថភ្លើង ក៏ដូចជានៅតាម ទូររថភ្លើងនីមួយៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ