ពន្លឺព្រាលៗជុំវិញការស៊ើបអង្កេតលើករណីភេរវកម្មនៅបារាំង
ជនដៃដល់ដែលបានបង្កភេរវកម្ម សម្លាប់មនុស្សម្នាក់ដោយកាត់ក្បាល និងបំផ្ទុះរោងចក្រមួយ នៅក្បែរទីក្រុងលីយ៉ុង ប្រទេសបារាំង ត្រូវបានបញ្ជូនទៅឃុំខ្លួន នៅការិយាល័យនរគរបាលប្រឆាំងភេរវកម្មបារាំង ហើយ។ យោងតាមអាជ្ញាធរបារាំង ឃាតករនេះ បានថតរូបចំនួនពីរ ជាមួយនឹងក្បាលសាកសព ដែលបានកាត់រួចរាល់ ហើយបានផ្ញើររូបនោះ ទៅលេខទូរស័ព្ទមួយ នៅកាណាដា។ អាជ្ញាធរកំពង់តែស្វែងរកម្ចាស់លេខទូរសព្ទនេះ ដើម្បីស្វែងយល់អំពីបណ្តាញ និងប្រភពដែលជំរុញឲ្យឃាតករ ធ្វើអំពើដ៏ព្រៃផ្សៃបែបនេះ នៅលើទឹកដីបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ជនឈ្មោះ យ៉ាស៊ីន សាល់ហ៊ី អាយុ៣៥ឆ្នាំ ដែលត្រូវចាប់បានភ្លាមៗ នៅនឹងកន្លែង កើតហេតុ ដែលជននេះកំពុងតែបង្កការផ្ទុះនៅក្នុងរោងចក្រផលិតហ្គាសមួយ នៅចម្ងាយប្រមាណជាង៣០គីឡូម៉ែត្រពីទីក្រុងលីយ៉ុង ប្រទេសបារាំង។ មុននឹងបង្កការផ្ទុះក្នុងរោងចក្រ ជននេះ បានសម្លាប់ថៅកែក្រុមហ៊ុនដឹកជញ្ជូន ដែលខ្លួនធ្វើការឲ្យ ដោយបានកាត់ក្បាលជនរងគ្រោះ យកទៅដោតនៅនឹងរបងរោងចក្រ ព្រមទាំងមានដោតទង់ខ្មៅរបស់ក្រុមជីហាដអ៊ីស្លាម នៅក្បែរទៀតផង។ របៀបសម្លាប់មនុស្ស ហើយយកក្បាលមកដោតសម្ងែងបែបនេះ គឺជារបៀបរបស់ក្រុមជីហាដអ៊ីស្លាម ដោយឥតប្រកែកបាន។
បន្ទាប់ពីត្រូវបានឃុំខ្លួនបានមួយយប់ ជនដៃដល់ បានចាប់ផ្តើមនិយាយត្រួសៗ ពីដំណើរប្រព្រឹត្តិទៅ នៃអំពើដ៏យង់ឃ្នងរបស់ខ្លួន។ តាមការផ្តល់ដំណឹងពីក្រុមស៊ើបអង្កេត ជននេះបានថតរូបពីរ ជាមួយនឹងទូរស័ព្ទរបស់ខ្លួន រូបមួយថតក្បាលសាកសពដែលវាបានកាត់ហើយ ហើយរូបមួយទៀត គឺវាថតសែលហ្វ៊ី(Selfie) ខ្លួនឯង ជាមួយនឹងក្បាលសាកសព។ រូបទាំងពីរនេះ ត្រូវបានជននេះ ផ្ញើរទៅកាន់លេខទូរស័ព្ទមួយនៅកាណាដា។
អាជ្ញាធរបារាំង ដែលទើបទទួលបានកិច្ចសហការពីអាជ្ញាធរកាណាដា កំពុងធ្វើការស្រាវជ្រាវដើម្បីស្វែងរកមនុស្សដែលជាម្ចាស់លេខទូរស័ព្ទនៅកាណាដា។ ប៉ុន្តែគេសង្ស័យថា លេខនេះ អាចគ្រាន់តែជាលេខសម្រាប់ផ្ទេរបញ្ជូនទៅកាន់លេខថ្មីមួយទៀត ដែលគេមិនអាចដឹងប្រភពនៅទីណាច្បាស់។ ប្រពន្ធ និងប្អូនស្រីរបស់ភេរវជន ក៏ត្រូវបានឃុំខ្លួនផងដែរ។ តាមច្បាប់បារាំង ក្នុងករណីភេរវកម្ម នគរបាលអាចឃុំខ្លួនជនសង្ស័យជាបណ្តោះអាសន្ន ចំនួន៩៦ម៉ោង មុននឹងមានការចោទប្រកាន់ជាផ្លូវការពីតុលាការ។
ការស្រាវជ្រាវរបស់អាជ្ញាធរ គឺដើម្បីចង់ដឹងថា ជននេះ បានបង្កហេតុការណ៍នេះ ដោយមានខ្សែរយៈ ក្រុមអ៊ីស្លាមជីហាដបញ្ជាពីក្រោយ រឺមួយក៏ជាទង្វើផ្ទាល់ខ្លួន ដែលលាយឡំដោយជំនឿងប់ងុល ជាមួយនឹងទ្រឹស្តីរបស់ក្រុមជីហាដ។ មកត្រឹមពេលនេះ គេគ្រាន់តែដឹងថា ជននេះ ធ្លាប់ចូលរូមសេពគប់ ជាមួយនឹងក្រុមជ្រុលនិយមអ៊ីស្លាម នៅរវាងឆ្នាំ២០០៦។ ក្រោយមកទៀតជននេះ បានចូលប្រាស្រ័យទាក់ទងនឹងក្រុមសាល់អាហ្វិស្ត៍ នៅរវាងឆ្នាំ២០១១-២០១៤។ ប៉ុន្តែបើតាមការឆែកឆេរផ្ទះជននេះ គេមិនបានរកឃើញភស្តុតាងអ្វីផ្សេង បញ្ជាក់ពីការចូលរូម ដោយសកម្មជាមួយនឹងក្រុមជីហាដអ៊ីស្លាមនោះទេ។ គេគ្រាន់តែបានរកឃើញ កាំភ្លើងក្លែងក្លាយមួយ ដែលតាមការសង្ស័យគឺជននេះ បានយកទៅគម្រាមថៅកែខ្លួន ដើម្បីយកទៅសម្លាប់ចោល។
សូមបញ្ជាក់ថា នេះជាលើកទីមួយហើយ ដែលមានករណីភេរវកម្ម អមដោយឃាតកម្មកាត់ក្បាលមនុស្ស នៅលើទឹកដីបារាំង ដែលធ្វើឲ្យសាធារណៈមតិបារាំង មានការតក់ស្លុតយ៉ាងខ្លាំង។ ឆ្លងកាត់ការប្រជុំបន្ទាន់ កាលពីម្សិលមិញ រដ្ឋាភិបាលបារាំងបានបន្ថែមការត្រួតពិនិត្យសុវត្ថិភាព ដោយបានលើកចេញផែនការថ្មី ជាច្រើនចំណុច មានដូចជា ជ្រើសរើសមនុស្សបន្ថែមដើម្បីយាមកាម រឹតបន្តឹតផ្លូវច្បាប់ តាមរយៈច្បាប់ប្រឆាំងអំពើភេរវកម្មថ្មី ចំនួនពីរ ព្រមទាំងផ្តល់មធ្យោបាយចាំបាច់ ដល់ភ្នាក់ងារស៊ើបការណ៍សំងាត់បារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ