រុស្ស៊ីព្រមព្រៀងផ្គត់ផ្គង់ហ្គាសឲ្យអ៊ុយក្រែនឡើងវិញ
រុស្ស៊ីនិងអ៊ុយក្រែន បានជួបប្រជុំគ្នានៅទីក្រុងប្រ៊ុយស៊ែល ក្រោមការដឹកនាំរបស់គណកម្មការអឺរ៉ុប ដើម្បីចុះហត្ថលេខា លើកិច្ចសន្យាព្រមព្រៀងផ្គត់ផ្គង់ឧស្ម័នហ្គាស ទៅឲ្យអ៊ុយក្រែនឡើងវិញ គិតចាប់ពី ខែតុលា ខាងមុខនេះ រហូតដល់តំណាច់ឆ្នាំ២០១៦ ដោយរុស្ស៊ីសុខចិត្តបញ្ចុះតំលៃ។ អ៊ុយក្រែន សុខចិត្តទទួលយក ក៏ដោយសារតែរដូវត្រជាក់ជិតមកដល់ ហើយ ដែលប្រជាជន ត្រូវការជាចាំបាច់ នូវឧស្ម័នហ្គាស ដើម្បីប្រើប្រាស់ក្នុងម៉ាស៊ីនកំដៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
រុស្ស៊ីបានផ្តាច់ឈប់ផ្គត់ផ្គង់ហ្គាស ដល់អ៊ុយក្រែន តាំងតែពីខែកក្កដាមកម្លេះ។ ប៉ុន្តែខែត្រជាក់ធ្លាក់ទឹកកកកាន់តែខិតជិតមកដល់ ហើយប៉ុន្មានសប្តាហ៍ចុងក្រោយនេះ ការចរចាដើម្បីបើកឲ្យមានចរាចរណ៍ហ្គាសឡើងវិញ បានធ្វើឡើង ដោយប្រញាប់ប្រញាល់។ ទីបំផុត ភាគីទាំងពីរ បានព្រមព្រៀងគ្នា ដោយរុស្ស៊ីសុខចិត្ត បញ្ចុះតម្លៃបន្តិចបន្តួច។
តាមការឲ្យដឹង ក្រុមហ៊ុន Gazprom របស់រុស្ស៊ី បានសុខចិត្តបញ្ចុះតម្លៃ ប្រមាណជា ២៤,៦ដុល្លារអាមេរិក ក្នុង ១០០០ម៉ែត្រគូប។ បើគិតទៅគឺតម្លៃនៅសល់ត្រឹម ២២៧,៤ ដុល្លារអាមេរិក ក្នុង ១០០០ម៉ែត្រគូប។ លោករដ្ឋមន្ត្រីថាមពលអ៊ុយក្រែន បានបញ្ជាក់ថា កិច្ចព្រមព្រៀងនេះ ខាងភាគីអ៊ុយក្រែន អាចទទួលយកបាន ដោយសារតែវានឹងអាចជួយស្តារលំនឹងសេដ្ឋកិច្ចរបស់អ៊ុយក្រែន។
សហភាពអឺរ៉ុប ដែលរំពឹងមួយផ្នែកធំ លើបំពង់បង្ហូរឧស្ម័នពីរុស្ស៊ី ដែលឆ្លងកាត់អ៊ុយក្រែន បានសុខចិត្តជួយសម្រួល ការចំណាយសរុប ដែលគិតជាទឹកប្រាក់ ប្រមាណជា ៥០០លានដុល្លារអាមេរិក។ ប៉ុន្តែសហភាពអឺរ៉ុប នឹង មិនទទួលខុសត្រូវ លើការចំណាយបន្ថែមណា លើសនេះទេ។
សូមបញ្ជាក់ថា ការប្រើប្រាស់ឧស្ម័នហ្គាស នៅតាមផ្ទះ ទូទាំងអ៊ុយក្រែន គឺរំពឹង ជាងពាក់កណ្តាល លើហ្គាស ដែលបង្ហូរចេញពីរុស្ស៊ី។ បំពង់បង្ហូរឧស្ម័ននេះ ក៏ជាផ្លូវឆ្លងកាត់ផងដែរ នៃឧស្ម័នហ្គាស ដែលរុស្ស៊ី បង្ហូរទៅលក់ដល់បណ្តាប្រទេសផ្សេងទៀតនៅអឺរ៉ុប។ គួររំលឹកថា បន្ទាប់ពីក្រុមដែលមានទំនោរទៅរកអឺរ៉ុប បានឡើងដឹកនាំអ៊ុយក្រែន រដ្ឋាភិបាលនេះ បានចាប់ផ្តើមរើរូសកិច្ចសន្យា ហើយទាមទារឲ្យរុស្ស៊ី បន្ទាបតម្លៃ។ ចំណែករុស្ស៊ីវិញ បានទាមទារ ឲ្យអ៊ុយក្រែន សងប្រាក់ជំពាក់ ដែលមានប្រមាណជា ជាង ៤ពាន់លានអឺរ៉ូ។ ក្រោយមកទៀត សង្រ្គាមបានផ្ទុះឡើង នៅភាគខាងកើតអ៊ុយក្រែន ដោយសារក្រុមឧទ្ទាម ដែលគាំទ្ររុស្ស៊ី បានទទួលជំនួយយោធានិងអាវុធ ពីរុស្ស៊ី។
ការព្រមព្រៀងថ្មីនេះ ជាសញ្ញា បង្ហាញពីការបន្ទន់ឥរិយាបថរបស់ភាគីទាំងពីរ។ ខាងអ៊ុយក្រែនសុខចិត្ត ដោយសារតែខែត្រជាក់ជិតមកដល់ ឯខាងរុស្ស៊ីសុខចិត្តបញ្ចុះតម្លៃ ព្រោះថា ផ្លូវបង្ហូរឧស្ម័ននេះ ជាផ្លូវរួម ដែលរុស្ស៊ីបង្ហូរទៅលក់ដល់ប្រទេសផ្សេងទៀត។ បើរុស្ស៊ី បិទ មានន័យថា រុស្ស៊ី ក៏មិនអាចលក់ទៅឲ្យប្រទេសផ្សេងទៀតបានដែរ។ ដូច្នេះ ការខាតបង់គឺមានកាន់តែច្រើនសម្រាប់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ