សមិទ្ធិករភាពយន្តអ៊ុយក្រែន ត្រូវបានតុលាការរុស្ស៊ី កាត់ទោស ឲ្យជាប់ពន្ធនាគារ២០ឆ្នាំ
បុរសជាពលរដ្ឋអ៊ុយក្រែន អាយុ៣៩ឆ្នាំ ជាអ្នកថតកុនថ្មីថ្មោង ឈ្មោះ Oleg Sentsov ធ្លាប់រស់នៅទៀបកោះគ្រីមេផ្ទាល់ ហើយប្រឆាំងប្តូរប្តេជ្ញទល់នឹងការភ្ជាប់ទឹកដីនេះ របស់អ៊ុយក្រែន កាលពីឆ្នាំមុនទៅជារបស់សហព័ន្ធរុស្ស៊ី នាថ្ងៃ ២៥សីហា ត្រូវបានតុលាការរុស្ស៊ី កាត់ទោសឲ្យជាប់ ”ក្នុងមណ្ឌលអប់រំកែខ្លួនវិន័យតឹង” សម្រាប់អំឡុងពេលដល់២០ឆ្នាំ តាមបទ“ចាត់ចែងឡើងជាសហគមន៍ភេរវនិយម”។ ការកាត់ទោសនេះ បានញ៉ាំងឲ្យមានការតវ៉ា យ៉ាងខ្លាំងពីខាងសហភាពអឺរ៉ុប និង ស.រ.អា. ដែលទាមទារពីក្រុងម៉ូស្គូ ឲ្យដោះលែងរូបគាត់ជាបន្ទាន់ ក្នុងឋានៈជា “អ្នកទោសនយោបាយ”។
ចុះផ្សាយនៅថ្ងៃ៖
ស្តាប់ - ០២:០៨
លុះកន្លងផុតទៅ២ខែ ក្រោយពី រុស្ស៊ីបានភ្ជាប់យកទឹកដីគ្រីមេមក រូបលោក Oleg Sentsov ក្នុងយប់ថ្ងៃ១០ឆ្លងទៅ១១ឧសភាឆ្នាំ២០១៤ ត្រូវបានចាប់ខ្លួនគឺក្នុងលំនៅគាត់នៅក្រុង Simferopol ដែលជារដ្ឋធានី នៃសាធារណរដ្ឋគ្រីមេ ហើយបញ្ជូនមកកាន់រដ្ឋធានីម៉ូស្គូ ឃុំឃាំងក្នុងពន្ធនាគារសន្តិសុខកម្រិតខ្ពស់ ឈ្មោះ Lefortovo រហូតដល់ពេលបើកអង្គសវនការ កាត់ទោស គាត់ ថ្ងៃ២៥សីហា នៅក្រុង Rostov តំបន់និរតីរុស្ស៊ី។
តុលាការ បានប្រកាសសាលក្រមកាត់ទោសបុរសនោះ ដែលជាសមិទ្ធិករភាពយន្ត និងជាអ្នកការពារបរិស្ថានផង ឲ្យជាប់ “ក្នុងមណ្ឌលអប់រំកែខ្លួនវិន័យតឹង “សម្រាប់អំឡុងពេលដល់ ២០ឆ្នាំ តាមបទចោទប្រកាន់បី គឺ ៖
ទី១-បានបង្កើតនៅគ្រីមេជាសហគមន៍ភេរវនិយម ដែលជាសាខាមួយ របស់ចលនាជ្រុលនិយមហួសហេតុនៅអ៊ុយក្រែន ឈ្មោះ Pravy Sektor ដែលហាមដាច់ខាត មិនឲ្យដំណើរការនៅរុស្ស៊ី ក្នុងគោលដៅដកគ្រីមេចេញពីសហព័ន្ធរុស្ស៊ីទៅវិញ។
ទី២-ក្នុងចន្លោះពីខែមេសា ដល់ខែឧសភាឆ្នាំ២០១៤ បានលួចដុតនៅក្រុង Simferopol គឺ ការិយាល័យរបស់អង្គការសង្គម “សហគមន៍ជនជាតិរុស្ស៊ីនៅគ្រីមេ” និងការិយាល័យរបស់បក្សកាន់អំណាចនៅរុស្ស៊ី បក្ស”ប្រទេសរុស្ស៊ីរួមធ្លុងមួយ” ។
ទី៣-បានសាកល្បង បំផ្ទុះ នៅថ្ងៃ៩ឧសភា ជាទិវាជ័យជំនះរុស្ស៊ីលើរបបហ្វាស៊ីស្តអាល្លឺម៉ង់ គឺ រូបសំណាក ដែលឧទ្ទិសដល់វិញ្ញាណក្ខ័ន្ធអគ្គមគ្គុទេសក៍សូវៀត Lenin នៅក្រុង Simferopol។
ក្រោយពីឮសាលក្រមនោះ លោក Sentsov ហៅការកាត់ទោសនេះ ថាឈរលើមូលហេតុនយោបាយសុទ្ធសាធ ទាំងសើចចំអកឲ្យ ហើយលើកម្រាមដៃពីរជាតួអក្សរ “ V “ មានន័យថា ជ័យជំនះ និងថែមទាំងច្រៀងភ្លេងជាតិអ៊ុយក្រែនទៅផង។
លោកស្រី ប្រមុខការទូតសហភាពអឺរ៉ុប Federica Mogherini ដោយទាមទារពីក្រុងម៉ូស្គូ ឲ្យដោះលែងជាបន្ទាន់រូបលោក Sentsov ថ្លែងថា ការកាត់ទោសពលរដ្ឋអ៊ុយក្រែននោះ គឺធ្វើទាំងល្មើសលើបទដ្ឋាននៃច្បាប់អន្តរជាតិ ដ្បិតតុលាការរុស្ស៊ីគ្មានសិទ្ធិពិនិត្យមើលសំណុំរឿងនេះទេ។
ក្រសួងការបរទេសអាមេរិក ដែលក៏ទាមទារឲ្យដោះលែងរូបអ្នកទោសនយោបាយនោះជាបន្ទាន់ ថ្លែងថា តុលាការរុស្ស៊ីដោយកាត់ទោសបែបនេះ បានប្រព្រឹត្តកំហុសគតិយុត្ត យ៉ាងជាក់ស្តែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ