គម្រោងច្បាប់ “ វិមជ្ឈការអំណាច” នៅអ៊ុយក្រែន ត្រូវបានអនុម័ត ទាំងចម្រូងចម្រាស
ជាការបោះឆ្នោតសម្រាប់បន្ធូរភាពតានតឹងនៅភាគខាងកើតអ៊ុយក្រែន ៖ ដោយធ្វើវិសោធនកម្មច្បាប់រដ្ឋធម្មនុញ្ញ សម្រួលស្វ័យភាពដល់តំបន់មានជម្លោះនៅភាគខាងកើតប្រទេស។ ប៉ុន្តែក្នុងពេលដែលតំណាងរាស្ត្រព្រមអនុម័តវិសោធនកម្មច្បាប់នេះ ស្រាប់តែមានចលនាបាតុកម្មនៅខាងក្រៅរដ្ឋសភាយ៉ាងហិង្សា និងទ្រង់ទ្រាយមិនធ្លាប់មានគិតចាប់ពីបដិវត្តក្រុងមៃដាន កាលពីជាងមួយឆ្នាំកន្លះមុនមក។
ចុះផ្សាយនៅថ្ងៃ៖
ស្តាប់ - ០៥:៥៤
ថ្ងៃ៣១សីហាម្សិលមិញ ក្នុងសម័យប្រជុំពិភាក្សាលើកទី១ សភាអ៊ុយក្រែន បានអនុម័ត គម្រោងច្បាប់ ស្តីអំពី”វិមជ្ឈការអំណាច” ដោយសម្លេងភាគច្រើន តាមរយៈការធ្វើវិសោធកម្មខ្លះទៅក្នុងរដ្ឋធម្មនុញ្ញ ដើម្បីឆ្លើយតបទៅនឹងការទាមទារ ចែងដោយកិច្ចព្រមព្រៀងក្រុងមិនស្ក៏ ចុះកាលពីថ្ងៃទី១២កុម្ភៈឆ្នាំ២០១៥។
ប៉ុន្តែ ទំរាំ អាចប្រព្រឹត្តទៅ ការបោះឆ្នោតជុំវិញគម្រោងច្បាប់នោះ ពួកអ្នកតំណាងរាស្ត្រខាងគណបក្សខ្លះ ដែលជំទាស់ នឹងការផ្លាស់ប្តូរនេះ ដែលតាមយោបល់គេ គឺអាចនាំឲ្យរដ្ឋអ៊ុយក្រែន បែកបាក់លែងស្ថិតនៅ ជារដ្ឋឯកភូត រលាយសាច់មួយ បាននាំគ្នាគោះតុ វ៉ៃសំបកដប លាន់ទ្រហ៊ឹង រំខានមិនឲ្យការបោះឆ្នោតអាចចាប់ផ្តើមបាន។ លុះក្រោយពីមានបទអន្តរាគមន៍ពន្យល់បំភ្លឺ ពីខាងប្រធានរដ្ឋសភា ទើបការបោះឆ្នោតនោះ អាចធ្វើទៅកើត។
គ្រាន់តែឮ លទ្ធផលនៃការបោះឆ្នោត បាតុកររាប់រយនាក់ ខាងគណបក្សដែលជំទាស់នោះ បានប្រព្រឹត្តអំពើហិង្សា បែបយ៉ាងគប់ គ្រាប់បែក ទៅលើ កងឆ្មាំជាតិ ដែលឈរជារបងការពារនៅពីមុខអគាររដ្ឋសភា។ ដោយមកពី ទង្គិចគ្នានោះ មានយោធាម្នាក់នៃកងឆ្មាំជាតិបានធ្លាក់ខ្លួនស្លាប់ ហើយតាមតួលេខចុងក្រោយ នៃក្រសួងមហាផ្ទៃ របួសគឺដល់ទៅ ១៤០នាក់ ក្នុងនោះ ១២២នាក់ ឥឡូវស្នាក់ព្យាបាលនៅ មន្ទីរពេទ្យ ដោយ៦នាក់ធ្ងន់មែនទែន ស្ទើរស្លាប់ស្ទើរស់។ ក្នុងចំណោមអ្នកត្រូវរបួស ក៏មានអ្នកកាសែតបរទេសផង បែបយ៉ាង ជាតិបារាំងជាដើម។
ចំណែកបាតុករដៃដល់ប្រមាណ ៣០នាក់ ត្រូវបានអាជ្ញាធរចាប់ឃុំឃាំង។ លោកប្រធានាធិបតី ប៉ូរ៉ូឆេនកូ បានថ្លែងថា ការប៉ះទង្គិចបង្ហូរឈាមនោះ គឺជា “ទង្វើប្រឆាំងរដ្ឋអ៊ុយក្រែន និង ជា “ ការចាក់នឹងកាំបិត ចំពីក្រោយខ្នងរដ្ឋអ៊ុយក្រែន” ហើយទាំងពួកមេចាត់ចែង ទាំងពួកប្រព្រឹត្តអំពើហិង្សា ដោយគ្មានរើសមុខឡើយ គឺត្រូវទទួលខុសត្រូវនៅពីមុខច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ