ក្រិកសន្យាបង្កើតប៉ុស្តិ៍ត្រួតពិនិត្យជនភៀសខ្លួន ទៅតាមការចង់បានរបស់អឺរ៉ុប
ស្ថានីយ៍ត្រួតពិនិត្យជនភៀសខ្លួន រឺដែលហៅថា Hotspot ត្រូវបានសហភាពអឺរ៉ុប សម្រចឲ្យប្រទេសសមាជិក ចាប់ផ្តើមបង្កើត ដើម្បីដាក់រាយនៅតាមច្រកព្រំដែនសំខាន់ៗ ដូចជានៅអ៊ីតាលី ក្រិក និងហុងគ្រីជាដើម។ នៅថ្ងៃសៅរ៍ ទី ១០ តុលា រដ្ឋាភិបាលក្រិក បានសន្យាថា គេនឹងអនុវត្តវិធានការថ្មីនេះ ក្នុងរយៈពេល ១០ថ្ងៃទៀត យ៉ាងយូរបំផុត ដើម្បីធ្វើការត្រួតពិនិត្យ ការមកដល់របស់ជនភៀសខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ចំណុចត្រួតពិនិត្យ រឺហៅថា Hotspot គឺជាកន្លែងចុះឈ្មោះជនភៀសខ្លួន រួមជាមួយនឹងមណ្ឌលស្នាក់នៅបណ្តោះអាសន្ន សម្រាប់ជនភៀសខ្លួន។ ស្ថានីយ៍ទាំងនេះ នឹងត្រូវចាប់ផ្តើមបង្កើត នៅតាមព្រំដែនខាងក្រៅរបស់អឺរ៉ុប។ តាមការឲ្យដំណឹង ពីលោក អ៊ីយ៉ានីស មូហ្សាឡា រដ្ឋមន្ត្រីក្រិកទទួលបន្ទុកកិច្ចការជនអន្តោប្រវេសន៍ បានប្រាប់ថា ក្រិកនឹងចាប់ផ្តើមបើកចំណុចត្រួតពិនិត្យទីមួយ ក្នុងពេល១០ថ្ងៃទៀត នៅច្រកព្រំដែន លើកោះ លេសបូស។ ចំនុចត្រួតពិនិត្យ ៤ផ្សេងទៀត នឹងត្រូវបើកឲ្យដំណើរការ ជាបន្តបន្ទាប់ នៅលើកោះ បួនផ្សេងទៀតដែរ។ ចំណុចត្រួតពិនិត្យជនភៀសខ្លួនទាំងនេះ គឺធ្វើនៅក្បែរព្រំដែនសមុទ្រ ដែលបែរមុខទៅរកតួកគី ដែលជាច្រកដ៏សំខាន់ នៃការមកដល់របស់ជនភៀសខ្លួន។
សូមបញ្ជាក់ថា នេះគឺជាគម្រោងរបស់សហភាពអឺរ៉ុប ដើម្បីធ្វើការគ្រប់គ្រងលំហូរជនភៀសខ្លួន ឲ្យបានត្រឹមត្រូវ។ ថវិកាចាយវាយ ព្រមទាំងសម្ភារៈ គឺជាការផ្គត់ផ្គង់ឲ្យ ដោយសហភាពអឺរ៉ុបផ្ទាល់ ឯចំណែកប្រទេសម្ចាស់ផ្ទះ មានតួនាទី រៀបចំចាត់ចែង ដំណើរការទូទៅ។
តាមការរំពឹងទុក ចំណុចត្រួតពិនិត្យទាំងនេះ នឹងធ្វើការចុះឈ្មោះ ទទួលយកពាក្យសុំសិទ្ធិជ្រកកោនជាជនភៀសខ្លួន របស់អ្នកដែលបានធ្វើដំណើរមកដល់។ ក្នុងន័យនេះ ភ្ញាក់ងារត្រួវពិនិត្យ មានតួនាទី ពិនិត្យមើលឲ្យបានម៉ត់ចត់ ពីលក្ខខណ្ឌផ្សេងៗ ថាជននោះ ពិតជាជនភៀសខ្លួន ដែលរត់គេចពីសង្រ្គាមពិតមែន រឺអត់។ ចំណែកជនអន្តោប្រវេសន៍ ដែលចង់មករស់នៅអឺរ៉ុប ដោយគ្រាន់តែចង់រកការងារធ្វើ ហើយប្រទេសដើមរបស់ខ្លួនគ្មានគ្រោះថា្នក់ រឺគ្មានសង្រ្គាម នឹងត្រូវបញ្ជូនឲ្យត្រឡប់ទៅវិញ។
គួររំលឹកថា គិតចាប់ពីដើមឆ្នាំ២០១៥នេះមក មានជនភៀសខ្លួន៤សែននាក់ ដែលបានធ្វើដំណើរមកដល់ក្រិក ដែលភាគច្រើន គឺជាជនជាតិស៊ីរី និងជនជាតិអ៊ីរ៉ាក់ ហើយធ្វើដំណើរឆ្លងមកពីតួកគី។ សហភាពអឺរ៉ុប ក៏កំពុងតែជម្រុញ ឲ្យក្រិក និតតួកគី ចរចាគ្នា ដើម្បីដើម្បីកំណត់កិច្ចព្រមព្រៀងមួយ ស្តីពីការគ្រប់គ្រងលំហូរជនភៀសខ្លួន ដែលធ្វើដំណើរឆ្លងកាត់តួកគី បំរុងចូលមកអឺរ៉ុប តាមច្រកព្រំដែនក្រិក។ តាមការគ្រោងទុក រដ្ឋមន្ត្រីទទួលបន្ទុកកិច្ចការអន្តោប្រវេសន៍ក្រិក នឹងទៅក្រុងអង់ការ៉ា នៅថ្ងៃពុធសប្តាហ៍ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ