វិបត្តិជនភៀសខ្លួន៖ ប្រទេសអឺរ៉ុបតំបន់បាល់កង់បិទព្រំដែនបន្តបន្ទាប់គ្នា
៤ថ្ងៃបន្ទាប់ ពីហុងគ្រីបានដាក់ស្រាក់របងបន្លាលួស តាមបណ្តោយព្រំដែន ជាមួយស៊ែប៊ី រួចរាល់ ដើម្បីស្ទាក់មិនឲ្យជនភៀសខ្លួន ឆ្លងចូលក្នុងទឹកដីខ្លួន នៅថ្ងៃសុក្រនេះ គឺដល់វេនក្រូអាស៊ី ដែលបានសម្រេចបិទច្រកព្រំដែន ជាមួយប្រទេសស៊ែប៊ី។ ក្នុងខណៈពេលដែល ជនភៀសខ្លួន កំពុងតែស្វះស្វែង រកច្រកចូលទៅអឺរ៉ុប យ៉ាងលំបាកលំបិន ក្រុមប្រទេសសមាជិកសហភាពអឺរ៉ុប កំពុងតែបែកខ្ញែកគ្នាយ៉ាងខ្លាំង ដោយសារតែនិយាយមិនចុះសម្រុងគ្នា ស្តីពីការទទួលយកជនភៀសខ្លួនទាំងនោះ ទៅតាមប្រទេសនីមួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
បន្ទាប់ ពីហុងគ្រីបានបិទទ្វារព្រំដែនទាំងស្រុង ដោយការដាក់បន្លាលួស តាមបណ្តោយព្រំដែន ជាមួយស៊ែប៊ី ក្រុមជនភៀសខ្លួន ជាច្រើនពាន់នាក់ បានបង្វែរទិសដៅ ឆ្ពោះទៅកាន់ប្រទេសក្រូអាស៊ី ដើម្បីបានឆ្លងចូលទៅក្នុងដែនដីអឺរ៉ុប។ មិនដល់៣ថ្ងៃផង មានជនភៀសខ្លួនសរុបទាំងអស់ចំនួន ១៣០០០នាក់ ដែលបានទៅដល់ក្រូអាស៊ី។ នេះបើតាមការបញ្ជាក់តាមកញ្ចក់ទូរទស្សន៍ របស់រដ្ឋមន្ត្រីក្រសួងមហាផ្ទៃក្រូអាស៊ី។
លោកបន្ថែមថា ចំនួន ១៣០០០នេះ គឺវាច្រើនណាស់ ហើយសមត្ថភាពទទួលរបស់ក្រូអាស៊ី គឺដល់កំរិតមួយដែលមិនអាចធ្វើបានលើសនេះទេ។ នៅថ្ងៃសុក្រទី ១៨សីហានេះ ក្រូអាស៊ី បានសម្រេចបិទច្រកព្រំដែនទាំង៧ចំណុច ដែលឆ្លងចូលពីស៊ែប៊ី។ ដូចគ្នាដែរ ហុងគ្រីបានសម្រេចបិទព្រំដែនតាមដីគោក ប្រវែង៤១គីឡូម៉ែត្រ ជាមួយនឹងក្រូអាស៊ី ផងដែរ។
ចំណែកប្រទេសស្លូវ៉េនី បានបិទផ្អាកចរាចររថភ្លើង ជាមួយក្រូអាស៊ី ជាបណ្តោះអាសន្ន ដើម្បីទប់ស្កាត់ មិនឲ្យជនភៀសខ្លួនសម្រុកចូលទៅស្លូវ៉េនី ដោយគំហុក។ ទោះបីជាយ៉ាងណា អាជ្ញាធរស្លូវ៉េនីមិនបានបញ្ជាក់ទេថា គេនឹងបិទទ្វារព្រំដែន។ គេគ្រាន់តែបានបញ្ជាក់ថា ស្លូវេនី និងត្រួតពិនិត្យលើការធ្វើដំណើររបស់ក្រុមជនភៀសខ្លួន បើសិនជាពួកគេ គោរពលក្ខខណ្ឌត្រឹមត្រូវទៅតាមវិធានអន្តោប្រវេសន៍របស់អឺរ៉ុប នោះស្លូវ៉េនី និងអនុញ្ញាតិឲ្យពួកគេចូលឆ្លងកាត់។
សូមបញ្ជាក់ថា ខុសពីក្រូអាស៊ី ស្លូវ៉េនី គឺជាសមាជិកសហភាពអឺរ៉ុបហើយ ហើយជាសមាជិកតំបន់ចរាចរសេរីឆិនហ្គិនទៀត។ ដូច្នេះមានន័យថា បើកាលណាជនភៀសខ្លួន មានលិខិតស្នាមត្រឹមត្រូវអាចចូលទៅដល់ស្លូវ៉េនី នោះពួកគេអាចឆ្លងទៅប្រទេសតំបន់ឆិនហ្គិនផ្សេងទៀត បានដោយសេរី។ អ្វីដែលធ្វើឲ្យស្លូវ៉េនីមានការប្រុងប្រយ័ត្ន មួយទៀតគឺថា ស្លូវ៉េនីជាប្រទេសដ៏តូច ហើយមានប្រជាជនប្រមាណតែជាង២លាននាក់តែប៉ុណ្ណោះ។ ដូច្នេះ ការអនុញ្ញាតឲ្យជនភៀសខ្លួនរាប់ម៉ឺននាក់ ចូលដោយគំហុក អាចបង្ករជាបញ្ហាធ្ងន់ធ្ងរ។
ដោយឡែក លោករដ្ឋមន្ត្រីការបរទេសអាល្លឺម៉ង់ បានថ្លែងពីប្រទេសតួកគីមកថា អាល្លឺម៉ង់ នឹងទាមទារឲ្យមានការបោះឆ្នោត ដោយយកសម្លេងភាគច្រើន ដើម្បីបង្ខំឲ្យប្រទេសសមាជិកសហភាពអឺរ៉ុបទាំងអស់ ទទួលយកជនភៀសខ្លួន ទៅតាមការកំណត់កូតា។ លោកបន្ថែមថា អាល្លឺម៉ង មានគម្រោងទទួលជនភៀសខ្លួន ប្រហែល១លាននាក់ ប៉ុន្តែមាននរណាខ្លះជួយអាល្លឺម៉ង់វិញ?
បច្ចុប្បន្ននេះ ប្រទេសដែលប្រកែកដាច់អហង្ការ មិនព្រមទទួលយកកូតា គឺមាន ហុងគ្រី ឆេក ប៉ូឡូញ ដាណឺម៉ាក និងស្លូវ៉ាគីជាដើម។ ដោយឡែក រដ្ឋមន្ត្រីមហាផ្ទៃសហភាពអឺរ៉ុប នឹងជួបប្រជុំគ្នា នៅថ្ងៃ២២កញ្ញា។ ចំណែក កិច្ចប្រជុំកំពូលវិសាមញ្ញ របស់ប្រមុខរដ្ឋាភិបាលសមាជិកអឺរ៉ុប នឹងធ្វើឡើង នៅថ្ងៃបន្ទាប់ នៅក្រុងប្រ៊ុយសែល ដើម្បីរកដំណោះស្រាយជុំវិញវិបត្តិជនភៀសខ្លួននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ