ONU អនុញ្ញាតឲ្យអឺរ៉ុប ចាត់វិធានការបង្រ្កាបទូកដឹកជនភៀសខ្លួនឆ្លងសមុទ្រ
ជិតមួយឆ្នាំមកហើយ ដែលសហភាពអឺរ៉ុប ព្យាយាមរកដំណោះស្រាយ ដើម្បីបង្ក្រាប ក្រុមឈ្មួញ ដែលរកស៊ី ដឹកជញ្ជូន ជនភៀសខ្លួន ឆ្លងសមុទ្រម៉េឌីទែរ៉ាណេ ពីប្រទេសលីប៊ី មកកាន់ ដែនដី អ៊ីតាលី។ ទើបតែនៅថ្ងៃសុក្រ ម្សិលមិញ ក្រុមប្រឹក្សាសន្តិសុខ អង្គការសហប្រជាជាតិ បានបោះឆ្នោត សម្រេច ផ្តល់ភ្លើងខៀវ ឲ្យក្រុមកម្លាំងចម្រុះ របស់សហភាពអឺរ៉ុប ដោយអនុញ្ញាតឲ្យធ្វើប្រតិបត្តិការ ឆែកឆេ រឹបអូស រឺកម្ទេចទូករបស់ពួកឈ្មួញខុសច្បាប់ នៅក្នុងដែនសមុទ្រអន្តរជាតិចន្លោះពី លីប៊ី មកអ៊ីតាលី។
ចុះផ្សាយនៅថ្ងៃ៖
ស្តាប់ - ០២:២៥
ទីបំផុតទៅ សមាជិក១៤ ក្នុងចំណោម១៥ នៃក្រុមប្រឹក្សាសន្តិសុខអង្គការសហប្រជាជាតិ បានសម្រេចបោះឆ្នោត អនុញ្ញាតិ ឲ្យកម្លាំងចម្រុះរបស់អឺរ៉ុប អាចចេញប្រតិបត្តិការនៅក្នុងដែនសមុទ្រអន្តរជាតិ ដើម្បីបង្រ្កាប ការដឹកជញ្ជូនជនភៀសខ្លួនដោយខុសច្បាប់។ កម្លាំងចម្រុះនេះ មាននាវាល្បាតរបស់បារាំង អង់គ្លេស អ៊ីតាលី អាល្លឺម៉ង់ និងអេស្ប៉ាញ។ គំនិតនៃការចេញប្រតិបត្តិការ ទប់ស្កាត់ការដឹកជញ្ជូនជនភៀសខ្លួន ឆ្លងសមុទ្រម៉េឌីទែរ៉ាណេនេះ គឺជាការផ្តួចផ្តើមរបស់រដ្ឋាភិបាលអង់គ្លេស ហើយត្រូវគេដាក់នាមថា ប្រតិបត្តិការសូហ្វយ៉ា ដើម្បីរំលឹកដល់ឈ្មោះក្មេងស្រីម្នាក់ ដែលជាជនភៀសខ្លួន ស្លាប់ដោយលង់ទឹក។
យោងតាមខ្លឹមសារនៃបេសកកម្មនេះ ក្រុមកម្លាំងចម្រុះ នឹងមានសិទ្ធិស្របច្បាប់ ក្នុងការចាប់ឆែកឆេរ ទូកនាៗ ដែលគេមានការសង្ស័យថាមានដឹកជនភៀសខ្លួន បន្ទាប់មកគេអាចរឹបអូស រឺបំផ្លាញចោល។ ជនភៀសខ្លួន នឹងត្រូវជួយសង្រ្គោះ ហើយដឹកបញ្ជូនទៅកាន់អ៊ីតាលី ដើម្បីឲ្យពួកគេ រៀបចំ សំណុំបែបបទ សុំសិទ្ធិជ្រកកោន។ តែយ៉ាងណាក៏ដោយ ប្រតិបត្តិការដែលអនុញ្ញាតដោយអង្គការសហប្រជាជាតិនេះ មានដែនកំណត់ធំៗ ពីរ គឺទីមួយ គឺវាមានសុពលភាពតែរយៈពេលមួយឆ្នាំតែប៉ុណ្ណោះ ហើយទីពីរ គឺគេអាចអនុវត្តបាន តែនៅក្នុងដែនសមុទ្រអន្តរជាតិ ចន្លោះពី លីប៊ី ទៅអ៊ីតាលីទេ។ ដែនទឹកស្ថិតក្នុងអធិបតេយ្យរបស់លីប៊ី គេមិនអាចធ្វើប្រតិបត្តិការបានទេ ដោយសារតែលីប៊ី នៅមិនទាន់មានរដ្ឋាភិបាលស្របច្បាប់ ដែលអាចចុះហត្ថលេខាយល់ព្រមនៅឡើយ។
វ៉េណាហ្ស៊ុយអេឡា ដែលជាប្រទេសតែមួយគត់ ដែលបានបោះឆ្នោតបដិសេធបេសកកម្មនេះ បានបន្ទោសថា គេមិនអាចបញ្ឈប់ដំណើរមកដល់ របស់ជនភៀសខ្លួន ដោយគ្រាន់តែបិទទ្វារ យាមកាមតឹតរឹងតាមព្រំដែន វាគ្រប់គ្រាន់នោះទេ។ យ៉ាងណាមិញ លោក ទូតអង់គ្លេស ប្រចាំនៅអង្គការសហប្រជាជាតិ បានទទួលស្គាល់ថា បេកសកម្មនេះ វាជាចំណែកមួយតូច ប៉ុណ្ណោះ ក្នុងការទប់លំហូរ ជនភៀសខ្លួនដែលនាំគ្នាសម្រុកមកអឺរ៉ុប។ ដំណោះស្រាយចំបង គឺវាស្ថិតនៅតាមប្រទេសដើម ស៊ីរី និងអ៊ីរ៉ាក់ ដែលកំពុងតែឆាបឆេះ ដោយសង្រ្គាម។
បើគិតចាប់ពីដើមឆ្នាំ ២០១៥នេះ មានជនភៀសខ្លួនប្រមាណជា ៥សែននាក់ ដែលបាននាំគ្នាផ្សងជីវិត ធ្វើដំណើរមកសុំសិទ្ធិជ្រកកោននៅអឺរ៉ុប។ ក្នុងចំណោមនោះ មានជាង៣ពាន់នាក់ ដែលបានស្លាប់បាត់បង់ជីវិត ដោយសារតែលេចទូក នៅក្នុងសមុទ្រម៉េឌីទែរ៉ាណេ។ ក្រុមឈ្មួញ ដែលឆក់ឱកាសចលាចលនយោបាយនៅលីប៊ី បានបង្កើតជាបណ្តាញ រកស៊ីដឹកជញ្ជូនជនភៀសខ្លួន តាមទូករខេករខាក គ្មានគិតអាសូរពីសុវត្ថិភាព និងអាយុជីវិតរបស់ជនភៀសខ្លួន។ បើទោះបីជាបេសកកម្ម របស់កម្លាំងចម្រុះអឺរ៉ុប មិនមែនជាមធ្យោបាយ ដ៏ល្អ ក្នុងការទប់ស្កាត់លំហូរជនភៀសខ្លួនក៏ដោយចុះ ក៏ប៉ុន្តែបេសកកម្មនេះ នឹងអនុញ្ញាតឲ្យគេ អាចជួយសង្រ្គោះជីវិតជនភៀសខ្លួន បានទាន់ពេលវេលា មុននឹងទូកពួកគេត្រូវរលកបោកបក់ពន្លឹចក្នុងសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ