ប្រមុខការទូតរុស្ស៊ី រាយការណ៍ ជូនអ្នកតំណាងរាស្ត្រ អំពីប្រតិបត្តិការរុស្ស៊ី នៅស៊ីរី
គឺក្នុងក្របខ័ណ្ឌ “ម៉ោងរដ្ឋាភិបាល” នៅសភាឌូម៉ា ដែលលោករដ្ឋមន្ត្រីការបរទេស រុស្ស៊ី Serguei Lavrov ឡើងថ្លែង ថ្ងៃ១៤តុលា នៅពីមុខពួកអ្នកតំណាងរាស្ត្រ អំពីស្ថានការណ៍លើឆាកអន្តរជាតិ និងអំពីការខំប្រឹងប្រែងរបស់ក្រសួងគាត់ ការពារផលប្រយោជន៍ សហព័ន្ធរុស្ស៊ី។ ប្រធានបទចម្បង នៃសុន្ទរកថាគាត់ គឺ ការវាយប្រហារនៃកងអាកាសរុស្ស៊ី ទៅលើ ទីតាំងពពួកក្រុមភេរវនិយម នៃអង្គការរដ្ឋអ៊ីស្លាម ពួកដែលឥឡូវ នាំគ្នាគំរាមសងសឹករុស្ស៊ីវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ក្នុងបទអន្តរាគមន៍ខ្លួន លោកប្រមុខការទូតរុស្ស៊ី លើកឡើងអំពីការចូលរួមរបស់កងអាកាសរុស្ស៊ី ក្នុងការប្រយុទ្ធទល់នឹងភេរវនិយមនៅស៊ីរី អំពីការខំប្រឹងប្រែងក្នុងពេលជាមួយគ្នារបស់រុស្ស៊ី រកដំណោះស្រាយតាមផ្លូវនយោបាយឲ្យវិបត្តិនៅស៊ីរី អំពីការសហការរបស់រុស្ស៊ី ជាមួយបណ្តាប្រទេសខាងលិចក្នុងបញ្ហានេះ។ តាមប្រសាសន៍គាត់ រុស្ស៊ីត្រូវតែទប់មហិច្ឆតាវាតទីនិយម មិនគ្រាន់តែនៅអឺរ៉ុបខាងកើត និង តំបន់ដើមបូព៌ាប៉ុណ្ណោះទេ តែក៏នៅ តាមភូមិភាគឯទៀតនៃផែនដី។
គាត់សង្កត់ធ្ងន់ថា ការប្រយុទ្ធទល់នឹងភេរវនិយម គឺជាអាទិភាព។ លោក Lavrov កត់សម្គាល់ថា ភាពសកម្មរុស្ស៊ីខាងនយោបាយក្រៅប្រទេស ត្រូវមានលក្ខណៈសម្បូណ៍បែប ហើយមិនអាចភ្ជុងតែនៅទ្វីបអឺរ៉ុបសុទ្ធសាធ។
ស្របនឹងរបៀបរបបដែលមាន បន្ទាប់ពីសុន្ទរកថាខ្លួន លោកប្រមុខការទូតរុស្ស៊ី មានកាតព្វកិច្ច ឆ្លើយនឹងសំនួរចោទមួយម្តងៗ ដោយមេដឹកនាំនៃក្រុមតំណាងរាស្ត្ររបស់គណបក្សទាំង៤ ដែលមានអាសនៈប្រចាំនៅសភាឌូម៉ា។ ជាបង្ហើយកិច្ច រដ្ឋមន្ត្រីការបរទេស ធ្វើអត្ថាធិប្បាយ អំពីបទអន្តរាគមន៍ នៃតំណាងរាស្ត្រទាំងនោះ។
គួរនិយាយថា ថ្ងៃពុធនេះ យោធារបស់ក្រុងវ៉ាស៊ីនតោន ដែលដឹកនាំ សម្ព័ន្ធ៦០ប្រទេស វាយ ប្រហារទៅលើទីតាំង ពពួកក្រុមភេរវនិយមនៃអង្គការរដ្ឋអ៊ីស្លាម នៅស៊ីរីដែរ តាមវីដេអូខុនហ្វេរិន បន្តការពិភាក្សាជាមួយពួកយោធារុស្ស៊ី ដើម្បីចៀសវាងកុំឲ្យយន្តហោះខ្លួន ក្នុងប្រតិបត្តិការនេះប៉ះទង្គិចគ្នាក្នុងលំហអាកាសឡើយ។
ម៉្លោះហើយ បានជាឥឡូវ ទាំងរុស្ស៊ី ទាំងអាមេរិក ត្រូវពួកជីហាតនៃអង្គការរដ្ឋអ៊ីស្លាម គម្រាម សងសឹក វិញ។ ថ្លែងថ្ងៃ ១៣តុលា អ្នកនាំពាក្យ របស់អង្គការរដ្ឋអ៊ីស្លាមនោះ ឈ្មោះ Abou Mohamed al- Adnani បានដាក់ទំនាយឲ្យ “រុស្ស៊ីធ្លាក់ក្នុងបរាជ័យ” និងបានអំពាវនាវអ្នកកាន់សាសនាអ៊ីស្លាម នៅគ្រប់ទិសទី ឲ្យងើបឡើងប្រឆាំងរុស្ស៊ី និង អាមេរិក។ មុនពេលនេះ មេដឹកនាំនៃរណសិរ្ស al-Nosra ឈ្មោះ Abou Mohammad al-Jolani អំពាវនាវ ពួកមូស្លីមនៃតំបន់ភ្នំកូកាស ឲ្យគាំទ្រប្រជាជនស៊ីរី ក្នុងន័យថា “បើកងទ័ពរុស្ស៊ីសម្លាប់បណ្តាជនយើង យើងត្រូវតែសម្លាប់បណ្តាជនរុស្ស៊ីដែរ បើកងទ័ពរុស្ស៊ី សម្លាប់ពួកទាហានយើង យើងត្រូវតែសម្លាប់ពួកទាហានរុស្ស៊ីដែរ !៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ