តួកគីកាត់ទោសអ្នកកាសែតប្រឆាំងពីររូបដោយបិទទ្វារ
នៅថ្ងៃសុក្រទី ២៥មីនា ២០១៦ តុលាការតួកគី បានបើកសវនាការ កាត់ទោសអ្នកកាសែតរបស់សារព័ត៌មានប្រឆាំងពីរនាក់ដ៏ល្បីល្បាញ ដោយបិទទ្វារ។ ចាប់ខ្លួនបានពីបទចារកិច្ច និងប៉ុនប៉ងធ្វើរដ្ឋប្រហារ កាន ដុនដារ Can Dündar និពន្ធនាយកកាសែតCumhuriyet និងអេដេម ហ្គូល Erdem Gül ធ្លាប់បានសរសេរ កាលពីឆ្នាំ២០១៤ ផ្សព្វផ្សាយព័ត៌មានដ៏រសើបទាក់ទងនឹងសកម្មភាពរបស់រដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
សំណុំរឿងកាត់ក្តីអ្នកកាសែតពីររូបនេះបានក្លាយជានិម្មិតរូបនៃការរឹតបន្តឹងដាក់គំនាបលើអ្នកសារព័ត៌មានរបស់តួកគី និងប្រព្រឹត្តទៅ ចំពេលដែលមានការបង្ក្រាបយ៉ាងតឹងតែង លើប្រព័ន្ធសារព័ត៌មាន ៖ បណ្តេញអ្នកកាសែតបរទេស និងដាក់កាសែតមួយឈ្មោះ Zaman ឱ្យស្ថិតនៅក្រោមការត្រួតត្រារបស់រដ្ឋាភិបាល។
ក្នុងបទចោទប្រកាន់ចារកិច្ច លួចទម្លាយការសម្ងាត់រដ្ឋ ប៉ុនប៉ងធ្វើរដ្ឋប្រហារ និងផ្តល់ជំនួយដល់អង្គការភេរវនិយម អ្នកកាសែតទាំងពីរអាចនឹងត្រូវទទួលទោសជាប់ពន្ធនាគារអស់មួយជីវិត។
កាលពីដើមឆ្នាំ២០១៤ អ្នកកាសែតទាំងពីរ បានចុះផ្សាយ នៅក្នុងទំព័រសារព័ត៌មាន Cumhuriyet ថាមានរថយន្តកាមីញ៉ុងជាច្រើនរបស់ភ្នាក់ងារសម្ងាត់តួកគី បានដឹកអាវុធជាច្រើនទៅឱ្យពួកឧទ្ទាមអ៊ីស្លាមជ្រុលនិយមនៅស៊ីរី។
នៅពេលនោះ ប្រធានាធិបតីតួកគី បានប្រកាសភ្លាមថា ជនដែលផ្សាយព័ត៌មាននេះ នឹងត្រូវទទួលទោសយ៉ាងធ្ងន់ធ្ងរ និងបានដាក់ពាក្យបណ្តឹង ជាលក្ខណៈបុគ្គលប្រឆាំងនឹងនាយកការិយាល័យនិពន្ធរបស់កាសែតភ្លាម។ លោកប្រធានាធិបតីថែមទាំងបានសំឡុតចង់រំលាយស្ថាប័នតុលាការធម្មនុញ្ញទៀត នៅពេលតុលាការចង់ផ្តល់សេរីភាពដល់អ្នកកាសែតទាំងពីរ ក្រោយចប់រយៈពេលឃុំឃាំងបណ្តោះអាសន្ន។
ជានិពន្ធនាយករបស់កាសែតតាំងពីឆ្នាំ២០១៣មក កាន ដុនដារ (៥៥ឆ្នាំ) នៅតែបន្តសរសេរទៀត បើទោះបីនៅក្នុងពន្ធនាគារក៏ដោយ ក្នុងទស្សនៈដដែល គឺប្រឆាំងនឹងរដ្ឋាភិបាលតួកគីផង ប្រឆាំងនឹងសហភាពអឺរ៉ុប ដែលបណ្តោយឱ្យក្រុងអង់ការ៉ាដើរខុសគន្លងប្រជាធិបតេយ្យ។ លោកបានចាត់ទុកសវនការនេះគឺជាផ្សព្វផ្សាយនយោបាយការបរទេស។ សៀវភៅមួយដែលលាតត្រដាងភស្តុតាងបញ្ជាក់អំពីអ្វីដែលលោកបានសរសេរក្នុងទំព័រកាសែត នឹងត្រូវចេញលក់នៅថ្ងៃសុក្រនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ