ក្រោយភេរវកម្មនៅអង់ការ៉ា តួកគីប្រឈមមុខនឹងភាពប្រេះឆានយោបាយផ្ទៃក្នុង
តួកគីបានប្រកាសកាន់ទុក្ខថ្នាក់ជាតិរយៈពេលបីថ្ងៃ ចំពោះភេរវកម្មនៅក្រុងអង់ការ៉ា កាលពីថ្ងៃសៅរ៍។ ចំនួនមនុស្សស្លាប់ បានឡើងដល់ ៩៦នាក់ និងរបួសជាង២៤០នាក់ ! នេះបើតាមតុល្យការថ្មីបណ្តោះអាសន្នរបស់រដ្ឋាភិបាល។ ក្រៅអំពីសេចក្តីថ្លែងការណ៍ដ៏ប្រុងប្រយ័ត្ន អំពាវនាវឱ្យមានការរួបរួមគ្នា ប្រធានាធិបតីតួកគី ដែលធ្លាប់តែបានវោហា ហាក់បានដកខ្លួន មិនសូវចេញមុខមាត់យ៉ាងចម្លែកខុសពីសព្វមួយដង។ នៅថ្ងៃចន្ទនេះ បក្សប្រឆាំង និងអ្នកវិភាគជាច្រើន បានបង្កើនការចោទប្រកាន់លើលោក អែរដូហ្កាន់ ថាជាអ្នកទទួលខុសត្រូវលើភេរវកម្ម ដោយយកបញ្ហាសន្តិសុខមកធ្វើជាអាវុធ បង្កការភ័យខ្លាចដល់ប្រជាជន ដើម្បីយកចំណេញនយោបាយ ខណៈដែលការបោះឆ្នោតសភាថ្ងៃទី១វិច្ឆិកា កាន់តែខិតមកដល់។
ចុះផ្សាយនៅថ្ងៃ៖
ប្រធានាធិបតីតួកគី លោក អែរដូហ្កាន់ បានបរិហារអំពើភេរវកម្មនៅអង់ការ៉ា កាលពីថ្ងៃសៅរ៍នេះថា ជាទង្វើគួរឱ្យស្អប់ខ្ពើម សម្រាប់បំបែកបំបាក់ឯកភាពជាតិ និងសន្តិភាពតួកគី។ ចំណែកនាយករដ្ឋមន្ត្រីវិញ បានប្រកាសថា គេមានភស្តុតាងច្បាស់លាស់បញ្ជាក់ថាភេរវកម្មនេះបង្កឡើងដោយអត្តឃាតជនពីរនាក់។ ដោយគ្មានក្រុមណាចេញមុខប្រកាសទទួលស្គាល់ស្នាដៃភេរវកម្មរបស់ខ្លួន អាជ្ញាធរតួកគី បានសន្និដ្ឋាន ថាអាចជាទង្វើរបស់បីក្រុម ៖ បក្សពលករគួឌីស្តង់ (PKK) ស្និទ្ធនឹងគណបក្សប្រឆាំង ដែលរដ្ឋាភិបាលចាត់ទុកជាពួកឧទ្ទាមភេរវនិយម - គណបក្សបដិវត្តរំដោះប្រជាជន ដែលជាបក្សឆ្វេងនិយមជ្រុល និងចុងក្រោយដែលរដ្ឋាភិបាលសំលឹងជាអាទិភាពជាងគេ គឺ ពួកអង្គការរដ្ឋអ៊ីស្លាម។
ប៉ុន្តែសម្មតិកម្មរបស់អាជ្ញាធរនេះមិនសូវគួរជឿទេ។ អ្នកវិភាគនយោបាយ និងភូមិសាស្ត្រនយោបាយជាច្រើនយល់ថា ថ្វីបើពួកអង្គការរដ្ឋអ៊ីស្លាមអាចចេញធ្វើភេរវកម្មដោយគ្មានរើសមុខ រើសទីតាំងមែន តែតួកគីទំនងជាមិនទាន់ដល់ពេលត្រូវវាយប្រហារនៅឡើយទេ សម្រាប់ពួកជីហាតរដ្ឋអ៊ីស្លាម។ ពួកនេះបើបានធ្វើហើយ គឺមិនបង្អង់នឹងប្រកាសជោគជ័យទេ។ ការចោទប្រកាន់លើបក្សពលករគួឌីស្តង់ រឹតតែមិនគួរឱ្យសោះតែម្តង ព្រោះសកម្មភាពភេរវកម្មរបស់ក្រុមនេះ ធ្វើឡើងសំដៅតែលើក្រុមប៉ូលិស និងទាហានតួកគីតែប៉ុណ្ណោះ ស្ទើរពុំដែលមានសោះការវាយប្រហារប្រឆាំងនឹងជនស៊ីវិល កណ្តាលហ្វូងមនុស្ស។ ម្យ៉ាងវិញទៀត បាតុករដែលប្រមូលផ្តុំគ្នានៅអង់ការ៉ា និងដែលរងគ្រោះក្នុងភេរវកម្មកាលពីថ្ងៃសៅរ៍ គឺជាក្រុមសកម្មជនអ្នកគាំទ្របក្សប្រជាធិបតេយ្យ ដែលជាតំណាងស្របច្បាប់របស់ពួកឧទ្ទាមបក្សប៉េកាកា។
ក្រុមឆ្វេងនិយមជ្រុលដែលធ្លាប់ធ្វើភេរវកម្មតាំងពីទសវត្សឆ្នាំ១៩៧០មក ក៏គ្មាននិន្នាការប្រឆាំងនឹងជនស៊ីវិលដែរ។
អ្នកវិភាគជាច្រើន បែរជាបានលើកឡើងអំពីសេណារីយោទីបួន គឺមានក្រុមស្រមោលខុសច្បាប់ បង្កប់ខ្លួនក្នុងស្ថាប័នរដ្ឋ ក្នុងជួរទាហាន ឬប៉ូលិស ដែលអាចចេញធ្វើសកម្មភាពភេរវកម្ម ឬប្រតិបត្តិការផ្សេងៗដើម្បី បង្កអស្ថិរភាព ... ជាមធ្យោបាយសម្រាប់ពង្រឹងអំណាចក្នុងដៃស្រាប់។
បក្សប្រឆាំងបង្កើនការវាយប្រហារលើប្រធានាធិបតីតួកគី
ដោយហេតុថា គណបក្សកាន់អំណាច ធ្លាប់មានដៃប្រលាក់ឈាម ដូច្នេះហើយបានជាក្រុមអ្នកប្រឆាំង រាប់ទាំងគណបក្សប្រជាធិបតេយ្យគួឌីស្តង់ផង អាចធ្វើការរិះគន់និង ចោទប្រកាន់ខ្លាំងឡើងលើរដ្ឋាភិបាលបានយ៉ាងដូច្នេះ។ សម្រាប់បក្សប្រឆាំង ភេរវកម្មដែលកើតឡើងវាយប្រហារលើពួកគេកាលពីថ្ងៃសៅរ៍នេះ អាចជាបរាជ័យរបស់ភ្នាក់ងារសម្ងាត់ ដែលអសមត្ថភាពក្នុងការរក្សាសន្តិសុខសុវត្ថិភាពជូនប្រជាជនក្នុងពេលធ្វើបាតុកម្ម ឬជាកាន់តែធ្ងន់ធ្ងរជាងនេះទៅទៀត មកពីភ្នាក់ងារស៊ើបការណ៍ ផ្សំគំនិតជាមួយរដ្ឋាភិបាល ដើម្បីពន្យុះសំឡេងជាតិនិយមឱ្យឆាបឆេះឡើង នៅចំពោះស្ថានការណ៍អសន្តិសុខ។ ដោយការបាក់ស្បាត នយោបាយបំភ័យឱ្យពលរដ្ឋខ្លាចជួបគ្រោះអសន្តិសុខ ជាមធ្យោបាយមួយដែលរដ្ឋាភិបាល ចង់យកប្រើជាអាវុធ សម្រាប់រក្សាអំណាចឱ្យនៅជាប់ក្នុងដៃបន្តទៀត និងចំណេញទាំងនយោបាយការបរទេសទៀត ព្រោះសូមកុំភ្លេចថា តួកគីមានទីតាំងភូមិសាស្ត្រជាយុទ្ធសាស្ត្រ រវាងអឺរ៉ុប-អាស៊ី អឺរ៉ុប-ដើមបូព៌ា។ អឺរ៉ុបត្រូវការឃើញតួកគីមានស្ថិរភាព។
នៅសល់តែបីសប្តាហ៍ទៀតប៉ុណ្ណោះ តួកគីត្រូវរៀបចំការបោះឆ្នោតសភាជាថ្មី។ គឺជាការបោះឆ្នោតមុនកាលកំណត់ដ៏សំខាន់ ក្នុងការសម្រេចជោគវាសនាអនាគតរដ្ឋាភិបាលតួកគី។ ព្រោះកាលពីថ្ងៃទី ៧ មិថុនា ក្នុងសម័យបោះឆ្នោតជ្រើសរើសតំណាងរាស្ត្រ គណបក្សអភិរក្សរបស់លោក អែរដូហ្កាន់ ជាលើកទីមួយ ក្នុងប្រវត្តិកាន់អំណាចជាង១៣ឆ្នាំ មិនអាចដណ្តើមបានសំឡេងភាគច្រើនដាច់ខាត សម្រាប់បង្កើតរដ្ឋាភិបាលតែម្នាក់ឯងបាន។ នេះក៏ដោយសារការស្ទុះឡើងនៃគណបក្សប្រជាធិបតេយ្យគួឌីស្តង់។ បើតាមការស្ទង់មតិ ប្រសិនបើក្រុមគួដឌីស្តង់ បន្តនយោបាយសម្របសម្រួលគ្នា ក្រុមប៉េកាកា លែងធ្វើការវាយប្រហារទៀត នោះក្រុមអភិរក្សរបស់លោកប្រធានាធិបតីទំនងជានឹងត្រូវបន្តបាត់បង់សំឡេងនៅក្នុងសភាហើយ នៅថ្ងៃទី១វិច្ឆិកា។ ផ្ទុយទៅវិញ ថ្វីបើរដ្ឋាភិបាលរងការរិះគន់ខ្លាំងអំពីភាពកំខ្សោយផ្នែករក្សាសន្តិសុខមែន តែបើអំពើហិង្សានៅតែបន្តគំរាមកំហែង ចលនាឯកភាពជាតិ នឹងងាកទៅគាំទ្រគណបក្សកាន់អំណាច ដោយចៀសមិនបំផុត ដើម្បីពង្រឹងសន្តិសុខជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ