សម្តេចប៉ាបទៅក្រិកដើម្បីសម្តែងសាមគ្គីភាពជាមួយជនអន្តោប្រវេសន៍
សម្តេចប៉ាប ហ្វ្រង់ស័រ បាននិមន្តទៅដល់ កោះ Lesbos ប្រទេសក្រិកតាំងពីព្រលឹម នៅថ្ងៃសៅរ៍នេះ ដើម្បីសម្តែងសាមគ្គីធម៌ដល់ប្រជាពលរដ្ឋក្រិកផង ដើម្បីគាំទ្រលើកទឹកចិត្តដល់ជនអន្តោប្រវេសន៍ផង និងដើម្បីដាស់សតិស្មារតីអឺរ៉ុបផង។ ដំណើរទស្សនកិច្ចខ្លីនេះ បានធ្វើឱ្យគេនឹងឃើញសោកនាដកម្មនៅកោះឡំបេឌូសា Lampedusa កាលពីខែកក្កដា ២០១៣ ឆ្នាំដែលវិបត្តិអន្តោប្រវេសន៍ បានផ្តើមផ្ទុះឡើង មនុស្សទាំងទូកៗបានប្រថុយស្លាប់ក្នុងសមុទ្ទមេឌីទែរ៉ាណេ ព្រោះចង់ភៀសខ្លួនឆ្លងមកអឺរ៉ុប។ ប៉ុន្តែ តាំងពីពេលនោះមក វិបត្តិអន្តោប្រវេសន៍កាន់តែធ្ងន់ធ្ងរ ហើយអឺរ៉ុបកាន់តែប្រេះឆា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:០១
ដំណើរទស្សនកិច្ចរបស់សម្តេចប៉ាប នៅកោះក្រិក ឡេបូស មានរយៈពេលតែប្រមាណ៥ម៉ោងប៉ុណ្ណោះ ! ប៉ុន្តែមានអត្ថន័យបំផុត ព្រោះកោះឡេបូសបានរែកពន់បន្ទុកអន្តោប្រវេសន៍លើស្មា ជំនួសអឺរ៉ុបទាំងមូល ហើយចំពោះសម្តេចប៉ាប តាំងពីបានឡើងកាន់តំណែងជាសម្តេចសង្ឃកាតូលិក នៅឆ្នាំ២០១៣ មកបានចាត់ទុក បញ្ហា “អន្តោប្រវេសន៍ និងជនភៀសខ្លួន” ជាអាទិភាពសំខាន់មួយរបស់បូរីវ៉ាទីកង់។
សាមគ្គីភាពជាមួយជនភៀសខ្លួន
នៅថ្ងៃនេះ ក្រៅពីបានទទួលស្វាគមន៍ដោយនាយករដ្ឋមន្ត្រីក្រិក ដល់ព្រលានយន្តហោះ សម្តេចប៉ាប អមដំណើរដោយប្រមុខសង្ឃក្រិកអ័រតូដុកពីរអង្គ បានយាងនិងនិមន្តទៅជំរំជនភៀសខ្លួន Moria ដែលមានជនអន្តោប្រវេសន៍ប្រមាណ ៣ពាន់នាក់ ជ្រកកោន ក្នុងស្ថានភាពដ៏ត្រដាបត្រដួស និងក្នុងអារម្មណ៍ភ័យព្រួយអស់សង្ឃឹមបំផុត។ ស្របតាមកិច្ចព្រមព្រៀងអឺរ៉ុប-តួកគី ចូលជាធរមានកាលពីថ្ងៃទី ២០មីនា ជនអន្តោប្រវេសន៍ទាំងនេះ ត្រូវបញ្ជូនចេញទៅប្រទេសតួកគី ប្រសិនបើមិនបានទទួលសិទ្ធិជ្រកកោនពីក្រិក។
សម្រាប់សម្តេចប៉ាប ទស្សនកិច្ចថ្ងៃនេះខុសស្រឡះអំពីទស្សនកិច្ចផ្សេងៗទៀត ព្រោះមានបង្កប់ទៅដោយទុក្ខព្រួយខ្លាំង “យើងទៅជួបគ្រោះមហន្តរាយមនុស្សធម៌ដ៏ធ្ងន់ធ្ងរមួយមិនធ្លាប់មានគិតចាប់ពីសង្គ្រាមលោកលើកទីពីរ យើងទៅមើលមនុស្សរាប់ពាន់នាក់រងទុក្ខ ត្រូវរត់ភៀសខ្លួន គ្មានទិសដៅ ! យើងទៅមើលកន្លែងកប់ខ្មោច ជាសមុទ្ទ...
សម្តេចបាប និងប្រមុខសង្ឃក្រិកពីរអង្គ បានជួបពិភាក្សាជាមួយជនភៀសខ្លួន និងទទួលទានអាហារជាមួយពួកគេ៨នាក់ ក្នុងសាលធ្វើកុងទឺណឺ បន្ទាប់មកសម្តេចប៉ាបបានថ្លែងសុន្ទរកថា ព្រមទាំងសូត្រធម៌ឧទ្ទិសដល់ជនអន្តោប្រវេសន៍ដែលបាត់បង់ជីវិតព្រោះចង់ឆ្លងចូលសហភាពអឺរ៉ុប។ សម្តេចប៉ាបក៏បានទទួលយកជនភៀសខ្លួន១០នាក់ទៅបូរីវ៉ាទីកង់ ក្នុងនោះ៨នាក់ជាជនជាតិស៊ីរី។
សហភាពអឺរ៉ុប ព្រួយបារម្ភ នឹងការរិះគន់
អ្នកនាំពាក្យវ៉ាទីកង់ បានចេញសេចក្តីថ្លែងការណ៍បញ្ជាក់ថា ដំណើរទស្សនកិច្ចរបស់សម្តេចប៉ាប មានលក្ខណៈមនុស្សធម៌សុទ្ធសាធ និងធ្វើឡើងដើម្បីបុព្វហេតុការពារជនភៀសខ្លួន និងលើកទឹកចិត្តដល់វិហារកាតូលិកទាំងឡាយឱ្យទទួលយកជនភៀសខ្លួន។ ប៉ុន្តែវត្តមានរបស់សម្តេចប៉ាប នៅចំពោះមុខជនអន្តោប្រវេសន៍និងជនភៀសខ្លួន ក្នុងអតីតពន្ធនាគារ ដែលកែជាជំរំសម្រាប់ទទួលជនភៀសខ្លួន គឺជាដាស់សតិស្មារតីអឺរ៉ុប ឱ្យគិតគូរដល់តម្លៃសីលធម៌ដែលជាមូលដ្ឋានគ្រឹះរបស់សហភាពឡើងវិញ។ តម្លៃអឺរ៉ុបដែលធ្លាប់ជាដែនដីទទួលស្វាគមន៍ មានសាមគ្គីភាព តែពេលនេះសូម្បីតែក្នុងរង្វង់វិហារកាតូលិក ក៏ពិបាកផង។
កាយវិការរបស់សម្តេចប៉ាបនេះ ទោះចង់ឬមិនចង់ ត្រូវតែ មានទម្រង់ និងតម្លៃជានយោបាយ ដោយចៀសមិនផុត ដែលអាចរំខានដល់គ្រិស្តសានិកជនផង និងដល់វិហារកាតូលិកទាំងអស់របស់អឺរ៉ុបផង។ ជាពិសេសសម្រាប់វិហារនៅប៉ូឡូញ និងហុងគ្រី ដែលមើលឃើញវិបត្តិអន្តោប្រវេសន៍ថាជាបន្ទុកមួយដ៏ធ្ងន់ និងជាការគំរាមកំហែងយ៉ាងខ្លាំងសម្រាប់ប្រទេស។
សហភាពអឺរ៉ុបទាំងមូល បានសរសើរដំណើរទស្សនកិច្ចរបស់សម្តេចប៉ាប នៅកោះក្រិកនេះ ថាបានចូលរួមចំណែកជំរុញមតិសាធារណៈឱ្យទទួលជនភៀសខ្លួនមែន ប៉ុន្តែរដ្ឋាភិបាលប្រទេសជាសមាជិកនីមួយៗ មានការរអៀសចិត្តខ្លាំង ព្រោះខ្លាចសម្តេចប៉ាប ហ្វ្រង់ស័រ ល្បីខាងមានសង្ឃដីកាចំៗ ស្តីបន្ទោសត្រូវប្រទេសខ្លួន។ វ៉ាទីកង់ តាមរយៈប្រសាសន៍របស់ថ្នាក់ដឹកនាំជាន់ខ្ពស់ ជាប់រិះគន់ជាសាធារណៈរួចមកហើយ កិច្ចព្រមព្រៀងអឺរ៉ុបតួកគី ច្រានជនភៀសខ្លួនទៅនៅជំរំក្នុងប្រទេសតួកគី។
សាមគ្គីភាពកាតូលិកនិងអ័រតូដុក
ដំណើរទស្សនកិច្ចរបស់សម្តេចប៉ាប គ្រាន់តែជាការរំលឹកមេរៀន និងកាតព្វកិច្ច របស់មនុស្សជាតិ ដោយដាស់សតិអឺរ៉ុបដែលប្រេះឆា ដែលអសមត្ថភាពឱ្យភ្ញាក់ខ្លួនឡើងវិញ។ សម្តេចនិមន្តទៅឡេបូស មិនមែនដោយកាន់មកជាមួយនូវផែនទីចង្អុលផ្លូវដោះស្រាយវិបត្តិអន្តោប្រវេសន៍ឱ្យអឺរ៉ុបទេ។ ម្យ៉ាងទៀត នេះមិនមែនជាតួនាទីរបស់សម្តេចឡើយ។
តែនៅមានឥស្សរជនជាន់ខ្ពស់មកដូច្នេះ គេឃើញមានតែការបោសសម្អាត ចាប់ប្រមូលជនអន្តោប្រវេសន៍ អនាថា បញ្ចូលក្នុងមជ្ឈមណ្ឌល ឬបញ្ចូនទៅជំរំ។ ហើយបើតាមអង្គការមនុស្សធម៌នានានៅផ្ទាល់កន្លែង វត្តមានសម្តេចប៉ាប ជាឱកាសដែលជនភៀសខ្លួនជាប់ក្នុងមជ្ឈមណ្ឌលឃុំឃាំង បានទទួលការយកចិត្តទុកដាក់ និងមានលក្ខខណ្ឌជីវិតរស់នៅប្រសើរបានពីរបីថ្ងៃដែរ។
ក្រៅអំពីដើម្បីមនុស្សធម៌ និងសាមគ្គីភាព ទស្សនកិច្ចថ្ងៃនេះ ក៏ជាឱកាសមួយសម្រាប់បង្ហាញនូវបំណងដ៏សំខាន់មួយទៀត គឺសម្រួលការខិតចូលគ្នារវាងវិហារកាតូលិកនិងអ័រតូដុក។ វត្តមានរួមគ្នាទាំងបីអង្គនៅក្នុងជំរំជនភៀសខ្លួន និងការសូត្រធម៌រួមគ្នា សម្តេចប៉ាប និងប្រមុខសង្ឃអ័រតូដុកក្រិកពីរអង្គ ជាលទ្ធផលមួយគួរឱ្យពេញចិត្ត បញ្ជាក់អំពីភាពជិតបង្កើយនឹងគ្នាផង និងអំពីសាមគ្គីភាពផង។ សូមបញ្ជាក់ថា សម្តេច ហ្វ្រង់ស័រ ជាសម្តេចប៉ាប អង្គទីពីរដែលយាងមកក្រិក បន្ទាប់ពីសម្តេចប៉ាប ហ្សង់ប៉ូល ២ កាលពីឆ្នាំ២០០១។ សម្តេចប៉ាបហ្វ្រង់ស័រ ក៏បានជួបសម្តេចសង្ឃអ័រតូដុក ជាលើកទីមួយ ដែលកាលពីខែកុម្ភៈនៅគុយបា គិតចាប់ពីឆ្នាំ១០៥៤មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ