នរណាខ្លះអាចទាញផលចំណេញពីការប្រកួតបាល់ទាត់អឺរ៉ុបអឺរ៉ូ-២០១៦ ?
ចុះផ្សាយនៅថ្ងៃ៖
ស្តាប់ - ០៤:៤៧
នៅខែឧសភាឆ្នាំ២០១០ បារាំងបានជ្រើសរើសឱ្យធ្វើជាប្រទេសអ្នករៀបចំកម្មវិធីប្រកួតកីឡាបាល់ទាត់អឺរ៉ុប លើកទី១៥ ក្រោមក្តីអំណរនិងពេញចិត្តយ៉ាងខ្លាំង ព្រោះបារាំងយល់ថាព្រឹត្តិការណ៍កីឡាបែបនេះជាថ្នាំបំប៉នកម្លាំងសេដ្ឋកិច្ចជាតិដ៏ប្រពៃ។ ចុះក្នុងស្ថានភាពជាក់ស្តែង ដែលប្រទេសស្ថិតក្នុងការគំរាមកំហែងភេរវកម្មខ្ពស់ តើបារាំងនៅតែអាចទាញផងចំណេញបានទៀតឬ ? នរណាជាអ្នកទាញបានប្រយោជន៍ប្រាកដពីកីឡាបាល់ទាត់អឺរ៉ុបឆ្នាំ២០១៦នេះ ?
ការប្រកួតកីឡាបាល់ទាត់អឺរ៉ុប ឆ្នាំ២០១៦ ត្រូវចាប់ផ្តើមពីថ្ងៃទី ១០ មិថុនានេះ ដល់ថ្ងៃទី ១០ កក្កដា។ នេះជាលើកទីបីហើយដែលបារាំងបានធ្វើម្ចាស់ផ្ទះ ទទួលរៀបចំកម្មវិធីកីឡាថ្នាក់អឺរ៉ុប លើកទីមួយនៅឆ្នាំ១៩៦០ និងលើកទីពីរនៅឆ្នាំ១៩៨៤។ បារាំងបានទទួលរៀបចំកម្មវិធីច្រើនជាងគេ ហើយរីករាយនឹងទទួលបន្ទុកនេះ។ រៀបចំព្រឹត្តិការណ៍កីឡាខ្នាតអន្តរជាតិ ជាកម្មវិធីសប្បាយផង និងនាំចំណូលច្រើន មកបំប៉នកម្លាំងសេដ្ឋកិច្ចជាតិផង។ ប៉ុន្តែក្នុងបរិបទជាក់ស្តែង ជាពិសេសក្នុងខណៈដែលប្រទេសកំពុងរងការគំរាមកំហែងភេរវកម្ម តើនរណាជាអ្នកទាញប្រយោជន៍បានពិតប្រាកដពីបាល់ទាត់នេះ ?!
ដើម្បីអាចរៀបចំកម្មវិធីប្រកួតកីឡាបាល់ទាត់អឺរ៉ុបនេះបាន ជាបឋមបារាំងត្រូវបោះទុនវិនិយោគ ពោលគឺត្រូវចេញលុយពីហោប៉ៅ។ ការសាងសង់ឬជួលជុល កែលម្អពហុកីឡាដ្ឋាន-ស្តាត ចំនួន១០កន្លែងនៅទូទាំងប្រទេសបារាំង ត្រូវចំណាយថវិកាប្រមាណ១៧០០លានអឺរ៉ូ ដែលបានមកពីការប្រដាក់ទុនវិនិយោគឯកជន (៦២%) និងជាថវិការដ្ឋ ៣៨% ស្មើនឹងប្រមាណ៦៤០លានអឺរ៉ូ។ បន្ថែមលើនេះរដ្ឋត្រូវ ៤០០លានសម្រាប់មធ្យោបាយដឹកជញ្ជូនសាធារណៈ ក្នុងក្រុងនិងទៅពហុកីឡាដ្ឋាន។
នេះជាតម្លៃប៉ាន់ស្មានចំណាយអប្បបរិមា។ ប៉ុន្តែការការពារសុវត្ថិភាពនិងសន្តិសុខក្នុងអំឡុងពេលប្រកួត អាចនឹងកើនឡើងខ្ពស់ជាងការគ្រោងទុកឆ្ងាយណាស់ ដោយហេតុតែមានការគំរាមកំហែងភេរវកម្មនៅក្នុងប្រទេស។ អាជ្ញាធរបារាំងបានបង្កើនមធ្យោបាយជាអតិបរិមា ដើម្បីការពារតាមពហុកីឡាដ្ឋាន និងតាមទីកន្លែងប្រមូលផ្តុំអ្នកស្នេហាបាល់ទាត់។
ជាចុងក្រោយ បារាំងមានកាតព្វកិច្ច មិនយកពន្ធពីក្រុមហ៊ុនអ្នករៀបចំកម្មវិធីកីឡានេះ ព្រោះជាលក្ខខណ្ឌដែលបានព្រមព្រៀងគ្នារួចមកហើយជាមួយសហព័ន្ធបាល់ទាត់អឺរ៉ុប UEFA។ ពន្ធមានទំហំដល់ទៅ៣៨លានអឺរ៉ូ នេះបើតាមនាយករៀបចំកម្មវិធី តែប្រភពផ្សេងប៉ាន់ស្មានមានតម្លៃដល់ពី១៥០ទៅ២០០លានអឺរូ ដែលបារាំងបានត្រឹមសំឡឹងស្រក់ទឹកមាត់ និងមិនអាចប្រមូលចូលហិបរដ្ឋបានទេ។
ជាសរុប ដើម្បីអាចទទួលស្វាគមន៍ និងចាត់ចែងរៀបចំកម្មវិធីប្រកួតកីឡាបាល់ទាត់អឺរ៉ុបឆ្នាំ២០១៦នេះ រដ្ឋបារាំងត្រូវចំណាយថវិកាសាធារណៈអស់ប្រមាណពី១ពាន់ ទៅ១ពាន់លានកន្លះអឺរ៉ូ។ នេះជាចំណាយ ! ចុះចំណូល?
អ្នកដែលប្រាកដ និងចាំតែទទួលផល គឺសហភាពសហព័ន្ធបាល់ទាត់អឺរ៉ុប ដែលជារៀងរាល់បួនឆ្នាំម្តង ចាត់ចែងការប្រកួតបាល់ទាត់ និងប្រមូលប្រាក់ចំណូល។ កាលពីឆ្នាំ២០១២ កម្មវិធីរៀបចំធ្វើនៅអ៊ុយក្រែននិងប៉ូឡូញ ប្រមូលប្រាក់ស្មើនឹងប្រាក់ចំណូលនៃការរៀបចំបាល់ទាត់ទាំងអស់ផ្សេងៗទៀតពេញមួយឆ្នាំ និងបានចំណេញប្រមាណ៤២%។ អឺរ៉ូ២០១៦នៅបារាំង អាចនឹងមានចំណូលខ្លាំងជាងទៅទៀត។
ចំពោះប្រទេសបារាំងផ្ទាល់ ក៏នឹងអាចទាញផលប្រយោជន៍សេដ្ឋកិច្ចបានពីព្រឹត្តិការណ៍កីឡានេះដែរ។ បើតាមការសិក្សា សេដ្ឋកិច្ចនឹងត្រូវបំប៉ោងបាន១២០០លានអឺរ៉ូ ដែលបានមកពីការចាយវាយរបស់ទស្សនិកជន តាមរយៈការទិញសំបុត្រចូលទស្សនា ការជួលសណ្ឋាគារ និងការចូលភោជ្ជនីដ្ឋាន។ បើមានលុយចូលច្រើន នោះបារាំងក៏នឹងទទួលបានពន្ធលើតម្លៃបន្ថែមច្រើនដែរ។
បន្ទាប់មក គឺទីផ្សារការងារ។ បើតាមការសិក្សាដដែល បង្ហាញថា ព្រឹត្តិការណ៍ប្រកួតកីឡានេះ ផ្តល់ការងារ ផ្ទាល់ដល់មនុស្សជាង៩៤០០០នាក់ និង២ម៉ឺនការងារក្នុងវិស័យសំណង់ ជួលជុលពហុកីឡាដ្ឋាន ពោលគឺស្មើនឹងបង្កើតការងារបាន២៦០០០ការងារពេញម៉ោង ក្នុងមួយឆ្នាំ។
ប៉ុន្តែបញ្ហានៅត្រង់ថា រាល់ការសិក្សា និងអង្កេតអំពីផលវិជ្ជមាននៃការរៀបចំប្រកួតកីឡាលើសេដ្ឋកិច្ចធ្វើឡើងនៅពេលមុនបារាំងជួបហេតុការណ៍ភេរវកម្ម។ ភេរវកម្មកណ្តាលក្រុងប៉ារីស និងនៅពហុកីឡាដ្ឋានជាតិ កាលពីខែវិច្ឆិកា ២០១៥ ដែលបានផ្តាច់ជីវិតមនុស្សអស់១៣០នាក់ បានបន្ទុចបង្អាក់សកម្មភាពទេសចរណ៍បារាំងស្ទើរតែគាំងស្តូកស្តឹងទៅហើយ។
បារាំងរំពឹងថា នឹងមានមនុស្សម្នាជាង២លាននាក់កន្លះនឹងចូលរួមទស្សនាបាល់ទាត់ ប៉ុន្តែជាមួយនឹងការព្រមានភេរវកម្មគ្រប់មាត់ តើទស្សនិកជនទាំងអស់នឹងមកជួបតាមការណាត់ដែរឬអត់?
ការសិក្សារបស់អាមេរិកបានសង្កេតឃើញថា ជាទូទៅ ប្រទេសជាម្ចាស់ផ្ទះច្រើនតែសង្ឃឹមជ្រុលថានឹងអាចទាញផលប្រយោជន៍សេដ្ឋកិច្ចពីទេសចរ ក្នុងពេលប្រកួតកីឡា ហើយច្រើនតែមើលស្រាលការចំណាយ ជាពិសេសតម្លៃជួសជុល-សាងសង់ពហុកីឡាដ្ឋាន ជាដើម។ កំណើនសេដ្ឋកិច្ចពិត ប្រសិនមាន គឺដោយសារតែការចាយវាយរបស់ពលរដ្ឋក្នុងស្រុកតែប៉ុណ្ណោះ ដែលឆ្លៀតចំណាយទិញរបស់របរប្រើប្រាស់ដូចជាវិទ្យុទូរទស្សន៍ថ្មី ដើម្បីតាមដានការប្រកួតបាល់ទាត់។ ហើយពីរបីខែក្រោយ ការបំប៉ោងព្រឹត្តិការណ៍បាល់ទាត់ នឹងត្រូវស្ពត ដូចប៉េងប៉ោងអស់ខ្យល់យ៉ាងដូច្នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ