អង់គ្លេសព្រមានបារាំងពីគ្រោះភេរវកម្មក្នុងពេលប្រកួតកីឡាបាល់ទាត់អឺរ៉ុប
វិបត្តិសង្គមអូសបន្លាយ បាតុកម្មហិង្សាប្រឆាំងច្បាប់ការងារ គម្រោងបាតុកម្មរបស់ក្រុមបុគ្គលិកអយស្ម័យយាន ការគំរាមកំហែងភេរវកម្មខ្ពស់... បារាំងមានគ្រប់រសជាតិ ! បារាំងស្ថិតក្រោមសម្ពាធជាងពេលណាៗទាំងអស់ នាអំឡុងពេលធ្វើម្ចាស់ផ្ទះរៀបចំបាល់ទាត់អឺរ៉ុប Euro-2016។ ស្តាត ទីប្រជុំអ្នកស្នេហាបាល់ទាត់ កន្លែងផ្សាយបន្តផ្ទាល់ការប្រកួតបាល់ទាត់ សុទ្ធសឹងជាចំណុចដៅវាយប្រហារភេរវកម្មទាំងអស់។ នេះបើតាមក្រសួងការបរទេសអង់គ្លេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
សហរដ្ឋអាមេរិក ធ្លាប់បានសេចក្តីព្រមានបែបនេះរួចមកហើយ កាលពីសប្តាហ៍មុន ! ដូច្នេះសារព្រមានជាថ្មីរបស់អង់គ្លេស នៅថ្ងៃនេះ គឺរឹតតែឆ្លុះបញ្ចាំងឱ្យឃើញថា អារម្មណ៍ព្រួយបារម្ភ កំពុងគ្របដណ្តប់ខ្លាំងនៅបារាំង ក្នុងអំឡុងពេលរៀបចំកម្មវិធីប្រកួតកីឡាបាល់ទាត់អឺរ៉ុប ដែលត្រូវចាប់បើកពីថ្ងៃទី សុក្រទី១០មិថុនាដល់ថ្ងៃទី ១០កក្កដា ២០១៦។
“ក្នុងអំឡុងពេលប្រកួតកីឡាបាល់ទាត់អឺរ៉ូ Euro-2016 ស្តាត កន្លែងជួបជុំអ្នកចូលចិត្តបាល់ទាត់ Fan zones កន្លែងបញ្ចាំងបាល់ទាត់លើផ្ទាំងសំពត់សយក្ស មធ្យោបាយដឹកជញ្ជូនសាធារណៈ ... សុទ្ធតែជាផ្ទាំងស្ទីបនៃការវាយប្រហារភេរវកម្ម” នេះជាសារដែលមានចុះផ្សាយនៅក្នុងទំព័រវិបសៃត៍ក្រសួងការបរទេសអង់គ្លេស។
អង់គ្លេសបានអំពាវនាវឱ្យពលរដ្ឋខ្លួនទាំងអស់ រក្សាការប្រុងប្រយ័ត្នខ្ពស់ នៅពេលធ្វើដំណើរទៅបារាំង ប៉ុន្តែការិយាល័យការបរទេសអង់គ្លេសបានទទួលស្គាល់ថាគ្មានព័ត៌មានលម្អិតច្បាស់លាស់ទាក់ទងនឹងគម្រោងធ្វើភេរវកម្មប្រឆាំងបារាំងទេ។
សេចក្តីណែនាំរបស់អង់គ្លេសថ្ងៃនេះ មិនមែនជាវិធានការឆ្លើយតបទៅនឹងការគំរាមកំហែងភេរវកម្មច្បាស់លាស់ណាមួយ ឬការគំរាមកំហែងភេរវកម្មថ្មី ឬការចាប់ខ្លួនភេរវជននៅអ៊ុយក្រែនម្សិលមិញឡើយ។ នេះបើតាមការអះអាងរបស់អ្នកនាំពាក្យក្រសួងការបរទេសអង់គ្លេស ដែលបានពន្យល់បំភ្លឺថា ការគំរាមកំហែងភេរវកម្មនៅបារាំងមានកំរិតខ្ពស់ស្រាប់ មកពីបារាំងបានចេញធ្វើប្រតិបត្តិការប្រឆាំងពួកអង្គការរដ្ឋអ៊ីស្លាម។ ទន្ទឹមនឹងការណែនាំ រដ្ឋាភិបាលអង់គ្លេសក៏បានដាក់ពង្រាយកម្លាំងប៉ូលិស នៅតាមរថភ្លើងដែលរត់ភ្ជាប់ពីបារាំងទៅអង់គ្លេស និងនៅតាមព្រំដែនអង់គ្លេស ក្នុងពេលប្រកួតកីឡាបាល់ទាត់អឺរ៉ុបនេះ។
ការប្រកួតកីឡាបាល់ទាត់ ដែលជាព្រឹត្តិការណ៍ដ៏អធឹកអធមមួយ និងអាជ្ញាធរសង្ឃឹមរង់ចាំទទួលភ្ញៀវចូលទស្សនាដល់ទៅ៨លាននាក់ ក្នុងនោះ២លាននាក់ជាបរទេស។ ក្នុងចំណោមសំបុត្រចូលទស្សនាលក់ដាច់អស់២,៥លានសន្លឹក ១លានកន្លះត្រូវទិញដោយបរទេស។ កាលពីថ្ងៃអាទិត្យប្រធានាធិបតីបារាំងផ្ទាល់ក៏បានទទួលស្គាល់ថាពិតជាមានការគំរាមកំហែងភេរវកម្មមែន ! ជាការគំរាមកំហែងខ្ពស់មិនធ្លាប់ឡើយក្នុងប្រវត្តិរៀបចំកម្មវិធីកីឡាពិភពលោកកន្លងមក។ នេះជាបញ្ជាក់បន្ថែមរបស់ភ្នាក់ងារប្រយុទ្ធប្រឆាំងភេរវកម្មអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ