ប៉ារីស៖៣ថ្ងៃមុនបើកការប្រកួតបាល់ទាត់Euro គ្រប់គ្នានៅតែបារម្ភពីបញ្ហាបាតុកម្ម
នៅប្រមាណតែ៣ថ្ងៃទៀតប៉ុណ្ណោះ ការប្រកួតកីឡាបាល់ទាត់ Euro នឹងត្រូវចាប់ផ្តើមបើក នៅក្នុងទីក្រុងប៉ារីស ប្រទេសបារាំង។ ក៏ប៉ុន្តែស្ថានភាពក្នុងប្រទេសបារាំង ជាពិសេសក្នុងទីក្រុងប៉ារីសតែម្តង កំពុងតែធ្វើឲ្យគេមានការព្រួយបារម្ភជាខ្លាំង ដោយសារតែបាតុកម្មតវ៉ានានា នៅតែមានសន្ទុះខ្លាំងដដែល។ ក្រុមសហជីពបុគ្គលិកផ្លូវដែក នៅតែបន្តធ្វើពហិកា មិនទទួលយកកិច្ចព្រមព្រៀងរួម ជាមួយរដ្ឋាភិបាល។ បាតុកម្មនេះ កំពុងធ្វើឲ្យសេវាដឹកជញ្ជូនតាមរថភ្លើងទូទាំងប្រទេស ជួបការកកស្ទះមិនដំណើរការ ហើយវានឹងអាចប៉ះពាល់ទៅដល់ការធ្វើដំណើរ របស់អ្នកមកចូលរួមមើលការប្រកួតបាល់ទាត់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ស្របពេលដែលទីក្រុងប៉ារីស និងតំបន់មួយចំនួននៅជុំវិញ បាននឹងកំពុងតែជួបគ្រោះទឹកជំនន់ ក្រុមសហជីពនយោជិតរបស់ក្រុមហ៊ុនជាតិដឹកជញ្ជូនតាមផ្លូវដែក ហៅកាត់ថា SNCF បានបន្តធ្វើបាតុកម្មតវ៉ាឥតឈប់ឈរ។ ចរាចរណ៍រថភ្លើង រឺមេត្រូ ត្រូវបានកាត់ផ្តាច់មួយផ្នែកដោយសារទឹកជំនន់ទៅហើយ ប៉ុន្តែត្រូវបូកបន្ថែមជាមួយនឹងបាតុកម្មមិនចូលធ្វើការរបស់បុគ្គលិកមួយភាគធំទៀត។
កាលពីល្ងាចថ្ងៃចន្ទម្សិលមិញ លោកប្រធានាធិបតីបារាំង បានអំពាវនាវថា ល្មមដល់ពេលដែលបាតុកម្មទាំងនេះ ត្រូវបិទបញ្ចប់ហើយ។ បាតុករ គួរគិតអាណិតអាសូរ ដល់អ្នកធ្វើដំណើរទាំងអស់ ដែលត្រូវចំណាយពេលរាប់ម៉ោង ដើម្បីទៅធ្វើការ ដោយសារតែគ្មានរថភ្លើងជិះ ហើយមួយវិញទៀត វាគឺជាការសាមគ្គីគ្នា ក្នុងពេលដែលប្រទេសជួបគ្រោះទឹកជំនន់។
សូមបញ្ជាក់ថា ក្រុមសហជីពផ្លូវដែករបស់បារាំង បានបន្តធ្វើយុទ្ធនាការធ្វើបាតុកម្មទូទាំងប្រទេស ដើម្បីជាការប្រឆាំងទៅនឹងគម្រោងកិច្ចព្រមព្រៀងរួម ដែលក្រុមហ៊ុនជាតិផ្លូវដែកបានដាក់ចុះ។ ថ្ងៃកំណត់ចុងក្រោយនៃការចុះហត្ថលេខារបស់ក្រុមសហជីព គឺនឹងត្រូវផុត នៅល្ងាចថ្ងៃពុធស្អែក ក៏ប៉ុន្តែក្រុមសហជីពនៅតែទាមទារ ឲ្យបើកការចរចាជាថ្មី លើខ្លឹមសារនៃកិច្ចព្រមព្រៀង។
បាតុកម្មដែលធ្វើឲ្យរាំងស្ទះដល់សេវាដឹកជញ្ជូនសាធារណៈ មិនត្រឹមតែបង្ករការមួម៉ៅក្តៅក្រហាយដល់ប្រជាពលរដ្ឋទូទៅទេ តែវាកំពុងតែធ្វើឲ្យមានការព្រួយបារម្ភខ្លាំង ដល់ការប្រកួតកីឡាបាល់ទាត់ពានរង្វាន់អឺរ៉ុប ដែលនឹងត្រូវចាប់ផ្តើមបើក ក្នុងពេល៣ថ្ងៃខាងមុខនេះ។ មិនត្រឹមតែប៉ុណ្ណោះ ក្រុមសហជីពអ្នកបើកយន្តហោះ ក៏ទើបតែបានដាក់សេចក្តីជូនដំណឹងថា ពួកគេនឹងធ្វើបាតុកម្មដែរ ចាប់ពីថ្ងៃសៅរ៍ទៅ រហូតដល់ថ្ងៃអង្គារសប្តាហ៍ក្រោយ។ ដោយឡែកក្នុងចំណោមរោងចក្រចម្រាញ់ប្រេងឥន្ធនៈទាំង៨ នៅបារាំង មានតែ៤ប៉ុណ្ណោះ ដែលបានវិលត្រលប់មកធ្វើការដូចប្រក្រតីវិញ។ បន្ថែមពីនេះទៀត សហជីពពលករធ្វើការប្រមូលសម្រាមនៅតំបន់ក្រុងប៉ារីស ក៏បន្តធ្វើបាតុកម្មផងដែរ។
ប្រឈមមុខនឹងការតវ៉ា បាតុកម្មប្រឆាំងស្ទើរគ្រប់ច្រកល្ហក រដ្ឋាភិបាលបារាំងហាក់កំពុងតែទ័លច្រកដោះស្រាយមិនបាន។ យ៉ាងណាមិញ យោងតាមការស្ទាបស្ទង់មតិទូទៅ ប្រជាពលរដ្ឋបារាំងប្រមាណជា៥៤% បានសំដែងការមិនយល់ស្រប ក្នុងការបន្តធ្វើបាតុកម្មតទៅទៀត មិនថាបាតុកម្មរបស់សហជីពផ្លូវដែក រឺបាតុកម្មប្រឆាំងនឹងគម្រោងច្បាប់ការងារថ្មីទេ។ យ៉ាងណាក៏ដោយ ក្រុមសហជីពជាច្រើនវិស័យ បានអំពាវនាវធ្វើបាតុកម្មធំទូទាំងប្រទេស នៅថ្ងៃទី១៤ មិថុនាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ