លោកចន ឃ៊ែរីបានដំឡើងសម្លេងខ្លាំងៗដាក់រុស្ស៊ីក្នុងសំណុំរឿងស៊ីរី
នៅថ្ងៃពុធ ទី១៥ មិថុនា លោកប្រមុខការទូតអាមេរិកចន ឃែរីបានចេញមុខព្រមានរុស្ស៊ីត្រង់ៗទាក់ទងនឹងវិបត្តិនយោបាយអូសបន្លាយនៅស៊ីរី។ នៅក្នុងជំនួបជាមួយសមភាគីអ៊ីរ៉ង់លោកម៉ូហាម៉ាដ យ៉ាវ៉ា ហ្សារីស្វក្នុងទីក្រុងអូស្លូ ប្រទេសន័រវែស លោកឃែរីបានបញ្ជូនសារប្រាប់រុស្ស៊ីថា ភាពអត់ធ្មត់របស់អាមេរិកមានកម្រិតស្តីពីជោគវាសនារបស់លោកប្រធានាធិបតីស៊ីរីអាសាដ។
ចុះផ្សាយនៅថ្ងៃ៖ កែប្រែថ្ងៃទី៖
« រស្ស៊ីត្រូវតែយល់ឲ្យបានច្បាស់ថា ភាពអត់ធ្មត់របស់អាមេរិកមិនមែនគ្មានទីបញ្ចប់ទេ ហើយវានឹងមានកម្រិតកាន់តែខ្លាំងថែមទៀតទាក់ទងនឹងសំណួរដែលថា តើប្រធានាធិបតីស៊ីរីអាសាដត្រូវ ឬមិនត្រូវចូលខ្លួនឆ្លើយបំភ្លឺនឹងទង្វើរបស់ខ្លួន » នេះជាសាររបស់លោកប្រមុខការទូតអាមេរិកចន ឃែរីថ្លែងទៅកាន់ប្រទេសរុស្ស៊ី។ សូមជម្រាបជូនថា អាមេរិក និងរុស្ស៊ីជាប្រទេសដែលបានផ្តួចផ្តើមឲ្យមានបទឈប់បាញ់នៅស៊ីរីដើម្បីបើកផ្លូវឲ្យមានកិច្ចចរចារវាងភាគីរដ្ឋាភិបាល និងភាគីប្រឆាំងដែលរៀបចំឡើងដោយសហគមន៍អន្តរជាតិ។
ក៏ប៉ុន្តែ អាមេរិក និងរុស្ស៊ីនៅបន្តនិយាយមិនចុះសម្រុងគ្នាទាក់ទងនឹងជោគវាសនារបស់លោកប្រធានាធិបតីស៊ីរីអាសាដ។ សម្រាប់ក្រុងវ៉ាស៊ីនតោន អាសាដត្រូវតែចុះចេញពីអំណាចដោយខានមិនបាន តែសម្រាប់ក្រុងមូស្គូវិញបានយល់ឃើញថា ជោគវាសនាលោកអាសាដត្រូវតែទុកឲ្យពលរដ្ឋស៊ីរីជាអ្នកសម្រេច។ ក្រៅពីចង់ហៅលោកអាសាដឲ្យចូលខ្លួនបកស្រាយលើទង្វើមួយចំនួន លោកឃែរីក៏បានបង្ហើបឲ្យដឹងពីបំណងហៅក្រុមប្រឆាំងស៊ីរីខ្លះឲ្យបំភ្លឺលើទង្វើរំលោភបំពានមួយចំនួន ពិសេសរំលោភលើបទឈប់បាញ់។
នៅដើមខែមិថុនាកន្លងទៅ លោកអាសាដបានសន្យាដណ្តើមយកដែនដីមួយសង់ទីម៉ែត្រម្តងៗពីពួកប្រឆាំង។ តែទង្វើរបៀបនេះត្រូវបានលោកប្រមុខការទូតអាមេរិកចាត់ទុកជាទង្វើរំលោភបទឈប់បាញ់។ សម្រាប់លោកឃែរី បទឈប់បាញ់កំពុងទទួលការគំរាមកំហែងយ៉ាងខ្លាំង និងដែលគេត្រូវស្វែងរកបទឈប់បាញ់មួយពិតប្រាកដ។ នៅក្នុងន័យនេះ លោកឃែរីបានប្រាប់ឲ្យដឹងពីការស្វែងរកកិច្ចព្រមព្រៀងមួយដើម្បីធានាឲ្យមានការគោរពត្រឹមត្រូវលើបទឈប់បាញ់នោះ។
សម្រាប់លោកឃែរី មានតែការគោរពបទឈប់បាញ់ឲ្យបានត្រឹមត្រូវទេទើបគេអាចដឹកនាំជំនួយមនុស្សធម៌ទៅឲ្យជនស៊ីវិលស៊ីរីរងគ្រោះដោយសារសង្រ្គាមបាន ពិសេសអ្នករស់នៅតំបន់ដាច់ស្រយាល និងដែលកំពុងស្ថិតក្រោមគ្រាប់រំសេវរវាងទ័ពរដ្ឋាភិបាល និងពួកប្រឆាំង។ សូមរម្លឹកជូនថា ស៊ីរីបានធ្លាក់ក្នុងសង្រ្គាមស៊ីវិលតាំងជាង ៥ឆ្នាំ និងបានបណ្តាលឲ្យមានមនុស្សស្លាប់ជាង ២៨ម៉ឺននាក់។ កិច្ចចរចាចំនួន ៣ដងបន្តបន្ទាប់រៀបចំដោយអង្គការសហប្រជាជាតិនៅតែមិនគ្មានដំណោះស្រាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ