ប្រមុខការទូតអាមេរិក ចន ឃែររី បរិហាររុស្ស៊ីថា បង្កើនជំនួយដល់រដ្ឋាភិបាលស៊ីរី
នៅថ្ងៃព្រហស្បតិ៍នេះ ប្រមុខការទូតអាមេរិក ចន ឃែររី បានចោទប្រទេសរុស្ស៊ី ថាបានបង្កើនជំនួយខ្លួន ជួយដល់រដ្ឋាភិបាលស៊ីរីដឹកនាំដោយលោកអាសាដ។ ទន្ទឹមនេះដែរ លោកឃែររីបានគូសបញ្ជាក់ឡើងវិញដែរថា រដ្ឋាភិបាលអាមេរិកញញើតរួញរាក្នុងការចូលរួមជម្លោះយោធា ដើម្បីជួយជ្រោមជ្រែងក្រុមឧទ្ទាមដែលប្រយុទ្ធជាមួយកងទ័ពលោកអាសាដ នៅស៊ីរីនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
នៅថ្ងៃព្រហស្បតិ៍នេះ ក្នុងកិច្ចសម្ភាសន៍ជាមួយទូរទស្សន៍អាមេរិក MSNBC លោក ចន ឃែររី ប្រមុខការទូតអាមេរិក បានចោទរដ្ឋាភិបាលរុស្ស៊ីថា បានបង្កើនជំនួយជួយរដ្ឋាភិបាលស៊ីរី។ ប្រមុខការទូតអាមេរិកបានលើកឡើងថា លោកគិតថា ការដែលរុស្ស៊ីបង្កើនជំនួយជួយប្រធានាធិបតីអាសាដនោះ គ្មានលក្ខណៈអ្វីស្ថាបនាទេ ចំពោះការខំប្រឹងប្រែងដែលធ្វើកន្លងមក ដើម្បីអោយលោកអាសាដប្តូរគំនិត និងសម្រេចចិត្តចូលរួមចរចាពីវិបត្តិស៊ីរីដោយសុទ្ធចិត្តនោះ។ លោកឃែររីប្រហែលនឹងជួបប្រមុខការទូតរុស្ស៊ី ស៊ែរហ្កី ឡាវ្រ៉ូវ នៅក្រុងរ៉ូម ថ្ងៃ៦មីនាខាងមុខ។
ក្នុងកិច្ចសម្ភាសន៍ជាមួយទូរទស្សន៍អាមេរិក លោកឃែររីបានឆ្លៀតសំពងរដ្ឋាភិបាលស៊ីរីជាថ្មីផងដែរ ដោយចោទថា អ្វីដែលរដ្ឋអំណាចស៊ីរីធ្វើនោះ គឺជាភាពអាម៉ាស មិនអាចទទួលយកបាន គឺជាអ្វីដែលគេមិនបានគិតដល់។ ហើយអ្នកណាៗ ក៏បានដឹងរឿងនេះដែរ។ រដ្ឋាភិបាលស៊ីរីក៏ត្រូវបានអាមេរិកចោទប្រកាន់ដែរថា បានចាប់ខ្លួនសមាជិកគ្រួសាររបស់ក្រុមប្រឆាំងជាច្រើនរូប ដែលបានចូលរួមចរចាពីវិបត្តិស៊ីរី នៅក្រុងហ្សឺណែវ។ ហើយអាមេរិកបានទាមទារអោយក្រុងដាម៉ាសដោះលែងពួកគេជាបន្ទាន់ ដោយគ្មានលក្ខខណ្ឌអ្វីទាំងអស់។
ដោយឡែក ថ្វីបើក្រុងវ៉ាស៊ីនតោនបានគាំទ្រក្រុមឧទ្ទាមស៊ីរី ដែលកំពុងប្រយុទ្ធជាមួយកងទ័ពស៊ីរីក្តី ប្រមុខការទូតអាមេរិក បានបញ្ជាក់ឡើងវិញថា រដ្ឋាភិបាលអាមេរិកញញើតនឹងចូលរួមក្នុងជម្លោះយោធា ដើម្បីជ្រោមជ្រែងក្រុមឧទ្ទាមស៊ីរី។ អាមេរិកផ្តល់អាទិភាពផ្នែកការទូត ដើម្បីចូលរួមដោះស្រាយវិបត្តិស៊ីរី។ ប៉ុន្តែ កាលពីថ្ងៃ១៥កុម្ភៈ កិច្ចចរចារវាងរដ្ឋាភិបាលលោកអាសាដ និងក្រុមប្រឆាំងនៅក្រុងហ្សឺណែវ បានជួបបរាជ័យ។ គេនៅមិនទាន់ដឹងពីពេលវេលាថ្មីនៃការចរចានៅឡើយទេ។
ដោយឡែក លោកឃែររីប្រាប់ថា ប្រធានាធិបតីអូបាម៉ាតែងពិនិត្យជាប្រចាំ នូវជម្រើសនានាដែលអាមេរិកមានក្នុងដៃ។ ទាក់ទងនឹងការដែលសភាអាមេរិកដាក់សម្ពាធអោយរដ្ឋាភិបាលធ្វើអន្តរាគមន៍យោធានៅស៊ីរីនោះ លោកឃែររីបញ្ជាក់ឡើងវិញថា រឿងនេះមានព្រំដែនកំណត់។ គេអាចធ្វើអន្តរាគមន៍យោធាបាន លុះត្រាតែគេត្រូវការពារខ្លួន រឺក៏មានសេចក្តីសម្រេចពីអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ