ស៊ីរីឈប់បាញ់គ្នាជាលើកទីមួយ តាំងពីផ្ទុះសង្គ្រាមអស់៥ឆ្នាំ
ទើបតែនៅសៅរ៍នេះទេ ដែលស៊ីរី បានស្គាល់រសជាតិជាលើកទីមួយ គិតតាំងពី៥ឆ្នាំនៃសង្គ្រាមស៊ីវិលមក ពាក្យថាឈប់បាញ់ ក្នុងទ្រង់ទ្រាយធំ។ ពលរដ្ឋរស់នៅក្រុងដាម៉ាស បានស្គាល់ភាពស្ងប់ស្ងាត់គ្មានស្នូរកាំភ្លើង។ ហើយមួយម៉ោងមុនបទឈប់បាញ់ចូលជាធរមាន ក្រុមប្រឹក្សាសន្តិសុខអង្គការសហប្រជាជាតិបានអនុម័តសេចក្តីសម្រេចចិត្តមួយ គាំទ្រកិច្ចព្រមព្រៀងអាមេរិក-រុស្ស៊ី បញ្ចប់ការវាយប្រហារគ្នា និងបង្ខំឱ្យគ្រប់ភាគីពាក់ព័ន្ធគោរពឱ្យបានការឈប់បាញ់។ ឆ្លៀតឱកាសដ៏ល្អនេះ អន្តរការីអង្គការសហប្រជាជាតិទទួលបន្ទុកដោះស្រាយវិបត្តិស៊ីរី បានបង្ហាញឆន្ទៈចង់កោះហៅភាគីបក្ខបក្សនៅស៊ីរី ចូលតុចរចា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:០៩
បទឈប់បាញ់ដែលជាផ្លែផ្កានៃកិច្ចព្រមព្រៀងអាមេរិក-រុស្ស៊ី បានចូលជាធរមានហើយ។ នៅថ្ងៃនេះប្រជាជនស៊ីរី បានស្គាល់ភាពស្ងប់ស្ងាត់ ជាលើកទីមួយ គិតចាប់តាំងពីសង្គ្រាមនៅស៊ីរី បានផ្ទុះឡើង។
ជាទូទៅ រាល់ការប្រយុទ្ធគ្នាត្រូវបានបញ្ឈប់ទាំងស្រុង គ្មានឮសំឡេងកាំភ្លើងធំ កាំភ្លើងរ៉ុកកែតពហុកាណុង ឬកាំភ្លើងតូចធំទេ នៅពេលកំណត់បទឈប់បាញ់ចូលមកដល់ នៅវេលាម៉ោងសូន្យថ្ងៃសៅរ៍ទី ២៧កុម្ភៈនេះ។ ខុសកាលពីមួយម៉ោង និងកន្លះម៉ោងមុន ដែលទាំងខាងរដ្ឋាភិបាល ដ៏ដូចជាពួកឧទ្ទាមប្រឆាំងសម្រុកផ្លោងគ្រាប់ដាក់គ្នា ដូចស្រោចភ្លៀង។
បទឈប់បាញ់ក្នុងខេត្តក្រុងធំៗ
ប៉ុន្តែបើតាមអ្នកឯកទេស បទឈប់បាញ់គ្របដណ្តប់តែប្រមាណ១០%នៃផ្ទៃដីស៊ីរីតែប៉ុណ្ណោះ ព្រោះអង្គការរដ្ឋអ៊ីស្លាម និងពួកឧទ្ទាមភេរវនិយមរណសិរ្សអាល់-ណូស្រា ស្និទ្ធនឹងបណ្តាញអាល់កៃដា គ្រប់គ្រងទឹកដីស៊ីរី ដល់ទៅពាក់កណ្តាល និងគ្មានចំណែករាប់ចូល ក្នុងកិច្ចព្រមព្រៀងឈប់បាញ់នេះទេ។
បទឈប់បាញ់ត្រូវបានអនុវត្ត ជាសំខាន់នៅក្រុងដាម៉ាស រដ្ឋធានីរបស់ស៊ីរី ដែលភាគខាងកើតនិងត្បូងជាទីតាំងសំខាន់របស់បក្ស/ឧទ្ទាមប្រឆាំងនឹងរដ្ឋាភិបាល។ ភាគខាងត្បូងជាចំណុចផុយស្រួយខ្លាំង ព្រោះរដ្ឋាភិបាលលោក បាស្ហា អាល់អាសាដ មិនចង់ឈប់បាញ់ទេ ដោយគិតថាជាតំបន់របស់អាល់ណូស្រា តែបក្សប្រឆាំងបដិសេធនិងគំរាមរួចជាស្រេចថារាល់ការបាញ់លើតំបន់នេះនឹងត្រូវចាត់ទុកជាការរំលោភបទឈប់បាញ់។
នៅតាមក្រុងធំៗមួយចំនួនផ្សេងទៀត ក៏មានការគោរពបទឈប់បាញ់ដែរ ដូចជានៅខេត្តហូម ភាគកណ្តាលនៃប្រទេស ដែលកាន់កាប់ដោយពួកប្រឆាំង លើកលែងតែ ក្រុងបូរាណប៉ាល់មៀរ ព្រោះតំបន់នេះស្ថិតក្រោមកណ្តាប់ដៃពួកអង្គការរដ្ឋអ៊ីស្លាម។
តំបន់ណា ខេត្តណា ភូមិណា ដែលមានពួកអង្គការរដ្ឋអ៊ីស្លាម និងអាល់ណូស្រា ជាអ្នកកាន់កាប់ សង្គ្រាមនៅតែបន្ត ដោយភាគីពីរនេះមិនពាក់ព័ន្ធនឹងកិច្ចព្រមព្រៀងឈប់បាញ់ស្នើឡើង ដោយរុស្ស៊ី-អាមេរិកឡើយ។
Alep អាឡិប ក្រុងយុទ្ធសាស្ត្រនៃសង្គ្រាមស៊ីរី
ក្រុងអាឡិបដែលជាសមរភូមិក្តៅជាងគេតាំងពីឆ្នាំ២០១២មក ក៏មានចាត់ចូលក្នុងបទឈប់បាញ់ដែរ។ ខេត្តនេះ គ្រប់គ្រងមួយភាគដោយរដ្ឋាភិបាលក្រុងដាម៉ាស និងចំណែកខ្លះស្ថិតក្នុងដៃពួកឧទ្ទាមប្រឆាំងនៅឡើយ។ តែភាគជើងនិងខាងលិចខេត្តអាឡិប សង្គ្រាមនៅតែបន្ត ព្រោះជាតំបន់របស់អង្គការរដ្ឋអ៊ីស្លាម ហើយកងកម្លាំងលោកបាស្ហាអាល់អាសាដ នៅតែចាត់ទុកជាតំបន់យុទ្ធសាស្ត្រ ដែលត្រូវសម្រុកខ្លាំងវាយប្រហារដណ្តើមយកមកវិញពីដៃពួកអង្គការរដ្ឋអ៊ីស្លាម។ នៅតាមព្រំប្រទល់ជាប់ប្រទេសហ្ស័កដានី ក៏បានស្គាល់ភាពស្ងប់ស្ងាត់ដែរ។
បទឈប់បាញ់ផុយស្រួយ
ការសម្រេចបានបទឈប់បាញ់នៅថ្ងៃចាត់ទុកថាជាជោគជ័យធំមួយនៃសកម្មភាពការទូត ដែលបានទទួលការគាំទ្រយ៉ាងពេញទំហឹងពី ក្រុមប្រឹក្សាសន្តិសុខនៃអង្គការសហប្រជាជាតិ តាមរយៈការអនុម័តសេចក្តីសម្រេចចិត្តជំរុញឱ្យគ្រប់ភាគីអនុវត្តបទឈប់បាញ់យ៉ាងខ្ជាប់ខ្ជួន។ លើសពីនេះទៀត ដោយហេតុតែភាពស្ងប់ស្ងាត់មានតម្លៃខ្លាំង អន្តរការីពិសេសរបស់អង្គការសហប្រជាជាតិទទួលបន្ទុកវិបត្តិស៊ីរី លោក ស្តាហ្វាន់ ដឺ ម៉ីស្តួរ៉ា ចង់ឆ្លៀតឱកាសនៃបទឈប់បាញ់ជាលើកដំបូងនៅស៊ីរី គិតចាប់តាំងពីសង្គ្រាមបានផ្ទុះឡើង ដើម្បីរៀបចំកិច្ចចរចាសន្តិភាព។ គម្រោងកោះហៅគ្រប់ភាគី មកកាន់តុចរចា រយៈពេលបីសប្តាហ៍ ចាប់ពីថ្ងៃទី ៧មីនាទៅ។ ហើយការចរចាអាចប្រព្រឹត្តទៅបាន ដរាបបទឈប់បាញ់ត្រូវបានគោរពតែប៉ុណ្ណោះ។
បទឈប់បាញ់នេះ គ្រាន់តែជាដំណាក់កាលដំបូង មុននឹងឈានដល់រៀបចំឱ្យចេញជាបទឈប់បាញ់ផ្លូវការ និងមិនបានចុះហត្ថលេខាដោយគ្រប់ភាគីពាក់ព័ន្ធក្នុងសង្គ្រាមនៅស៊ីរីទេ ដូច្នេះវាអាច មិនសូវមានលក្ខណៈដាក់កំហិតឱ្យគោរពខ្លាំងដូចកិច្ចព្រមព្រៀងផ្លូវការ និងបើតាមគម្រោង កម្មវត្ថុនៃការផ្អាកប្រយុទ្ធគ្នា គឺដើម្បីឱ្យជំនួយមនុស្សធម៌បានធ្លាក់ដល់ដៃពលរដ្ឋ និងដើម្បីមានពេលចរចាគ្នា។ ខាងរដ្ឋាភិបាលស៊ីរី ស្រែកថាបទឈប់បាញ់នេះនឹងដាច់ប្រសិនបើឃើញមានអ្នកឆ្លៀតឱកាសផ្តល់អាវុធឱ្យពួកប្រឆាំង។ ឯពួកប្រឆាំងព្រមឈប់បាញ់តែពីរសប្តាហ៍ប៉ុណ្ណោះ។
គ្រប់អ្នកការទូតសុទ្ធតែដឹងអំពីភាពផុយស្រួយនៃបទឈប់បាញ់នេះ ពួកភេរវនិយម នៅក្រៅក្របខ័ណ្ឌ អាចខ្ទាស់បំបែកបទឈប់បាញ់បានគ្រប់ពេលវេលា និងជាប្រភពនៃជម្លោះ ព្រោះអង្គការសហប្រជាជាតិទទួលស្គាល់ថាពួករណសិរ្យអាល់ណូស្រានិងអង្គការរដ្ឋអ៊ីស្លាម ជាក្រុមភេរវនិយម តែរុស្ស៊ីបកប្រែ រាប់បញ្ចូលក្រុមឧទ្ទាមប្រឆាំងរដ្ឋាភិបាលអាសាដផ្សេងទៀតចូលជាមួយដែរ។ សប្តាហ៍ខាងមុខជាតេស្តសាកល្បងឆន្ទៈរបស់រុស្ស៊ីនិងរបបក្រុងដាម៉ាស ចំពោះបទឈប់បាញ់ ហើយប្រសិនគ្រប់គ្នាប្រកាន់បាន នោះទើបមានសង្ឃឹមផ្តល់សន្ទុះ ចរចាសន្តិភាពឱ្យស៊ីរីបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ