អំពើហិង្សាជាជំងឺរ៉ាំរ៉ៃនៃការប្រកួតបាល់ទាត់ ?
ចុះផ្សាយនៅថ្ងៃ៖
ស្តាប់ - ០៤:២២
ការប្រកួតបាល់ទាត់អឺរ៉ុប អឺរ៉ូ២០១៦ បាននិងកំពុងប្រព្រឹត្តទៅប្រទេសបារាំង ដែលសម្គាល់ដោយអំពើហិង្សាយ៉ាងខ្លាំង ស្ទើរក្លាយជាសមរភូមិសង្គ្រាមកណ្តាលក្រុង តាំងពីថ្ងៃដំបូង។ ជាលទ្ធផល មានអ្នករងរបួស៣៥នាក់ ក្នុងនោះបួននាក់ធ្ងន់ធ្ងរខ្លាំង មានការបណ្តេញចេញអ្នកគាំទ្របាល់ទាត់ឱ្យត្រលប់ទៅប្រទេសវិញ មានការកាត់ទោស ... មិនតែប៉ុណ្ណោះសោតភាពហិង្សាបានរុញច្រានឱ្យសហព័ន្ធបាល់ទាត់បានព្រមាន និងពិន័យរុស្ស៊ីឱ្យបង់ប្រាក់ផង។ ភាពហិង្សាបែបនេះទំនងអាចនឹងកើតមានទៀត នៅក្នុងអំឡុងពេលប្រកួតបាល់ទាត់អឺរ៉ុបខាងមុខ។ ហេតុអ្វីបានជាការប្រកួតកីឡាបាល់ទាត់ឆ្នាំនេះ មានភាពហិង្សាខ្លាំងម្ល៉េះ ? មកពីម្ចាស់ផ្ទះអន់? ឬមកពីមូលហេតុផ្សេង ?
បន្ថែមពីលើវិបត្តិសង្គម បាតុកម្មបិទរោងចក្រប្រេង ស្ទុះមធ្យោបាយដឹកជញ្ជូន ទឹកជំនន់ ការគំរាមកំហែងភេរវកម្ម បារាំងបានធ្លាក់ក្នុងអំពើហិង្សាកណ្តាលក្រុងមួយជាន់ទៀត នៅសប្តាហ៍កន្លងទៅនេះ ! ជាអំពើហិង្សាក្រៅនិងក្នុងស្តាតដ៏សន្ធោសន្ធៅប្រៀបដូចសមរភូមិសង្គ្រាមស៊ីវិល ដែលបណ្តាលមកពីមានការប៉ះទង្គិចគ្នារវាងអ្នកគាំទ្រកីឡាបាល់ទាត់រុស្ស៊ីនិងអង់គ្លេស។ អំពើហិង្សាបានបង្កឱ្យមានអ្នករបួស ការចាប់ខ្លួន ការកាត់ទោស ការបណ្តេញចេញពីទឹកដីបារាំង ការព្រមាននិងពិន័យកីឡាកររុស្ស៊ីទៀតផង។ នេះគឺជាល្បាយដ៏ចម្រុះគ្រប់គ្រាន់សម្រាប់បង្អាប់ និងរិះគន់អាជ្ញាធរបារាំង ដែលជាម្ចាស់ផ្ទះ និងដែលកំពុងស្ថិតក្នុងស្ថានភាពអប្រជាប្រិយភាពស្រាប់។
តាមការពិត ភាពហិង្សាក្នុងពេលប្រកួតកីឡាបាល់ទាត់ មិនមែនជារឿងថ្មីថ្មោងទេ ! រាល់ការប្រកួតខ្នាតអន្តរជាតិម្តងៗ ជាពិសេសការប្រកួតបាល់ទាត់ពិភពលោក និងអឺរ៉ុប នៅអាល្លឺម៉ង់ តួកគី នៅអេស្ប៉ាគ ។ល។ និង។ល។ ភាពហិង្សាតែងមានផ្ទុះឡើង តូចឬធំ ធ្ងន់ឬស្រាល ទៅតាមគូប្រកួត ទៅតាមទីកន្លែង កាលៈទេសៈ និងទៅតាមសមាសភាពអ្នកគាំទ្រ ...
នៅក្នុងប្រវត្តិកីឡាបាល់ទាត់ ភាពហិង្សាមិនដែលឃ្លាតឆ្ងាយពីការប្រកួតទេ។ ការសិក្សាខ្លះបានថែមទាំងពិព័ណនាកីឡាបាល់ទាត់ ថាជាកីឡាហិង្សា ហិង្សាកម្លាំង ហិង្សាកាយវិការ សំដី ហិង្សាខាងក្បួនច្បាប់បញ្ញត្តិលេង ដែលសមាគមន៍អន្តរជាតិបាល់ទាត់បានខិតខំប្រឹងប្រែងកាត់បន្ថយនិងលុបបំបាត់តាមរយៈការចេញច្បាប់វិធានជាច្រើន និងជាបន្តបន្ទាប់។ នៅឆ្នាំ១៩៩០ ការសិក្សាវិទ្យាសាស្ត្របានទទួលស្គាល់អំពីភាពហិង្សា នៅក្នុងនិងក្រៅស្តាត និងការកើនឡើងនៃភាពពាលាក្នុងពេលប្រកួតបាល់ទាត់ទៀតផង។
យ៉ាងណាមិញ បាល់ទាត់អឺរ៉ូ២០១៦ នៅបារាំងមិនមែនជាករណីលើកលែងឡើយ។ គ្រប់អ្នកឯកទេសសុទ្ធតែបានទស្សទាយថា នឹងមានការផ្ទុះហិង្សា នៅក្នុងអំឡុងពេលប្រកួតកីឡាបាល់ទាត់អឺរ៉ុបឆ្នាំ២០១៦នេះ ដោយគេចពុំរួចឡើយ និងមានសរុបប្រមាណ៦ក្រុម ដែលអាចផ្តល់ហានិភ័យខ្ពស់ផ្ទុះអំពើហិង្សា នៅពេលនិងក្រោយការប្រកួត។
អំពើហិង្សាដែលបានផ្ទុះឡើង នៅថ្ងៃសៅរ៍ មិនមែនជាការភ្ញាក់ផ្អើលទេ ក្រុមកីឡាបាល់ទាត់អង់គ្លេស ទៅប្រកួតនៅក្រុងម៉ាសី ក្រុងភាគខាងត្បូងប្រទេសបារាំង ដែលមានអ្នកគាំទ្រទាំងអង់គ្លេស និងបារាំងម៉ាសី សុទ្ធជាអ្នកជ្រុលនិយម និងហិង្សាដូចគ្នា ធ្លាប់បង្កភាពហិង្សាខ្លាំងនៅឆ្នាំ១៩៩៨ ក្នុងពេលប្រកួតបាល់ទាត់ពិភពលោក អង់គ្លេស-ទុយនីស៊ីម្តងរួចហើយ។
ហើយនៅលើកនេះ មានកត្តាទីបី មកបូកបន្ថែមមួយជាន់ទៀត នោះគឺអង់គ្លេសត្រូវប្រកួតជាមួយរុស្ស៊ី ដែលអ្នកគាំទ្រសុទ្ធជាក្រុមមនុស្សហិង្សា មហាជ្រុលនិយម។
ពីមុនអ្នកគាំទ្របាល់ទាត់ដែលមានលក្ខណៈកាចនិងហិង្សាខ្លាំងគេ គឺពួកអង់គ្លេស រហូតដល់មានងារ និងពាក្យសម្គាល់ហៅអ្នកគាំទ្រកីឡាបែបកាចហិង្សាថា Hooligans ជាភាសាអង់គ្លេស ឈ្មោះត្រកូលគ្រួសារមួយដែលកូនប្រុស ជាបងធំ វាយតប់យ៉ាងហិង្សា ព្រោះងប់ងល់នឹងកីឡាបាល់ទាត់។ ហើយខណៈដែលក្រុមហិង្សាអង់គ្លេសបានរសាយគ្នាតិចទៅៗ ដោយហេតុវិធានការរបស់អាជ្ញាធរ អ្នកគាំទ្រហិង្សាបានទៅកើនឡើងនៅអឺរ៉ុបខាងកើត ជាពិសេសនៅរុស្ស៊ី។
មិនតែប៉ុណ្ណោះ ក្រុមហូលីហ្កានរុស្ស៊ី ដែលបាននាំគ្នាមកតាមដានការប្រកួតបាល់ទាត់នៅអឺរ៉ុប ដល់ទៅប្រមាណ៦០០នាក់ មានលក្ខណៈកាចហិង្សាខ្លាំងជាទីបំផុត។ ក្រុមនេះជាយុវជនមានអាយុប្រមាណពី ២៥ទៅ ៣៥ឆ្នាំ មានចរិតជ្រុលនិយម ដាច់ខាត ប្រព្រឹត្តហិង្សាជាកីឡា ហាត់ពត់លត់ដំខាងប្រវាយប្រតប់គ្នា យកធ្វើជាអាជីព ជាឯកទេស ដូចកងកម្មង់ដូយ៉ាងដូច្នោះ។ ការវាយតប់ ប្រើអំពើហិង្សាបានក្លាយជាល្បែង ហើយនៅពេលមានការហាមឃាត់ដោយអាជ្ញាធរ ពួកនេះអាចណាត់បន្តវាយគ្នានៅក្នុងព្រៃក៏មាន។
ទោះបីជាពេលនេះអាជ្ញាធរបារាំងបានដាក់ទណ្ឌកម្មកាត់ទោស បណ្តេញចេញពីទឹកដីជនល្មើសហិង្សា ក៏អំពើហិង្សានៅអាចបន្តមានផ្ទុះនៅបារាំងទៀត នាឱកាសប្រកួតក្រោយៗទៀតដែរ។ ក្នុងវិស័យបាល់ទាត់អន្តរជាតិ គេពិតជាពិបាកត្រួតពិនិត្យ និងដាក់ច្បាប់ណាស់។
ទណ្ឌកម្មអាចធ្វើទៅកើតក្រោយពីមានកំហុសតែប៉ុណ្ណោះ ហើយក្នុងករណីពលរដ្ឋរុស្ស៊ីប្រព្រឹត្តអំពើហិង្សា តើអាជ្ញាធររុស្ស៊ីមានឆន្ទៈដាក់ទណ្ឌកម្មដែរឬអត់? បារាំងជាម្ចាស់ផ្ទះច្បាស់ណាស់ថាត្រូវចាត់វិធានការឱ្យមានប្រសិទ្ធិភាព។ តែសហព័ន្ធបាល់ទាត់អឺរ៉ុបក៏មានទំនួលខុសត្រូវដែរ ដើម្បីកុំឱ្យរូបភាពកីឡាបាល់ទាត់ប្រលាក់ប្រឡូសដោយអំពើហិង្សាពេក ត្រូវតែដាក់សម្ពាធលើរុស្ស៊ី ព្រោះប្រទេសនេះនឹងត្រូវរៀបចំការប្រកួតបាល់ទាត់ពិភពលោកនៅឆ្នាំ២០១៨ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ