បារាំង៖ការប្រកួតកីឡាបាល់ទាត់អឺរ៉ុបចាប់ផ្តើមជាមួយនឹងសន្តិសុខកម្រិតខ្ពស់ និងវិបត្តិសង្គមតានតឹង
នៅក្នុងប្រទេសបារាំង ការប្រកួតកីឡាបាល់ទាត់ដណ្តើមពានរង្វាន់អឺរ៉ុបចាប់ផ្តើមពីថ្ងៃសុក្រ ទី១០ មិថុនានេះរហូតដល់ថ្ងៃអាទិត្យ ទី១០ កក្កដា។ នេះជាមោទនភាពមួយធំណាស់សម្រាប់បារាំងក្នុងនាមជាម្ចាស់ផ្ទះ ព្រោះការប្រកួតបាល់ទាត់អឺរ៉ុបមិនត្រឹមជាព្រឹត្តិការណ៍កីឡាសម្រាប់ប្រទេសបារាំង ឬមួយក៏សម្រាប់តែអឺរ៉ុបទេ តែជាព្រឹត្តិការណ៍កីឡាអន្តរជាតិដូចការប្រកួតកីឡាបាល់ទាត់ពិភពលោកអ៊ីចឹងដែរ។ តែអ្វីជាការកត់សម្គាល់ ពិធីរៀបចំកីឡាបាល់ទាត់អឺរ៉ុបក្នុងប្រទេសបារាំងពេលនេះបានធ្វើឡើង ចំពេលដែលវិបត្តិសង្គមនៅបារាំងកំពុងបន្តយ៉ាងក្តៅគគុក ហើយស្រមោលនៃអំពើភេរវកម្មនាពេលថ្មីៗក្នុងទីក្រុងប៉ារីសក៏នៅមិនរលំបាត់ទាំងស្រុងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៩:០១
ពិធីបើកសម្ភោធការប្រកួតកីឡាបាល់ទាត់ដណ្តើមពានរង្វាន់អឺរ៉ុបចាប់ផ្តើមនៅម៉ោង ៨ និង ៥០នាទីយប់ថ្ងៃសុក្រ ទី១០ មិថុនា ម៉ោងក្នុងប្រទេសបារាំង ត្រូវជាម៉ោង ១ និង ៥០នាទីរំលងអធ្រាត្រម៉ោងនៅក្នុងប្រទេសកម្ពុជា។ ចំណែកក្រុមកីឡាករដែលត្រូវចូលរួមប្រកួតបើកឆាក គឺបារាំង និងរ៉ូម៉ានីនៅឯពហុកីឡាដ្ឋានជាតិ Stade de France ស្ថិតក្បែរទីក្រុងប៉ារីស។ ការប្រកួតកីឡាបាល់ទាត់ដណ្តើមពានរង្វាន់អឺរ៉ុបរៀបចំក្នុងប្រទេសបារាំងនឹងមានរយៈពេល ១ខែ ដោយចាប់ផ្តើមពីថ្ងៃសុក្រ ទី១០ មិថុនារហូតដល់ថ្ងៃអាទិត្យ ទី១០ កក្កដា។
នៅក្នុងការប្រកួតដែលត្រូវចូលរួមដោយ ២៤ប្រទេសអឺរ៉ុបរយៈពេល ១ខែនេះ រដ្ឋាភិបាលបារាំងបានជ្រើសរើសយកទីក្រុងធំៗចំនួន ១០ ដើម្បីរៀបចំ។ នៅក្នុងទីក្រុងប៉ារីស ក៏ដូចនៅក្នុងទីក្រុងធំៗចំនួន ៩ទៀតដែលរៀបចំការប្រកួតកំពុងពោរពេញដោយភ្ញៀវទេសចរណ៍គ្រប់ជាតិសាសន៍។ ក្រៅពីការចូលរួមទស្សនាផ្ទាល់នៅតាមពហុកីឡាដ្ឋាននានាដោយទិញសំបុត្រ រដ្ឋអំណាចនៅក្នុងទីក្រុងធំៗដែលទទួលការរៀបចំក៏បានបង្កើតឲ្យមាន Fan Zone ដើម្បីឲ្យអ្នកគាំទ្រអាចចូលរួមទស្សនាដោយផ្ទាល់ និងដោយមិនយកលុយ។
តាមការប្រមើលទុក ការប្រកួតកីឡាបាល់ទាត់អឺរ៉ុបរយៈពេល ១ខែក្នុងទីក្រុងធំទាំង ១០ របស់បារាំងនឹងមានទស្សនិកជនចូលរួមទស្សនា ២លាន ៥សែន និងអ្នកទស្សនាផ្ទាល់នៅតាម Fan zone មានពី ៧ ទៅ ៨លាននាក់។
សន្តិសុខជាអាទិភាពរបស់រដ្ឋាភិបាលបារាំង
អាទិភាពទី១ របស់រដ្ឋាភិបាលបារាំង គឺសន្តិសុខដែលបារាំងបានរឹតបន្តឹងកាន់តែខ្លាំងថែមទៀតនៅក្នុងការប្រកួតបាល់ទាត់អឺរ៉ុបរយៈពេល ១ខែនេះ។ សូមជម្រាបជូនថា តាំងពីក្រោយអំពើភេរវកម្មក្នុងទីក្រុងប៉ារីសនាខែវិច្ឆិកាកន្លងទៅមក រដ្ឋាភិបាលបានប្រកាសដាក់ប្រទេសក្នុងភាពអាសន្ន និងបានបន្តរក្សាទុកភាពអាសន្ននេះរហូតដល់ចប់ការប្រកួតកីឡាបាល់ទាត់អឺរ៉ុបនៅខែកក្កដាខាងមុខ។ ពិតណាស់ថា ទោះបីជាគ្មានសញ្ញាគំរាមកំហែងភេរវកម្មណាមួយនៅក្នុងការប្រកួតកីឡាបាល់ទាត់អឺរ៉ុបនេះក៏ដោយ ក៏រដ្ឋាភិបាលបារាំងមិនបានធ្វេសប្រហែស និងមើលស្រាលចំពោះបញ្ហានេះដែរ។ បារាំងបានត្រៀមខ្លួន និងបន្តគិតថា ខ្លួននៅតែជាផ្ទាំងស៊ីបវាយប្រហាររបស់អង្គការភេរវនិយម។
អ៊ីចឹងហើយបានជានាឱកាសរៀបចំការប្រកួតកីឡាបាល់ទាត់អឺរ៉ុបនេះ រដ្ឋាភិបាលបានដាក់ពង្រាយកម្លាំងសន្តិសុខសរុបចំនួន ១០០ ០០០នាក់ ក្នុងនោះមានកម្លាំងប៉ូលិស និងកងអាវុធហាត់ចំនួន ៧៧ ០០០នាក់ កម្លាំងទាហាន ១០ ០០០នាក់ និងកម្លាំងសន្តិសុខឯកជនស៊ីវិលចំនួន ១៣ ០០០នាក់។ កម្លាំងសន្តិសុខឯកជនស៊ីវិលត្រូវបានគេយកទៅប្រើដើម្បីឆែកឆេរ និងរៀបចំសណ្តាប់ធ្នាប់នៅច្រកចេញ ចូលតាមពហុកីឡាដ្ឋាន និងនៅតាមទីកន្លែង Fan Zone។ សម្រាប់បារាំង ការធានាសន្តិសុខនៅក្នុងពិធីប្រកួតកីឡាបាល់ទាត់អឺរ៉ុបជារឿងក្រពុលមុខដែលតម្រូវឲ្យមានការប្រយ័ត្នប្រយែង និងការយកចិត្តខ្ពស់ជាងការធានាសន្តិសុខក្នុងពេលដែលបារាំងបានរៀបចំសន្និសីទអន្តរជាតិស្តីពីបញ្ហាអាកាសធាតុនាពេលកន្លងមក។
នៅក្នុងសន្និសីទ ការធានាសន្តិសុខត្រូវធ្វើឡើងតែលើទីតាំងរៀបចំសន្និសីទតែមួយ និងការពារសុវត្ថិភាពប្រមុខរដ្ឋ ប្រមុខរដ្ឋាភិបាល និងថ្នាក់ដឹកនាំបរទេសដែលចូលរួមក្នុងរយៈពេលខ្លី។ តែសម្រាប់ការប្រកួតកីឡាបាល់ទាត់ ការធានាសន្តិសុខត្រូវធ្វើឡើងរយៈពេលយូរ និងលើមុខព្រួញច្រើន រួមមាន ពហុកីឡាដ្ឋាន Fan Zone សណ្ធាគារដែលក្រុមកីឡាករស្នាក់នៅ ទីកន្លែងទេសចរណ៍សំខាន់ៗ និងជាពិសេស គឺការពារសន្តិសុខ និងសុវត្ថិភាពទស្សនិកជនគ្រប់ជាតិសាសន៍ដែលមានមិនតិចជាង ១០លាននាក់។
វិបត្តិសង្គមកំពុងអាប់មុខ មាត់បារាំង
វិបត្តិសង្គមក្នុងបារាំងសព្វថ្ងៃកំពុងធ្វើឲ្យប៉ះពាល់តិច ឬច្រើនដល់ដំណើរការរៀបចំការប្រកួតកីឡាបាល់ទាត់ និងដែលមិនអាចកំបាំងភ្នែកភ្ញៀវទេសចរណ៍បរទេសបានទេ។ បារាំងមានមោទនភាពខ្លាំងណាស់ដែលបានធ្វើជាម្ចាស់ផ្ទះរៀបចំការប្រកួតកីឡាបាល់ទាត់អឺរ៉ុបដែលមានភ្ញៀវទេសចរណ៍បរទេសគ្រប់ជាតិសាន៍មកចូលរួមទស្សនាជាច្រើនលាននាក់។ តែគួរឲ្យស្តាយ បារាំងកំពុងធ្លាក់ក្នុងវិបត្តិសង្គមមួយដែលរូបភាពក្បួនបាតុកម្មនៅតាមដងផ្លូវកំពុងចូលជំនួសរូបភាពកីឡាបាល់ទាត់អឺរ៉ុបដែលភ្ញៀវទេសចរណ៍បរទេសមិនចង់ឃើញទាល់តែសោះ។
សូមរម្លឹកជូនឡើងវិញថា អស់ជាច្រើនសប្តាហ៍មកហើយដែលពលរដ្ឋបារាំងភាគច្រើនបានចុះផ្លូវធ្វើបាតុកម្មប្រឆាំងនឹងគម្រោងច្បាប់ថ្មីស្តីពីការងារ។ ចំណែកការចរចារវាងរដ្ឋាភិបាល និងក្រុមសហជីពកំពុងជាប់គាំង ដោយគ្មានអ្នកណាសុខចិត្តធ្វើសម្បទានឲ្យអ្នកណាទេ។ បាតុកម្មកំពុងផ្ទុះចេញនៅសឹងគ្រប់វិស័យទាំងអស់ តាំងពីបុគ្គលិកបម្រើការងារក្នុងវិស័យដឹកជញ្ជូនសាធារណៈផ្លូវគោក ផ្លូវអាកាស រហូតដល់បុគ្គលិកបម្រើការងារផ្នែកប្រមូលសម្រាមនៅតាមទីធ្លាសាធារណៈ។
នៅថ្ងៃបើកពិធីសម្ភោធថ្ងៃនេះ ផ្ទាំងស៊ីបរបស់បាតុករផ្នែកដឹកជញ្ជូនសាធារណៈ គឺកាត់បន្ថយចំនួនរថភ្លើងដែលដឹកអ្នកដំណើរទៅកាន់ពហុកីឡាដ្ឋាន។ ចំណែកផ្ទាំងស៊ីបរបស់អ្នកប្រមូលសម្រាម គឺទុកសម្រាមឲ្យគរស្អុយនៅកន្លែងទេសចរណ៍ ពិសេសក្នុងក្រុងប៉ារីស។ តែទោះជាយ៉ាងនេះក្តី ក៏វិបត្តិសង្គម និងការភ័យខ្លាចអំពើភេរវកម្មមិនអាចហាមឃាត់ពលរដ្ឋបារាំង និងភ្ញៀវបរទេសឲ្យចូលរួមសប្បាយនាឱកាសពិធីរៀបចំប្រកួតបាល់ទាត់អឺរ៉ុបពេលនេះបានទេ។ អារម្មណ៍ភ័យខ្លាចនៅតែមាន តែគេមិនបានយករឿងមួយនេះដាក់ខ្លួនដើម្បីសម្ងំក្នុងផ្ទះបានឡើយ។
ជាក់ស្តែងនៅយប់មិញ មានការរៀបចំប្រគុំតន្រ្តីនៅក្នុងតំបន់ Fan zone ក្បែរTour eiffel ក្នុងក្រុងប៉ារីសដោយមានមនុស្សចូលរួមជិត ៩ម៉ឺននាក់ជាមួយនឹងភ្លេងយ៉ាងទ្រហឹងអឺងកង។ ពិធីប្រគំតន្រ្តីបានប្រព្រឹត្តិទៅរហូតដល់អធ្រាត្រ និងគ្មានរឿងរ៉ាវអ្វីកើតឡើងទាំងអស់។ នេះជាការធ្វើតេស្តប្រកបដោយជោគជ័យដែលរដ្ឋាភិបាលសង្ឃឹមទទួលបានក្នុងរយៈពេល ១ខែនៃការរៀបចំប្រកួតកីឡាបាល់ទាត់អឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ