ជំនួបកំពូលត្រីភាគីនៃប្រទេសមាត់សមុទ្រកាស់ព្យេន
ល្ងាចថ្ងៃចន្ទ៨សីហានៅក្រុងបាគូ រដ្ឋធានីអាស៊ែបៃហ្សង់ ជាលទ្ធផលនៃជំនួបកំពូលត្រីភាគី មេដឹកនាំ៣ប្រទេស ពោលគឺ អាស៊ែបៃហ្សង់ រុស្ស៊ី និងអ៊ីរ៉ង់ បានចេញសេចក្តីថ្លែងការណ៍រួមស្តីអំពីការប្រយុទ្ធទល់នឹងភេរវនិយម ហើយជម្លោះតំបន់ ត្រូវ តែដោះស្រាយឲ្យបានរួច ពង្រីកការសហការគ្នាវិស័យថាមពល និងដឹកជញ្ជូន ចាត់ទុកសមុទ្រ កាស់ព្យេនសម្បូណ៍ប្រេងនិងឧស្ម័នដែលមានប្រទេសទាំងបីស្ថិតនៅតាមឆ្នេរវា ជាសមុទ្រ សន្តិភាព ហើយចាំបាច់ ត្រូវអនុម័តអនុសញ្ញាស្តីអំពី លក្ខន្តិកៈច្បាប់ សម្រាប់សមុទ្រនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ជំនួបកំពូលត្រីភាគីបែបនេះ ប្រព្រឹត្តទៅ ជាលើកទី១ គឺទៅតាមគំនិតផ្តួចផ្តើមរបស់លោក iLham Aliev ប្រធានាធិបតីអាស៊ែបៃហ្សង់ ជាប្រទេសម្ចាស់ផ្ទះ ដែលតាំងពីខែកុម្ភៈ ម៉្លេះ បានសម្របយោបល់តាមទូរស័ព្ទទៅហើយ ជាមួយលោកប្រធានាធិបតីរុស្ស៊ី Vladimir Poutineនិងលោកប្រធានាធិបតីអ៊ីរ៉ង់ Hassan RouhanI។
ក្នុងបទអន្តរាគមន៍ខ្លួន លោកប្រមុខរដ្ឋរុស្ស៊ី បានថ្លែងថា ជំនួបកំពូលត្រីភាគីបែបនេះ គឺតម្រូវ ទៅតាម ការទាមទារនៃកាលសម័យតែម្តង។ គាត់ស្នើឲ្យផ្លាស់ប្តូរកាន់តែសកម្មឡើង ទិន្នន័យ ស្តីអំពីសកម្មភាពពួកភេរវជន ដែលត្រូវការជាចាំបាច់សម្រាប់ទប់ស្កាត់ កាន់តែ ប្តូរប្តេជ្ញ ទល់នឹង ការដឹកឆ្លងកាត់តាមដែនដី ប្រទេសទាំងបី គឺអាវុធ គ្រឿងញៀន និងពួកឧទ្ទាមផ្ទាល់។
ចំណែកលោកប្រមុខរដ្ឋអាស៊ែបៃហ្សង់ បានទាក់ទាញស្មារតីកិច្ចប្រជុំកំពូលនោះ ទៅលើជម្លោះរ៉ាំរ៉ៃពន្យារទៅជិត ៣ទសវត្សរ៍ហើយ នៅលើដែនដីប្រទេសគាត់ ត្រង់តំបន់ ការ៉ាបាក់ និងថា សេចក្តីសម្រេចរបស់ក្រុមប្រឹក្សាសន្តិសុខ អ.ស.ប. ចែងយ៉ាងច្បាស់លាស់ ឲ្យកងទ័ព អារមេនី ដកចេញទៅ ពីតំបន់ដែលគេកាន់កាប់នោះ មានផ្ទៃក្រឡាដល់ទៅ២០% នៃដែនដី អាស៊ែបែដហ្សាន។ រីឯលោកប្រមុខរដ្ឋអ៊ីរ៉ង់ បានហៅការសហការគ្នាដោះស្រាយវិបត្តិនៅស៊ីរី ថាជាឧទាហរណ៍ នៃសហប្រតិបត្តិការតំបន់។
ជាការកត់សម្គាល់ ក្នុងសុន្ទរកថាខ្លួន មេដឹកនាំទាំងបី សុទ្ធតែបាន ផ្តោតទៅលើ ភារកិច្ច ខាង ត ភ្ជាប់ ប្រព័ន្ធអគ្គិសនីទាំង៣ប្រទេស ហើយប្រែប្រទេសខ្លួនទៅជា ប្រទេសលក់ថាមពលនេះ។ ខាងវិស័យដឹកជញ្ជូន ប្រទេសទាំង៣ ដើរតួជា ភាគមួយ នៃខ្សែផ្លូវក្រោមឈ្មោះថា ឧត្តរ-ទក្សិណ ប្រវែង ៧.២០០គ.ម.បែកចេញពី បណ្តាប្រទេសអឺរ៉ុបខាងជើង បែបយ៉ាងហ្វាំងឡង់ ឆ្លងកាត់ តាមក្រុងរុស្ស៊ី Saint-Petersbourgហើយចុះទៅខាងត្បូង កាត់តាមប្រទេសតំបន់អាស៊ីកណ្តាល តំបន់នាយភ្នំកូកាស អាស៊ីនិរតី លុះទៅដល់ប្រទេសឥណ្ឌា។ ផ្លូវដែកនេះជួយសន្សំពេលបាន ១៤ថ្ងៃ និងថ្លៃដឹកបានជាង២ដងកន្លះ បើប្រៀបទៅនឹងផ្លូវកាត់តាម ព្រែកជីក ស៊ុយអេស។
ជំនួបកំពូលត្រីភាគី អាស៊ែបៃហ្សង់ រុស្ស៊ី និងអ៊ីរ៉ង់លើកក្រោយនឹងប្រព្រឹត្តទៅ នៅ អ៊ីរ៉ង់ ទៅតាមសំណើ លោកប្រធានាធិបតី Hassan RouhanI៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ