ស៊ីរី៖ហេតុអ្វីបានជារុស្ស៊ីបើកសមរភូមិថ្មីវាយប្រហារអង្គការរដ្ឋអ៊ីស្លាមនៅស៊ីរីពីទឹកដីអ៊ីរ៉ង់?
ចុះផ្សាយនៅថ្ងៃ៖
ស្តាប់ - ០៧:១០
តាំងពីថ្ងៃអង្គារ ទី១៦សីហាមក កងទ័ពអាកាសរុស្ស៊ីបានបើកការវាយប្រហារលើអង្គការរដ្ឋអ៊ីស្លាមក្នុងប្រទេសស៊ីរីពីទឹកដីអ៊ីរ៉ង់។ នេះជាលើកទី១ ដែលរុស្ស៊ីបានប្រើប្រាស់មូលដ្ឋានទ័ពរបស់អ៊ីរ៉ង់ដើម្បីបើកយុទ្ធនាការផ្លូវអាវុធនៅក្នុងប្រទេសស៊ីរី។ អាមេរិកបានសម្តែងការសោកស្តាយយ៉ាងខ្លាំងចំពោះទង្វើរបស់រុស្ស៊ីដោយចាត់ទុកថា វាអាចនឹងបង្កការលំបាកថ្មីនៅក្នុងដំណើរការចរចាស្វែងរកសន្តិភាពឲ្យវិបត្តិស៊ីរី។ តែយ៉ាងណាក៏ដោយ នេះជាសក្ខីកម្មថ្មីមួយទៀតដែលស បញ្ជាក់ឲ្យឃើញកាន់តែច្បាស់ក្រឡែតពីកិច្ចសហប្រតិបត្តិការយោធារវាងរុស្ស៊ី និងអ៊ីរ៉ង់ដែលជាសម្ព័ន្ធមិត្តចាក់ទឹកមិនលិចរបស់លោកប្រធានាធិបតីស៊ីរីអាសាដ។
គួរបញ្ជាក់ជូនថា នេះមិនមែនជាលើកទី១ ទេដែលរុស្ស៊ីបានចូលខ្លួនធ្វើអន្តរាគមន៍ផ្លូវយោធានៅក្នុងប្រទេសស៊ីរីក្រោមហេតុផលថា ដើម្បីកម្ទេចពួកជីហាតអង្គការរដ្ឋអ៊ីស្លាម។ ក៏ប៉ុន្តែ នេះជាលើកទី១ បង្អស់ដែលរុស្ស៊ីបានយកទឹកដីប្រទេសទី៣ ពោលបានប្រើប្រាស់មូលដ្ឋានយោធាហាមីដាន (Hamedan)របស់ប្រទេសអ៊ីរ៉ង់ដើម្បីវាយប្រហារផ្លូវអាកាសនៅស៊ីរី។ សូមជម្រាបជូនថា នៅក្នុងប្រតិបត្តិការផ្លូវអាកាសលើកដំបូងនៅស៊ីរីក្នុងខែកញ្ញា ឆ្នាំ ២០១៥ រុស្ស៊ីបានប្រើប្រាស់មូលដ្ឋានយោធារបស់ស៊ីរីសម្រាប់យន្តហោះចម្បាំងខ្នាតមធ្យម និងខ្នាតតូចៗ តែសម្រាប់យន្តហោះចម្បាំងខ្នាតធំ ពិសេសយន្តហោះទម្លាក់គ្រាប់បែកប្រភេទ Tu-២២M៣ គឺត្រូវប្រើប្រាស់មូលដ្ឋានយោធានៅរុស្ស៊ីផ្ទាល់។
តែតាំងពីថ្ងៃអង្គារ ទី១៦ សីហាមក យន្តហោះទម្លាក់គ្រាប់បែកប្រភេទនេះបានហោះឡើង ចុះពីមូលដ្ឋានយោធាហាមីដានរបស់អ៊ីរ៉ង់ដែលស្ថិតមិនឆ្ងាយពីស៊ីរី។ សម្រាប់ក្រុងមូស្គូ ការប្រើប្រាស់មូលដ្ឋានយោធាហាមីដានរបស់អ៊ីរ៉ង់ដើម្បីវាយប្រហារនៅស៊ីរីបានធ្វើឲ្យរុស្ស៊ីចំណេញច្រើនណាស់ គឺចំណេញទាំងពេលវេលា និងថវិកា ពិសេសគឺពេលវេលា ព្រោះមូលដ្ឋានយោធាហាមីដានមានចម្ងាយពីព្រំដែនស៊ីរីមិនដល់ ១ ០០០គីឡូម៉ែត្រទេ។ ពីមូលដ្ឋានយោធាហាមីដានទៅទម្លាក់គ្រាប់បែកនៅស៊ីរី យន្តហោះរុស្ស៊ីប្រភេទ Tu-២២M៣ត្រូវហោះតែក្នុងចម្ងាយ ៧០០គីឡូម៉ែត្រប៉ុណ្ណោះ ពោលតិចជាង ៣ដងហោះចេញពីមូលដ្ឋានយោធានៅរុស្ស៊ីដែលមានចម្ងាយដល់ទៅ ៣ ០០០គីឡូម៉ែត្រ។
ម្យ៉ាងទៀតពីមូលដ្ឋានយោធាហាមីដាន យន្តហោះរុស្ស៊ីប្រភេទ Tu-២២M៣ អាចដឹកជញ្ជូនគ្រាប់បានដល់ទៅ ២២តោនទល់នឹងពី ៥ទៅ ៨តោនពីមូលដ្ឋានយោធានៅរុស្ស៊ី។ ទន្ទឹមគ្នា រុស្ស៊ីក៏បានលើកឡើងពីប្រសិទ្ធិភាពដែលមាន ៣ដងច្រើនជាង។ ចំណែកគោលដៅនៃការវាយប្រហារត្រូវបានរុស្ស៊ីអះអាងថា នៅតែដដែល គឺកម្ទេចពួកជីហាតអង្គការរដ្ឋអ៊ីស្លាម និងចលនារណសិរ្យអាល់ណូស្រាដែលជាសាខារបស់អង្គការភេរវនិយមអាល់កៃដា។ តែនរណាក៏ដឹងដែរថា នេះគ្រាន់ជាហេតុផលមួយប៉ុណ្ណោះ ព្រោះផ្ទាំងស៊ីបពិតប្រាកដរបស់រុស្ស៊ីក្នុងនាមជាសម្ព័ន្ធមិត្តចាក់ទឹកមិនលិចរបស់ស៊ីរី គឺក្រុមបះបោរដែលកំពុងប្រឆាំងនឹងរដ្ឋាភិបាលស៊ីរីរបស់លោកប្រធានាធិបតីអាសាដ។
រុស្ស៊ីបានលូកដៃកាន់តែជ្រៅនៅក្នុងជម្លោះតំបន់មជ្ឈិមបូព៌ា
ទង្វើថ្មីរបស់រុស្ស៊ីពេលនេះជាសក្ខីកម្មមួយដែលបញ្ជាក់ពីការលូកដៃកាន់តែជ្រៅនៅក្នុងជម្លោះតំបន់ដើមបូព៌ា។ បន្តិចម្តងៗ រុស្ស៊ីក្នុងនាមជាមហាអំណាចមួយលើលោកហាក់ដូចជាមិនចង់បន្តទុកបណ្តោយឲ្យមហាអំណាចផ្សេងពិសេស អាមេរិកបន្តឈឺឆ្អាលបញ្ហាពិភពលោកតែម្នាក់ឯងទៀតឡើយ។ ការប្រើប្រាស់ប្រទេសទី៣ ដើម្បីចូលអន្តរាគមន៍ដោះស្រាយជម្លោះនៅក្នុងប្រទេសមួយទៀត គឺជាភស្តុតាងថ្មីដែលបញ្ជាក់ពីការពង្រីកឥទ្ធិពលរបស់រុស្ស៊ីនៅលើឆាកអន្តរជាតិ ពិសេសយុទ្ធនាការប្រយុទ្ធប្រឆាំងនឹងភេរវនិយម។ ចូរកុំភ្លេចថា ការប្រើប្រាស់មូលដ្ឋានយោធាក្នុងទឹកដីអ៊ីរ៉ង់អាចអនុញ្ញាតឲ្យរុស្ស៊ីបាញ់បានផ្ទាំងស៊ីបចំនួន ២ របស់អង្គការរដ្ឋអ៊ីស្លាម គឺនៅក្នុងប្រទេសស៊ីរី និងនៅក្នុងប្រទេសអ៊ីរ៉ាក់។
ដោយឡែក នេះក៏ជាការបោះមួយជំហានថ្មីរបស់អ៊ីរ៉ង់នៅលើឆាកអន្តរជាតិដែរ។ ការហ៊ាននិយាយដូចនេះ ព្រោះវាក៏ជាលើកទី១ បង្អស់គិតតាំងពីថ្ងៃបដិវត្តន៍សាសនាអ៊ីស្លាមអ៊ីរ៉ង់ដែលរដ្ឋាភិបាលអ៊ីរ៉ង់បានយល់ព្រមបើកមូលដ្ឋានយោធារបស់ខ្លួនឲ្យប្រទេសទី៣ ប្រើប្រាស់។ អ្វីដែលអ៊ីរ៉ង់ចង់បង្ហាញពិភពលោកនោះគឺថា ខ្លួនជាមហាអំណាចមួយនៅក្នុងតំបន់ និងមិនមែនជាប្រទេសឯកោដែលគ្មាននរណារាប់រកនោះទេ។ មួយវិញទៀត ពោលតាំងពីក្រោយមានកិច្ចព្រមព្រៀងនុយក្លេអ៊ែរមក អ៊ីរ៉ង់ក៏ចង់បង្ហាញពីឯករាជ្យភាពមិនចំណុះឲ្យមហាអំណាចណាមួយទេ។
តែគេមិនត្រូវភ្លេចនិយាយទេថា ការដែលអ៊ីរ៉ង់បានយល់ព្រមបើកមូលដ្ឋានយោធារបស់ខ្លួនឲ្យរុស្ស៊ីប្រើប្រាស់ពេលនេះ ក៏ជាភស្តុតាងថ្មីដែលស បញ្ជាក់កាន់តែច្បាស់ក្រឡែតពីទំនាក់ទំនងផ្លូវយោធារវាងក្រុងមូស្គូ និងក្រុងតេហេរ៉ង់ដែលបានគាំទ្ររបបស៊ីរីរបស់លោកប្រធានាធិបតីអាសាដយ៉ាងពេញមុខ។
អាមេរិកទើសទាល់ចិត្ត តែគ្មានជម្រើសអ្វីក្រៅពីទទួលយក
អាមេរិកបានបញ្ចេញប្រតិកម្មមុនគេទាក់ទងនឹងទង្វើរបស់រុស្ស៊ី ទោះបីជាអាមេរិក និងរុស្ស៊ីក៏ជាដៃគូនៅក្នុងយុទ្ធនាការវាយប្រហារអង្គការរដ្ឋអ៊ីស្លាមនៅក្នុងស៊ីរីដូចគ្នាក៏ដោយ។ សូមជម្រាបជូនថា មុននឹងបើកប្រតិបត្តិការវាយប្រហារផ្លូវអាកាសជាថ្មីលើស៊ីរីដោយប្រើប្រាស់មូលដ្ឋានយោធានៅអ៊ីរ៉ង់ រុស្ស៊ីក៏បានជូនដំណឹងនេះទៅអាមេរិកជាមុនដែរដើម្បីកុំមានការភ្ញាក់ផ្អើល ព្រោះអាមេរិកក៏កំពុងប្រតិបត្តិការកម្ទេចអង្គការរដ្ឋអ៊ីស្លាមនៅស៊ីរីដូចគ្នា។
តែអ្វីដែលអាមេរិកហាក់ដូចជាទើសទាល់ចិត្តនោះ គឺនៅត្រង់ដែលរុស្ស៊ីបានប្រើប្រាស់មូលដ្ឋានយោធារបស់អ៊ីរ៉ង់។ នៅក្នុងន័យនេះ ក្រុងវ៉ាស៊ីតោនបែរជាបានសម្តែងការសោកស្តាយ និងបានបញ្ជាក់ថា ទង្វើថ្មីរបស់រុស្ស៊ីពេលនេះអាចនឹងបង្កការលំបាកនៅក្នុងដំណើរការចរចាស្វែងរកសន្តិភាពឲ្យវិបត្តិស៊ីរី។ ជាថ្មីម្តងទៀត ក្រុងវ៉ាស៊ីតោនមិនញញើតនឹងចោទមូស្គូពីបទបានវាយប្រហារលើក្រុមបះបោរស៊ីរីដែលអាមេរិកកំពុងគាំទ្រទេ។ តែយ៉ាងណាក៏ដោយ អាមេរិកក៏បានសន្យានឹងបន្តធ្វើការជាមួយរុស្ស៊ីដើម្បីស្វែងរកបទឈប់បាញ់នៅស៊ីរី និងជួយផ្តល់សន្ទុះកិច្ចចរចាឡើងវិញ។
សូមជម្រាបជូនថា អាមេរិក និងរុស្ស៊ីមានទស្សនៈវិស័យពីរខុសគ្នាទាក់ទងនឹងវិបត្តិស៊ីរី។ វ៉ាស៊ីនតោនបានគាំទ្រពួកប្រឆាំង និងចង់ដោះស្រាយវិបត្តិដោយគ្មានវត្តមានលោកប្រធានាធិបតីស៊ីរីអាសាដ តែមូស្គូបានយល់ឃើញថា លោកអាសាដជាតួអង្គនយោបាយមួយមិនអាចខ្វះបាននៅក្នុងដំណោះស្រាយឲ្យវិបត្តិស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ