អាមេរិកកំពុងស្វែងរកកិច្ចព្រមព្រៀងជាក់លាក់ជាមួយរុស្ស៊ីក្នុងជម្លោះស៊ីរី
ប្រមុខការទូតអាមេរិកនិងរុស្ស៊ី លោកJohn Kerry និងលោក Sergueï Lavrov បានផ្តើមការចរចាជាមួយគ្នាឡើងវិញនៅថ្ងៃសុក្រ៩កញ្ញាក្នុងទីក្រុងហ្ស៊ឺណែវប្រទេសស្វ៊ីស ដើម្បីប៉ុនប៉ងស្វែងរកដំណោះស្រាយមួយនៅក្នុងសង្រ្គាមស៊ីវិលនៅស៊ីរី ដែលបានសម្លាប់ជីវិតប្រជាជនស៊ីវិលយ៉ាងរង្គាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ការប៉ុនប៉ងសាជាថ្មីរបស់អាមេរិកនិងរុស្ស៊ីនៅក្នុងអធិករណ៍ស៊ីរីនេះ ត្រូវបានធ្វើឡើងបន្ទាប់ពីការចរចាលើកមុនៗរវាងប្រមុខការទូតអាមេរិកJohn Kerry និងប្រមុខការទូតរុស្ស៊ី Sergueï Lavrov ត្រូវបានទទួលបរាជ័យជាបន្តបន្ទាប់គ្នានារយៈពេលប៉ុន្មានខែចុងក្រោយនេះ។
ម៉ូស្គូនិងវ៉ាស៊ីនតោនដែលគាំទ្ររៀងៗខ្លួន គូបដិបក្សនៅក្នុងសង្គ្រាមស៊ីរី តាំងពីជាង៥ឆ្នាំកន្លងមកហើយនោះ ប៉ុនប៉ងផ្តល់សន្ទុះជាថ្មីឡើងវិញដល់ផែនការសន្តិភាពមួយដែលសហគមន៍អន្តរជាតិ បានអនុម័តនៅចុងឆ្នាំ ២០១៥កន្លងមក។ ផែនការសន្តិភាព ដែលមានជាអាទិ៍ “បទឈប់បាញ់គ្នាជាស្ថាពរ ការស្វែងរកជំនួយមនុស្សធម៌ និងការរៀបចំដំណើរការដោះស្រាយនយោបាយមួយនៅក្នុងប្រទេសស៊ីរី។
សូមបញ្ជាក់ថា បន្ទាប់ពីមានការអល់អែករអស់រយៈពេល២ថ្ងៃកន្លងមក ប្រមុខការទូតអាមេរិក បានធ្វើដំណើរមកដល់ទីក្រុងហ្ស៊ឺណែវប្រទេសស្វីសនៅព្រឹកថ្ងៃសុក្រទី៩កញ្ញា ក្នុងគោលដៅ ដើម្បីជួបប្រាស្រ័យជាមួយប្រមុខការទូតរុស្ស៊ី ក្នុងរយៈពេលពីរឬ៣ម៉ោង ពីព្រោះប្រមុខការទូតទាំងពីរប្រទេសនេះនឹងត្រូវវិលត្រឡប់ចូលក្នុងប្រទេសរៀងៗខ្លួនវិញនៅយប់ថ្ងៃសុក្រដែរ។
ម្យ៉ាងទៀត នៅក្នុងយន្តហោះ ទីប្រឹក្សានានាអាមេរិកដែលអមដំណើរលោក John Kerry បានអះអាងថា “ប្រសិនលោក Kerry គិតថាលោកគ្មានសំណាងពិតប្រាកដនៅក្នុងកិច្ចចរចាជាមួយរុស្ស៊ីនោះទេ នោះក៏លោក ប្រហែលជាមិនខំប្រឹងប្រែងធ្វើដំណើរមកកាន់ប្រទេសស្វីសនេះដែរ។ តែដោយព្រមានទុកជាមុនដែរថា ពួកគេក៏ពុំហ៊ានធានាថានឹងមានកិច្ចព្រមព្រៀងនៅចុងបញ្ចប់ណាមួយនោះដែរ។
យោងតាមអ្នកទទួលខុសត្រូវជាន់ខ្ពស់របស់អាមេរិក ទីក្រុងវ៉ាស៊ីនតោនមានបំណងចង់ឃើញរុស្ស៊ី ចាត់វិធានការឲ្យបានច្បាស់លាស់ ដើម្បីបង្ខំឲ្យសម្ព័ន្ធមិត្តរបស់ខ្លួនគឺលោកប្រធានាធិបតីស៊ីរី Bachar al-Assad បញ្ចប់ការបាញ់គ្រាប់ផ្លោងទៅលើប្រជាជនស៊ីវីលស៊ីរីនិងឲ្យបញ្ចប់ផងដែរនូវការឡោមព័ទ្ធទីក្រុងអាឡិប។
សូមបញ្ជាក់ថា នៅក្នុងក្រុងហ្ស៊ីណែវប្រទេសស្វីស កិច្ចចរចារវាងប្រមុខការទូតអាមេរិកនិងរុស្ស៊ី ត្រូវធ្វើបន្តពីកិច្ចចរចាកាលពីលើកមុនក្នុងពេលថ្មីៗកន្លងទៅនេះ ។ កិច្ចចរចាដែលត្រូវផ្តោតផងដែរទៅលើការកាត់បន្ថយអំពើហិង្សា ការបង្កើនឲ្យច្រើនថែមទៀតជំនួយមនុស្សធម៌ដល់ប្រជាជនស៊ីរីនិងការពន្លឿនដំណោះស្រាយនយោបាយមួយឲ្យបានឆាប់រហ័សដើម្បីបិទបញ្ចប់សង្គ្រាមស៊ីវីលនៅក្នុងប្រទេសស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ