អាល្លឺម៉ង់៖កម្លាំងប៉ូលិសបានបើកប្រតិបត្តិការទ្រង់ទ្រាយធំប្រឆាំងនឹងចលនាអ៊ីស្លាមនិយម
នៅក្នុងប្រទេសអាល្លឺម៉ង់ កម្លាំងប៉ូលិសបានប្រកាសឲ្យដឹងនៅថ្ងៃអង្គារ ទី១៥ វិច្ឆិកាពីការបើកប្រតិបត្តិការក្រោមទ្រង់ទ្រាយធំប្រឆាំងនឹងចលនាអ៊ីស្លាមនិយម។ ប្រតិបត្តិការនេះបានចាប់ផ្តើមនៅព្រលឹមស្រាងៗ និងត្រូវបានធ្វើឡើងនៅ ២០០កន្លែងខុសៗគ្នាក្នុងពេលតែមួយ។ ចលនាអ៊ីស្លាមនិយមដែលមានឈ្មោះថា « សាសនាពិត » បានជាប់ចោទពីបទបានញុះញង់មនុស្សចំនួន ១៤០នាក់ឲ្យទៅចូលរួមជាមួយអង្គការរដ្ឋអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:០៩
ប្រតិបត្តិការក្រោមទ្រង់ទ្រាយធំបង្រ្កាបលើចលនាអ៊ីស្លាមនិយមឈ្មោះ « សាសនាពិត » ត្រូវបានធ្វើឡើងនៅក្នុងរដ្ឋតំបន់ទាំង ១០ របស់ប្រទេសអាល្លឺម៉ង់ដោយសំដៅលើ ២០០កន្លែងខុសៗគ្នា ពិសេសនៅតាមការិយាល័យ និងនៅតាមគេហដ្ឋាន។ ចលនា « សាសនាពិត » ដែលមានសមាជិកជាច្រើនរយនាក់ជាចលនាខុសច្បាប់ និងដែលរដ្ឋអំណាចអាល្លឺម៉ង់ហាមមិនឲ្យធ្វើសកម្មភាពអ្វីទាំងអស់។ តែកន្លងមក ចលនាមួយនេះបានចេញធ្វើសកម្មភាពចែកចាយគម្ពីសាសនាអ៊ីស្លាមនៅតាមស្រុកជាច្រើន រួមទាំងឃោសនាជ្រើសរើសយុវជនស្ម័គ្រចិត្តឲ្យធ្វើជីហាតរបស់អង្គការរដ្ឋអ៊ីស្លាមផង។ គិតតាំងពីឆ្នាំ ២០០១ នេះជាលើកទី២ ដែលរដ្ឋអំណាចអាល្លឺម៉ង់បានសម្រេចចិត្តបើកយុទ្ធនាការទ្រង់ទ្រាយបង្រ្កាបលើក្រុម ឬចលនាអ៊ីស្លាមនិយមក្នុងស្រុក។
លោករដ្ឋមន្រ្តីក្រសួងមហាផ្ទៃអាល្លឺម៉ង់ Thomas Maizière បានបញ្ជាក់នៅក្នុងសន្និសីទកាសែតថ្ងៃនេះថា ចលនា « សាសនាពិត » បានញុះញង់ បញ្ចុះបញ្ចូលយុវជនអាល្លឺម៉ង់ប្រមាណជា ១៤០នាក់ឲ្យចូលរួមជាមួយអង្គការរដ្ឋអ៊ីស្លាមនៅក្នុងប្រទេសស៊ីរី និងអ៊ីរ៉ាក់ ព្រមទាំងបានប្រកាសក្តែងៗថា ការឆ្លើយបដិសេធមិនទទួលយកលទ្ធិប្រជាធិបតេយ្យ គឺជាកាតព្វកិច្ចរបស់ប្រជាជនអ៊ីស្លាម។ យ៉ាងណាក៏ដោយ លោក Thomas បានថ្លែងដោយព្រមានថា ប្រទេសអាល្លឺម៉ង់គ្មានកន្លែងសម្រាប់ពួកអ៊ីស្លាមនិយមជ្រុលទេ និងថា អាល្លឺម៉ង់ក៏មិនត្រូវការភេរវនិយម ហើយក៏មិនអនុញ្ញាតឲ្យមានការឃោសនាគាំទ្រភេរវនិយមនៅក្នុងប្រទេសអាល្លឺម៉ង់ ឬមួយក៏នាំភេរវនិយមចេញពីអាល្លឺម៉ង់ដែរ។
តួលេខផ្តល់ដោយទីភ្នាក់ងារស៊ើបអង្កេតផ្ទៃក្នុងឲ្យដឹងថា មានពួកអ៊ីស្លាមនិយមជ្រុលប្រមាណជា ៩ ២០០នាក់កំពុងមានវត្តមានក្នុងទឹកដីអាល្លឺម៉ង់ ក្នុងនោះមាន ១ ២០០នាក់ជាពួកសកម្មខ្លាំងអាចឈានទៅបង្កអំពើភេរវកម្ម។ នារយៈពេលចុងក្រោយនេះ រដ្ឋអំណាចអាល្លឺម៉ង់បានបង្កើនគំនាបលើក្រុម និងចលនាអ៊ីស្លាមនិយម។ ជាក់ស្តែងនៅសប្តាហ៍មុន ក្រសួងយុត្តិធម៌អាល្លឺម៉ង់បានចេញដីការចាប់មនុស្ស ៥នាក់ពីបទសង្ស័យបង្កើតបណ្តាញជ្រើសរើសយុវជនឲ្យអង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ