អាល្លឺម៉ង់អរគុណជនភៀសខ្លួនស៊ីរីដែលជួយប៉ូលិសកម្ចាត់ភេរវកម្ម
តាំងពីអំណាចកំពូល ចាប់ផ្តើមដោយលោកស្រីប្រមុខរដ្ឋាភិបាលអាល្លឺម៉ង់ អង់ហ្គឺឡា មែរកិល ប៉ូលិស រហូតដល់បណ្តាជនអាល្លឺម៉ង់សាមញ្ញ តាមរយៈបណ្តាញប្រព័ន្ធសង្គម បាននាំគ្នាអបអរលើកសរសើរវីរភាពរបស់ជនភៀសខ្លួនជាតិស៊ីរីពីរនាក់ ដែលបានជួយប៉ូលិសឱ្យចាប់ខ្លួនបានភេរវជនសង្ស័យ ជាជនភៀសខ្លួននិងមានជាតិស៊ីរីដែរ។
ចុះផ្សាយនៅថ្ងៃ៖
ស្តាប់ - ០១:៥៨
ភេរវជនសង្ស័យជាតិស៊ីរី Jaber Albakr អាយុ២២ឆ្នាំ ដែលហៀបនឹងបង្កភេរវកម្មនៅស្ថានីយរថភ្លើង និងនៅអាកាសយានដ្ឋាន ដើម្បីប្រយោជន៍អង្គការរដ្ឋអ៊ីស្លាម និងដែលប៉ូលិសអាល្លឺម៉ង់ តាមស្វែងរកចាប់ខ្លួនបំផុត តាំងពីថ្ងៃសៅរ៍មក ត្រូវចាប់ខ្លួនបានហើយ នៅថ្ងៃចន្ទម្សិលមិញ។ ការប៉ុនប៉ងធ្វើភេរវកម្មនេះ បានបំផុសឱ្យមានការតស៊ូមតិជាថ្មីឡើងវិញ ទាក់ទងនឹងការត្រួតពិនិត្យជនភៀសខ្លួន ដែលហូរចូលយ៉ាងគំហុកមកអាល្លឺម៉ង់ កាលពីឆ្នាំទៅ។ ម្យ៉ាងដោយកាលពីខែកក្កដាកន្លងទៅ អាល្លឺម៉ង់បានរងភេរវកម្មជីហាតអង្គការរដ្ឋអ៊ីស្លាមដល់ទៅពីរដង បង្កឡើងដោយជនភៀសខ្លួន។
ប៉ុន្តែនៅលើកនេះខុសពីមុន ការចាប់ខ្លួនភេរវជនសង្ស័យ សម្រេចបានដោយសារជំនួយ មិនអាចកាត់ថ្លៃបាន របស់ជនភៀសខ្លួនស៊ីរីបីនាក់។ បើតាមការរៀបរាប់របស់កាសែតBild នៅថ្ងៃសៅរ៍ ជនភៀសខ្លួនស៊ីរីទាំងបីនាក់ បានផ្តល់ជម្រកឱ្យជនភៀសខ្លួនស៊ីរីម្នាក់ទៀត ដែលស្វែងរកដំបូលជ្រកទាំងអស់សង្ឃឹមតាមប្រព័ន្ធសង្គម និងដែលគ្មាននរណាក្រៅពី Jaber Albakr ឡើយ។ នៅថ្ងៃអាទិត្យ នៅម្ចាស់ផ្ទះម្នាក់បានឃើញដំណឹងស្វែងរកចាប់ភេរវជនសង្ស័យ តាមប្រព័ន្ធសង្គមហ្វេសប៊ូក ហើយនៅពេលបានឃើញមុខ Jaber Albakr និងឆ្លៀតពេលដែលជននេះ ចង់កោរសក់ (ម្ចាស់ផ្ទះម្នាក់ធ្លាប់ធ្វើជាងកាត់សក់) ពួកគេក៏នាំគ្នាយកខ្សែរ៉ូឡូភ្លើងចង មុននឹងម្ចាស់ផ្ទះម្នាក់ទៀតទៅរត់ទៅប្រាប់ប៉ូលិស។
បើតាមសារព័ត៌មានអាល្លឺម៉ង់ដដែល ភេរវជនសង្ស័យបានស្នើផ្តល់លុយឱ្យជនភៀសខ្លួនជាម្ចាស់ជម្រកផង តែពួកគេបដិសេធ និងសុខចិត្តប្រថុយនឹងគ្រោះថ្នាក់នៃការសងសឹកជាយថាហេតុទៅវិញ។ ហេតុដូច្នេះហើយបានជាអាល្លឺម៉ង់អបអរវីរភាពរបស់ពួកគេ ដែលបញ្ជាក់ថា គ្មានទេការម៉ៅសរុបថាសង្ស័យលើជនភៀសខ្លួនទេ។ សកម្មភាពរបស់ពួកគេ ជាសញ្ញាដ៏វិជ្ជមានមួយ បង្ហាញពីភាពក្លាហាន និងមានទំនួលខុសត្រូវ។ បុរសដែលបានទៅប្រាប់ប៉ូលិស បានទទួលការសរសើរពីលោកស្រីអង់ហ្គឺឡា មែរកិលផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ