តុលាការបារាំងបើកសវនាកាកាត់ទោសលោកស្រី Christine Lagarde ក្នុងរឿងក្តីក្តាំលោក Bernard Tapis
លោកស្រី Christine Lagarde ចូលខ្លួននៅមុខតុលាការយុត្តិធម៌បារាំង(La Cour de justice de la République) នៅថ្ងៃចន្ទ១២ធ្នូនេះ។ អគ្គនាយិការមូលនិធិរូបិយវត្ថុអន្តរជាតិ FMI ត្រូវឆ្លើយបញ្ជាក់អំពីភាព”ធ្វេសប្រហែស”របស់លោកស្រីនៅក្នុងការ ធ្វើអន្តរាគមន៍ពាក់ព័ន្ធសំណុំរឿងរបស់អ្នកជំនួញបារាំងមួយរូបឈ្មោះ លោក Bernard Tapis នៅខណៈពេលដែលលោកស្រី មានមុខតំណែងជារដ្ឋមន្ត្រីក្រសួងហិរញ្ញវត្ថុក្នុងអាណត្តិលោក ប្រធានាធិបតី Nicolas Sarkozy ពីឆ្នាំ២០០៧ដល់ឆ្នាំ ២០១១។
ចុះផ្សាយនៅថ្ងៃ៖
ស្តាប់ - ០២:២១
សំណុំរឿងក្តីក្តាំដ៏អស្ចារ្យរបស់លោក Bernard Tapieបានលេចឡើងសារជាថ្មីទៀត។ នៅឆ្នាំ២០០៨ លោក Bernard Tapie ពុំដែលបានឈ្នះក្តីឡើយនៅក្នុសំណុំរឿងក្តីក្តាំជាមួយតុលាការបារាំងនៅលើការលក់ក្រុមហ៊ុន Adidas របស់គាត់ តែរដ្ឋបារាំងបានចេញមុខជួយគាត់។
ជំនាន់នោះ លោកស្រី Christine Lagarde ដែលជារដ្ឋមន្ត្រីក្រសួងហិរញ្ញវត្ថុក្នុងអាណត្តិលោកប្រធានាធិបតី Nicolas Sarkozy ពីឆ្នាំ ២០០៧ដល់ឆ្នាំ ២០១១ បានប្រគល់សំណុំរឿងក្តីក្តាំរបស់លោក Tapis នេះ ឲ្យទៅក្រុមប្រឹក្សាអាជ្ញាកណ្តាលមួយជាអ្នកដោះស្រាយ។ ក្រុមប្រឹក្សាអាជ្ញាកណ្តាលនេះ បានសម្រេចឲ្យលោកBernard Tapie ឈ្នះក្តីដោយបានទទួលប្រាក់សំណងការខូចខាតនឹងជម្ងឺចិត្តរហូតដល់ ៤០៣លានអឺរ៉ូដែលចេញសងដោយរតនាគារដ្ឋបារាំង។
តាំងពីនោះមក តុលាការបារាំងនៅតែមិនអស់ចិត្តនិងចោទសួរជានិច្ចថា"ហេតុអ្វីបានជារដ្ឋមន្ត្រីក្រសួងសេដ្ឋកិច្ចបារាំងនេះ ហានធ្វើសេចក្តីសម្រេចចិត្តមួយដែលធ្វើឲ្យបង់ខាតដល់ផលប្រយោជន៍រួមយ៉ាងដូច្នេះ ? លើសពីនេះ គណៈកម្មការស៊ើបអង្កេតរបស់តុលាការសាធារដ្ឋបារាំង បានស្តីបន្ទោសលោកស្រី Christine Lagarde ដែលឥឡូវ មានអាយុ ៦០ ឆ្នាំ ថាលោកស្រី ហ៊ានធ្វើសេចក្តីសម្រេចចិត្តមួយ ដោយប្រញាប់ប្រញាល់ពុំមានការគ្រប់គ្រងឲ្យបានល្អត្រឹមត្រូវ។ គណៈកម្មការស៊ើបអង្កេត ថែមទាំងបានស្តីបន្ទោសយ៉ាងខ្លាំងដែរចំពោះឥរិយាបថមួយរបស់លោកស្រីដែលតុលាការវិនិច្ឆ័យថា ជាការសម្រេចចិត្តមួយដែលប្រកបដោយភាពខ្វះការទទួលខុសត្រូវនិងដែលធ្វើឲ្យស្ថាប័នរដ្ឋ រងគ្រោះនិងខាតបង់លុយកាក់យ៉ាងសម្បើម។
នៅក្នុងបញ្ហានេះ លោកស្រី Christine Lagarde អាចនឹងត្រូវជាប់ពន្ធនាគាររហូតដល់មួយឆ្នាំនិងត្រូវបង់ពិន័យប្រាក់ចំនួន១ម៉ឺន៥០០០អឺរ៉ូ បើសិនជាតុលាការរកឃើញថាលោកស្រីបានប្រព្រឹត្តកំហុសពិតមែននោះ។
ក្នុងពេលនេះ គេនៅពុំទាន់ដឹងថា ប្រធានអគ្គនាយកអង្គការមូលនិធិរូបិយវត្ថុអន្តរជាតិ FMI មានប្រតិកម្មបែបណានៅឡើយទេ បើសិនជាមានការផ្តន្ទាទោសទៅលើរូបគាត់។ តែចំពោះអង្គការ FMI វិញនៅតែមានទំនុកទុកចិត្តជានិច្ចទៅលើរូបលោកស្រី Christine Lagarde ដែលទើបនឹងបន្តមុខដំណែងរបស់ខ្លួនជាថ្មី ជាប្រធានអង្គការFMI ឡើងវិញ។ សូមបញ្ជាក់ថា តុលាការបារាំង គ្រោងនឹងចេញសាលក្រមនៅថ្ងៃទី២០ធ្នូខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ