អាល្លឺម៉ង់កំណត់បានអត្តសញ្ញាណជនសង្ស័យថ្មីដែល បើកឡានកិនមនុស្ស នៅផ្សារណូអែល
អាជ្ញាធរអាល្លឺម៉ង់ នៅថ្ងៃពុធទី២១ធ្នូបានបើកប្រតិបត្តិការ តាមប្រមាញ់ភេរវជនដែលបានបើកឡានកាំមីញ៉ុង សម្លាប់មនុស្ស១២នាក់ នៅផ្សារណូអែល ក្នុងក្រុងប៊ែរឡាំង។ តាមសមាជិកសភាអាល្លឺម៉ង់ ជនដែលប៉ូលិសអាល្លឺម៉ង់ ជាប់សង្ស័យធ្វើភេរវកម្មនៅផ្សារណូអែល កាលពីយប់ថ្ងៃចន្ទ ជាជនជាតិ ទុយនេស៊ី ដែលប៉ូលិសអាល្លឺម៉ង់ជឿថា មានជាប់ទាក់ទងនឹងក្រុមអ៊ីស្លាមជ្រុលនិយម សាឡាហ្វ៊ីស។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីជូនដំណឹង តាមរកចាប់ខ្លួន ជនសង្ស័យថ្មី ម្នាក់ ត្រូវបានអាជ្ញាធរអាល្លឺម៉ង់ ផ្សព្វផ្សាយនៅទូទាំងអាល្លឺម៉ង់ ហើយនិងនៅក្នុងតំបន់ស្ហិនហ្គេនរបស់អឺរ៉ុប។ រដ្ឋមន្រ្តីមហាផ្ទៃអាល្លឺម៉ង់មិនបានបញ្ជាក់លំអិតពីអត្តសញ្ញាណរបស់ជនសង្ស័យថ្មី ដែលប៉ូលិសកំពុងតាមរកមុខនោះទេ ប៉ុន្តែ កាសែតអាល្លឺម៉ង់ដែលបានដកស្រង់សំដីរបស់ប៉ូលិសស៊ើបអង្កេត ហើយនិងសមាជិកសភា អាល្លឺម៉ង់ បានសរសេរនៅថ្ងៃពុធថា ជនសង្ស័យដែលប៉ូលិសតាមចាប់ខ្លួនជាជនជាតិទុយនីស៊ី ដែលមានអាយុ ចន្លោះ ២១ និង២៣ឆ្នាំ។
ប៉ូលិសអាល្លឺម៉ង់អាចកំណត់បានមុខជនសង្ស័យ តាមរយៈ អត្តសញ្ញាណប័ណ្ណដែលគេរកឃើញនៅធ្លាក់ ក្រោមកៅអីរបស់អ្នកបើកបរឡាន កាំមីញ៉ុងដែលភេរវជនបានបើកកិន សម្លាប់មនុស្សនៅផ្សារណូអែលនៅយប់ថ្ងៃចន្ទ នៅប៊ែរឡាំង។ តាមមន្រ្តីស៊ើបអង្កេត ដែលបាននិយាយប្រាប់កាសែតអាល្លឺម៉ង់ ជនសង្ស័យ សញ្ជាតិទុយនីស៊ី ធ្លាប់បានដាក់ពាក្យសុំសិទ្ធិជ្រកកោន ក្នុងទឹកដីអាល្លឺម៉ង់ កាលពីខែមេសា ឆ្នាំនេះ។ ប៉ុន្តែ តុលាការអាល្លឺម៉ង់បានបដិសេធ។ ក្រៅតែពីជាមុខសញ្ញា តាមចាប់ខ្លួន ក្លែងបន្លំឯកសារអត្តសញ្ញាណបណ្ណ ជនសង្ស័យធ្លាប់ត្រូវបានប៉ូលិសនៅខេត្តភាគខាងជើងអាល្លឺម៉ង់ Rhénanie-du-Nord-Westphalie សង្ស័យថា មានជាប់ទាក់ទងនឹងបណ្តាញអ៊ីស្លាមជ្រុលនិយម ដែលមានតួនាទីរើសសមាជិកឲ្យក្រុមជីហាត អង្គការរដ្ឋអ៊ីស្លាម ក្នុងទឹកដីអាល្លឺម៉ង់។
តាមមន្រ្តីស៊ើបអង្កេតអាល្លឺម៉ង់ នៅមុនពេលធ្វើភេរវកម្ម បើកឡានកិនសម្លាប់មនុស្សនៅផ្សារណូអែល ទៅទៀត ជនសង្ស័យទុយនីស៊ី ដែលប៉ូលិសអាល្លឺម៉ង់ជឿថា គ្រោះថ្នាក់ មានអាវុធ គំរាមកំហែងសន្តិសុខអាល្លឺម៉ង់ តាមពិតកំពុងស្ថិតនៅក្នុងបញ្ជីតាមដានរបស់ចារកិច្ចអាល្លឺម៉ង់ សង្ស័យថា គេកំពុងមានគម្រោង រៀបចំធ្វើភេរវកម្ម ប្រឆាំងអាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ