ភេរវកម្មនៅអាល្លឺម៉ង់៖ប៉ូលិសថា បុរសដែលក្របួច ក បានមិនច្បាស់ជាអ្នកបើកឡានកាមីញ៉ុងទេ
នៅក្នុងប្រទេសអាល្លឺម៉ង់ មួយថ្ងៃក្រោយទង្វើភេរវកម្មបើកឡានកាមីញ៉ុងកិនមនុស្សស្លាប់នៅទីលានផ្សារណូអែលក្នុងក្រុងប៊ែរឡាំងកាលពីយប់ថ្ងៃចន្ទ ទី២០ ធ្នូមក ប៉ូលិសអាល្លឺម៉ង់បានបញ្ជាក់ឲ្យដឹងនារសៀលថ្ងៃអង្គារ ទី២០ ធ្នូថា អ្នកសុំសិទ្ធិជ្រកកោណជនជាតិប៉ាគីស្ថានម្នាក់ដែលប៉ូលិសបានចាប់ខ្លួនអាចមិនមែនជាអ្នកបើកឡានកាមីញ៉ុងនោះទេ មានន័យថា ជនជាតិប៉ាគីស្ថានរូបនោះអាចមិនជាប់ពាក់ព័ន្ធនឹងភេរវកម្ម ហើយអ្នកបើកឡានកាមីញ៉ុងពិតប្រាកដប្រហែលជាកំពុងបន្តរត់គេចខ្លួន។
ចុះផ្សាយនៅថ្ងៃ៖
ស្តាប់ - ០២:១៧
ពីដំបូងនាពេលថ្ងៃត្រង់ក្នុងថ្ងៃអង្គារ ទី២០ ធ្នូ លោករដ្ឋមន្រ្តីក្រសួងមហាផ្ទៃអាល្លឺម៉ង់ Thomas de Maizière បានប្រាប់ឲ្យដឹងថា បុរសដែលកម្លាំងប៉ូលិសព័ទ្ធចាប់ក្របួច កបាននៅប៉ុន្មាននាទីក្រោយហេតុការណ៍នោះ គឺជាជនជាតិប៉ាគីស្ថានដែលមកដល់ទឹកដីអាល្លឺម៉ង់ក្នុងថ្ងៃទី៣១ ធ្នូ ឆ្នាំ ២០១៥ និងបានដាក់ពាក្យអ្នកសុំសិទ្ធិជ្រកកោណក្នុងទីក្រុងប៊ែរឡាំងក្នុងខែកុម្ភៈដើមឆ្នាំ ២០១៦ នេះ។ តែឆ្លើយនៅមុខប៉ូលិស ជនជាតិប៉ាគីស្ថានរូបនោះបានឆ្លើយបដិសេធយ៉ាងដាច់អហង្ការថា ខ្លួនមិនមានជាប់ពាក់ព័ន្ធនឹងរឿងបើកឡានកាមីញ៉ុងទៅកិនមនុស្សនៅទីផ្សារណូអែលនោះទេ នេះបើតាមសម្តីរបស់លោក Thomas de Maizière។
រូបរដ្ឋមន្រ្តីក្រសួងមហាផ្ទៃបានបន្ថែមថា ការស៊ើបអង្កេតកំពុងបន្ត និងថា នៅមិនទាន់មានជន ឬចលនាណាចេញមុខសារភាពជាស្នាដៃរបស់ខ្លួនទេ។ តែគួរឲ្យភ្ញាក់ផ្អើល មេប៉ូលិសទីក្រុងប៊ែរឡាំងបែរជាបានចេញមុខសារភាពនៅពេលរសៀលក្នុងថ្ងៃអង្គារ ទី២០ ធ្នូដដែលថា ជនជាតិប៉ាគីស្ថានដែលចាប់ខ្លួនរូបនោះមិនច្បាស់ជាអ្នកបើកឡានកាមីញ៉ុងទេ។ ក្នុងពេលជាមួយគ្នានោះ ប៉ូលិសបានអំពាវនាវលើបណ្តាញសង្គម Twitter ឲ្យមានការប្រុងប្រយ័ត្ន និងថា តួអង្គពិតដែលបានបង្កភេរវកម្មអាចកំពុងបន្តគេចខ្លួននៅឡើយ។
ដោយឡែក ប្រភពមិនបញ្ចេញឈ្មោះមួយនៅផ្ទៃក្នុងប៉ូលិសអាល្លឺម៉ង់បានបញ្ជាក់ប្រាប់សារព័ត៌មានអាល្លឺម៉ង់ឈ្មោះ Die Welt ដោយសម្តីដើមថា « យើងបានចាប់មនុស្សខុស។ ជនដៃដល់ពិតប្រាកដកំពុងបន្តមានសេរីភាព និងមានអាវុធដែលអាចបង្កភេរវកម្មថ្មីទៀត »។ ឃើញថាមួយថ្ងៃក្រោយភេរវកម្ម មានព័ត៌មានច្របូកច្របល់ខ្លាំងទាក់ទងនឹងជនដល់ដៃពិតប្រាកដ ពិសេសមិនដឹងថា តើមានមនុស្សប៉ុន្មានដែលបានចូលរួមនៅក្នុងអំពើភេរវកម្មនោះ។
សូមជម្រាបជូនថា ការផ្ទុះចេញនូវព័ត៌មានស្រពិចស្រពិលជុំវិញជនដៃដល់ពេលនេះក៏ដោយសារថា បុរសជនជាតិប៉ាគីស្ថានដែលកម្លាំងប៉ូលិសបានដេញក្របួច ក នៅប៉ុន្មាននាទីក្រោយហេតុការណ៍នោះ មិនមែនដោយសារប៉ូលិសបានឃើញបុរសនោះលោតចុះពីលើឡានកាមីញ៉ុងដោយផ្ទាល់ទេ តែបានដេញស្វែងរកចាប់តាមការស្រែកចង្អុលបង្ហាញរបស់សាក្សីម្នាក់តាមទូរស័ព្ទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ