អាល្លឺម៉ង់៖៣ថ្ងៃ ក្រោយភេរវកម្ម រដ្ឋាភិបាលជាប់ចោទពីបទធ្វេសប្រហែសផ្នែកសន្តិសុខ !
ចុះផ្សាយនៅថ្ងៃ៖
ស្តាប់ - ០៦:៤៤
នៅក្នុងប្រទេសអាល្លឺម៉ង់ ៣ថ្ងៃក្រោយភេរវកម្មប្រើឡានកាមីញ៉ុងកិនសម្លាប់មនុស្ស ១២នាក់ និងរបួស ៤៨នាក់ក្នុងទីក្រុងប៊ែរឡាំងមក យុទ្ធនាការតាមរកចាប់ជនសង្ស័យអានីស អាមរី (Anis Amri) ដែលជាជនជាតិទុយណេស៊ីកំពុងបន្តមាននៅក្នុងទឹកដីអាល្លឺម៉ង់ និងនៅក្នុងទឹកដីនៃប្រទេសអឺរ៉ុបផ្សេងទៀតដែលស្ថិតក្នុងលំហស្ហិនហ្គេន។ តែទន្ទឹមគ្នានេះ រដ្ឋាភិបាលអាល្លឺម៉ង់របស់លោកស្រីនាយករដ្ឋមន្រ្តីអង់ហ្កឺឡា ម៊ែរកិលបាន និងកំពុងទទួលរងការរិះគន់ ទិតៀនកាន់តែខ្លាំងពីបទធ្វេសប្រហែសផ្នែកសន្តិសុខ និងនយោបាយសណ្តោសប្រណីជ្រុលចំពោះជនភៀសខ្លួន។
តាំងពីថ្ងៃពុធឈានចូលថ្ងៃព្រហស្បតិ៍ ទី២២ ធ្នូ ប្រតិបត្តិការតាមរកចាប់ជន អានីស អាមរីកំពុងបន្តធ្វើយ៉ាងសកម្មទាំងនៅក្នុងប្រទេសអាល្លឺម៉ង់ ក៏ដូចជានៅក្នុងបណ្តាប្រទេសអឺរ៉ុបផ្សេងទៀតដែលស្ថិតក្នុងលំហស្ហិនហ្គេន។ សូមជម្រាបជូនថា គឺនៅវេលាម៉ោងជាង ៦ល្ងាចថ្ងៃពុធ ទី២១ ធ្នូ ម៉ោងក្នុងប្រទេសអាល្លឺម៉ង់ដែលប៉ូលិសព្រហ្មទ័ណ្ឌអាល្លឺម៉ង់បានផ្សព្វផ្សាយជាផ្លូវការនូវសេចក្តីប្រកាសតាមចាប់ខ្លួនជនសង្ស័យមានឈ្មោះអានីស អាមរីដែលកើតក្នុងប្រទេសទុយណេស៊ី មានអាយុ ២៤ឆ្នាំ មានកម្ពស់ ១៧៨សង់ទីម៉ែត្រ មានទម្ងន់ប្រមាណជា ៧៨គីឡូក្រាម មានភ្នែកពណ៌ត្នោត និងមានសក់ពណ៌ខ្មៅ។
សេចក្តីប្រកាសបានភ្ជាប់ជាមួយនូវរូបថតរបស់អានីស អាមរីដោយសរសេរនៅពីក្រោមថា « សូមប្រយ័ត្ន មនុស្សនេះអាចបង្កគ្រោះថ្នាក់ និងមានអាវុធ »។ ទន្ទឹមគ្នានេះ រដ្ឋអំណាចអាល្លឺម៉ង់ក៏បានប្រគល់រង្វាន់ជាលុយចំនួន ១០០ ០០០អឺរ៉ូដល់អ្នកណាដែលអាចផ្តល់ព័ត៌មានឈានដល់ការក្របួច ក ជនអានីស អាមរី។ គួរបញ្ជាក់ជូនថា ការស្វែងរកចាប់អានី អាមរីបានធ្វើឡើង បន្ទាប់ពីប៉ូលិសអាល្លឺម៉ង់បានរកឃើញអត្តសញ្ញាណប័ណ្ណរបស់ជននេះនៅក្រោមកៅអីរបស់អ្នកបើកបរឡាន កាំមីញ៉ុងដែលកិន សម្លាប់មនុស្សនៅផ្សារណូអែលកាលពីយប់ថ្ងៃចន្ទ ទី១៩ ធ្នូ។
យោងតាមរដ្ឋអំណាចអាល្លឺម៉ង់ អានីស អាមរីបានដាក់ជើងជាន់ទឹកដីអាល្លឺម៉ង់ក្នុងខែមិថុនា ឆ្នាំ ២០១៥ និងបានដាក់ពាក្យសុំសិទ្ធិជ្រកកោណក្នុងខែមេសា ឆ្នាំ ២០១៦ តែត្រូវបានតុលាការបដិសេធក្នុងខែមិថុនាកន្លងទៅ។ នៅក្នុងប្រទេសអាល្លឺម៉ង់ អានីស អាមរីបានស្នាក់នៅដំបូងក្នុងខេត្តភាគខាងជើងប្រទេស បន្ទាប់មកក្នុងទីក្រុងប៊ែរឡាំង តែស្នាក់នៅក្នុងទីក្រុងប៊ែរឡាំងច្រើនជាងគេ។
ព័ត៌មានលំអិតទាក់ទងនឹងអានីស អាមរី
នៅក្នុងរយៈពេលស្នាក់នៅលើទឹកដីអាល្លឺម៉ង់ ជនអានីស អាមរីបានប្រើអត្តសញ្ញាណខុសៗគ្នាយ៉ាងតិច ៦លើកនារយៈពេលជាង ១៧ខែចុងក្រោយនេះ។ ប្រភពខ្លះថាអានីស អាមរីបានប្រើឈ្មោះ Ahmad Zaghloul ខ្លះទៀតថា ឈ្មោះ Mohamed Hassa។ ខ្លះថា ជាជនជាតិអេហ្ស៊ីប ខ្លះទៀតថា ជាជនជាតិលីបង់។ ជាទូទៅ ពត៌មានទាក់ទងនឹងជនអានីស អាមរីត្រូវបានបណ្តាញសារព័ត៌មានអាល្លឺម៉ង់ចុះផ្សាយច្រើន។ សារពត៌មានភាគច្រើនបានបញ្ជាក់ថា តាំងពីខែមីនាមក ជនអានីស អាមរីបានស្ថិតក្នុងបញ្ជីឈ្មោះមនុស្សប្រមាណជា ៥៥០នាក់ដែលរដ្ឋអំណាចអាល្លឺម៉ង់ចាត់ទុកជាជនប្រកបដោយគ្រោះថ្នាក់ខ្លាំង។ កាសែតប្រចាំថ្ងៃអាល្លឺម៉ង់មួយបានអះអាងថា ប៉ូលិសក៏បានដឹងពីចេតនាចង់បង្កភេរវកម្មរបស់អានីស អាមរីដែរនាពេលកន្លងមក។
រដ្ឋអំណាចអាល្លឺម៉ង់ដឹងច្បាស់ថា ជនអានីស អាមរីប្រហែលជាមានទំនាក់ទំនងជាមួយជន Ahmad Abdelaziz អ្នកកាន់សាសនាអ៊ីស្លាមនិយមជ្រុលរស់ក្នុងទឹកដីអាល្លឺម៉ង់ និងដែលសកម្មខ្លាំងនៅលើបណ្តាញសង្គម Facebook។ គឺជន Ahmad Abdelaziz រូបនេះហើយដែលប៉ូលិសបានចាប់ខ្លួននាដើមខែវិច្ឆិកាពីបទបានឃោសនាជ្រើសរើសយុទ្ធជនជីហាតឲ្យទៅចូលរួមជាមួយអង្គការរដ្ឋអ៊ីស្លាមក្នុងប្រទេសអ៊ីរ៉ាក់ និងស៊ីរី។ ប្រភពពត៌មានខ្លះបានឲ្យដឹងថា មានមនុស្សជំនិតរបស់ ជន Ahmad Abdelaziz យ៉ាងតិច ២នាក់បានជួយធ្វើក្រដាសស្នាមស្នាក់នៅក្លែងក្លាយឲ្យជនអានីស អាមរី។
ក្រៅពីមានឈ្មោះមិនល្អនៅក្នុងទឹកដីអាល្លឺម៉ង់ ជនអានីស អាមរីក៏ធ្លាប់មានឈ្មោះអាក្រក់នៅក្នុងប្រទេសផ្សេងដែរ។ ជាក់ស្តែង ជនអានីស អាមរីធ្លាប់ជាប់គុក ៤ឆ្នាំក្នុងប្រទេសអ៊ីតាលីពីបទដុតសាលារៀន មុននឹងដាក់ជើងជាន់ទឹកដីអាល្លឺម៉ង់ នេះបើតាមសារព័ត៌មានអ៊ីតាលី។ អានីស អាមរីធ្លាប់ដេកក្នុងគុកនៅទុយណេស៊ីពីបទប្លន់។ កាសែតអាមេរិក New York Times បានឲ្យដឹងថា អានីស អាមរីត្រូវបានរដ្ឋអំណាចអាមេរិកដឹងថា ធ្លាប់ទាក់ទងយ៉ាងតិច ១ដងជាមួយអង្គការរដ្ឋអ៊ីស្លាម និងធ្លាប់បានស្វែងរកលើគេហទំព័រពីរបៀបធ្វើជាតិផ្ទុះ។
ប្រព័ន្ធសន្តិសុខអាល្លឺម៉ង់មានភាពចន្លោះប្រហោង និងធ្វេសប្រហែស !
រដ្ឋាភិបាលអាល្លឺម៉ង់របស់លោកស្រីនាយករដ្ឋមន្រ្តីអង់ហ្កឺឡា មែរកិលកំពុងទើសទាល់ចិត្ត និងកំពុងទទួលរងការរិះគន់ ទិតៀនយ៉ាងខ្លាំង។ ទើសទាល់ចិត្តខ្លាំងក៏ដោយសារថា ទី១ ប៉ូលិសនៅមិនទាន់អាចក្របួច ក ជនអានីស អាមរីបាននៅឡើយ ហើយដែលជននេះអាចនឹងបង្កភេរវកម្មថ្មីទៀត និងទី២ ប៉ូលិសដឹងថា អានីស អាមរីជាជនគ្រោះថ្នាក់ខ្លាំង ចុះហេតុអ្វីបានជាទុកបណ្តោយឲ្យមានសេរីភាពរស់នៅស្រួលរហូតបង្កភេរវកម្មដោយជោគជ័យនៅពេលនេះ។
តើនេះជាការធ្វេសប្រហែស ឬមួយជាការមើលស្រាលរបស់រដ្ឋអំណាច?។ យ៉ាងណាក៏ដោយ ភេរវកម្មថ្មីនេះជាសក្ខីកម្មដែលបញ្ជាក់យ៉ាងច្បាស់ពីចន្លោះប្រហោងនៅក្នុងប្រព័ន្ធសន្តិសុខអាល្លឺម៉ង់។ គ្រប់គ្នា រួមទាំងពលរដ្ឋអាល្លឺម៉ង់ផងបានចោទសួរថា បើប៉ូលិសដឹងអានីស អាមរីជាជនគ្រោះថ្នាក់ និងមានបំណងបង្កភេរវកម្ម ចុះហេតុអ្វីមិនឃុំជននោះ តែបែរជាទុកបណ្តោយឲ្យរស់នៅមានសេរីភាពពេញលេញយ៉ាងនេះ?។
មានការលើកឡើងទៀតថា នៅក្រោយបដិសេធមិនឲ្យសិទ្ធិជ្រកកោណ ម្តេចក៏មិនចាប់បញ្ជូនចេញពីប្រទេសភ្លាមៗទៅ។ ក្រៅពីបញ្ហាសន្តិសុខ ការរិះគន់ ទិតៀនក៏មានលើលោកស្រីអង់ហ្កឺឡា មែរកិលទាក់ទងនឹងនយោបាយអន្តោប្រវេសន៍សណ្តោសប្រណី និងចិត្តមេត្តាករុណាដែលលោកស្រីបានបើកទ្វារទទួលជនភៀសខ្លួនដោយមិនរើសមុខកាលពីឆ្នាំ ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ