តួកគីបើកសវនការដំបូងប្រឆាំងនឹងក្រុមអ្នកធ្វើរដ្ឋប្រហារមិនសម្រេច
៥ខែក្រោយរដ្ឋប្រហារទម្លាក់ប្រធានាធិបតីអែរដូហ្កាន មិនសម្រេច ដល់វេលាដែលត្រូវអារកាត់ទោស តាមផ្លូវតុលាការ។ សវនការជាច្រើន បានចាប់បើក ជាបន្តបន្ទាប់ នៅតាមខេត្តក្រុងជាច្រើនរបស់តួកគី។ នៅថ្ងៃអង្គារនេះ តុលាការក្រុងអ៊ីស្តង់ប៊ូល ក៏បានបើកសវនការដំបូងរបស់ខ្លួនដែរ ដោយសំដៅកាត់ទោសប៉ូលិសជិត៣០នាក់ ចំពោះសកម្មភាពប៉ុនប៉ងធ្វើរដ្ឋប្រហារ កាលពីថ្ងៃទី ១៥ កក្កដា ២០១៦។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
នៅក្នុងចំណោមជនជាប់ចោទ២៩នាក់ ជាប៉ូលិស ដែលតុលាការតួកគីបើកសវនការនៅថ្ងៃនេះ មាន២១នាក់ អាចនឹងត្រូវជាប់ទោសក្នុងពន្ធនាគារអស់មួយជីវិត ពីបទ ប៉ុនប៉ងផ្តួលរំលំសណ្តាប់ធ្នាប់ធម្មនុញ្ញ ផ្តួលរំលំរដ្ឋាភិបាល ឬរំខានរដ្ឋាភិបាលមិនឱ្យបំពេញការងារ។ ៨នាក់ផ្សេងទៀត អាចនឹងត្រូវជាប់ទោសរហូតទៅ១៥ឆ្នាំ ក្នុងពន្ធនាគារ ពីបទជាប់ពាក់ព័ន្ធនឹងអង្គការភេរវនិយមប្រដាប់អាវុធ។
ក្រៅពីនោះ នៅមាន អ្នកបើកឧទ្ធម្ភាគចក្របីនាក់ នៃស្នងការប៉ូលិស ក៏នឹងអាចត្រូវជាប់ចោទ ពីបទបានបដិសេធមិនទទួលដឹកក្រុមកម្លាំងពិសេសទៅការពារវិមានប្រធានាធិបតីប៉ូលិសជាច្រើននាក់ផ្សេងទៀត បានជាប់ចោទពីបទមិនគោរពបញ្ជាថ្នាក់លើ ក្នុងការបង្ក្រាបពួកចង់ធ្វើរដ្ឋប្រហារ និងពីបទបានញុះញង់បំបាក់ទឹកចិត្តចលនាប្រជាជន តាមប្រព័ន្ធសង្គម មិនឱ្យប្រឆាំងនឹងការធ្វើរដ្ឋប្រហារ។
ប៉ូលិស២៤នាក់ផ្សេងទៀត កំពុងស្ថិតក្នុងស្ថានភាពជាប់សង្ស័យនៅឡើយ ប៉ុន្តែពួកគេត្រូវបានបញ្ជូនយកទៅដាក់ក្នុងមន្ទីរឃុំឃាំងជាបណ្តោះអាសន្នហើយ។ ក្នុងនោះមានម្នាក់ បានរត់គេចខ្លូន ឯអ្នកផ្សេងស្ថិតក្រោមការតាមដានរបស់តុលាការទាំងអស់។ នេះបើតាមប្រព័ន្ធឃោសនាព័ត៌មានតួកគី។
សូមបញ្ជាក់ថា រដ្ឋប្រហារមិនសម្រេច នៅតួកគី កាលពីថ្ងៃទី ១៥ កក្កដា ២០១៦ បានបង្កឱ្យមានមនុស្សស្លាប់២៧០នាក់ និងជាងពីរពាន់នាក់របួស។ រដ្ឋាភិបាលរបស់លោកប្រធានាធិបតី អ៊ែរដូហ្កាន ដែលអាចឈរជើងជាប់ បានចោទប្រកាន់ប្រមុខជ្រុលនិយមអ៊ីស្លាម Fethullah Gulen នៅសហរដ្ឋអាមេរិក ថាជាអ្នកនៅពីក្រោយរដ្ឋប្រហារនោះ និងបានធ្វើការចាប់ខ្លួនមនុស្សជាទ្រង់ទ្រាយធំ នៅក្នុងគ្រប់ស្ថាប័ន ប៉ូលិស យោធា ស៊ីវិល និងរហូតដល់ពិភពអ្នកជំនួញទៀត ប្រមាណ៤១០០០នាក់។ ការចាប់ខ្លួននៅបន្តធ្វើទៀត មកទល់នឹងពេលនេះ។
សវនាការជាច្រើនផ្សេង ក្នុងក្របខ័ណ្ឌអង្កេតរដ្ឋប្រហារមិនសម្រេច ត្រូវបើក បន្ទាប់ពីសវនការថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ