លោកFathullah Gülen អំពាវនាវឲ្យមានការស៊ើបអង្កេតអន្តរជាតិ ជុំវិញរដ្ឋប្រហារមិនបានសម្រេចនៅតួកគី
ចុះផ្សាយនៅថ្ងៃ៖
ស្តាប់ - ០៧:០១
លោក ហ្វាទូឡា ហ្គូលេន (Fathullah Gülen) ដែលត្រូវបានរដ្ឋាភិបាលតួកគី ចោទថាជាមេដើមគំនិតបង្ករដ្ឋប្រហារកាលពីថ្ងៃទី១៥កក្កដានោះ នៅតែបដិសេធ ថាខ្លួនមិនមានជាប់ពាក់ព័ន្ធនឹងការធ្វើរដ្ឋប្រហារទេ ហើយបានអំពាវនាវ នៅថ្ងៃទី១៣ សីហានេះថា សូមឲ្យមានការស៊ើបអង្កេត ជាលក្ខណៈអន្តរជាតិ និងដោយឯករាជ្យ ដើម្បីស្វែងរកអ្នកទទួលខុសត្រូវពិតប្រាកដជុំវិញការធ្វើរដ្ឋប្រហារ។ បច្ចុប្បន្ន លោកហ្វាទូឡា ហ្គូលេន កំពុងស្នាក់នៅក្នុងសហរដ្ឋអាមេរិក ហើយ រដ្ឋាភិបាលតួកគី កំពុងតែទទូចទាមទារឲ្យអាមេរិក ប្រគល់ខ្លួនលោកហ្គូលេន មកឲ្យតួកគី ដើម្បីទទួលការកាត់ទោស។
អស់រយៈពេលជិតមួយខែ ហើយដែលរដ្ឋប្រហារយោធាមិនបានសម្រេច នៅតួកគីបានកើតឡើង។ ជិតមួយខែមកនេះ មនុស្សតែម្នាក់គត់ ដែលបានរងសំពាធខ្លាំងជាងគេ ដោយត្រូវរដ្ឋាភិបាលលោក អ៊ែរដូហ្កាន់ ចោទថាជាមេគំនិតធ្វើរដ្ឋប្រហារនោះ គឺលោក ហ្វាទូឡា ហ្គូលេន ដែលជាមគុទេសន៍សាសនាអ៊ីស្លាម និងនយោបាយដ៏ល្បីបំផុតរបស់តួកគី។
ប៉ុន្តែសម្រាប់លោក Fathullah Gülen គឺគាត់បានបដិសេធរាល់ការចោទប្រកាន់ទាំងអស់ ហើយបានថ្កោលទោសរដ្ឋាភិបាលលោកអ៊ែដូហ្កាន់ ថាបានរៀបចំឆាកល្ខោន ដើម្បីចាប់ខ្លួនលោក និងបោសសម្អាតចលនានយោបាយ និងបញ្ញាវន្តប្រឆាំងតែប៉ុណ្ណោះ។
Fathullah Gülenទាមទារឲ្យបង្កើតក្រុមស៊ើបអង្កេតអន្តរជាតិ និងឯករាជ្យ៖
កាលពីថ្ងៃទី ១២ សីហា លោក Fathullah Gülen បានធ្វើលិខិតចំហរមួយ ផ្ញើរមកកាន់សារព័ត៌មានដ៏ល្បីរបស់បារាំង ឈ្មោះ Le Monde ដែលក្នុងលិខិតនេះ គាត់បានធ្វើការបញ្ជាក់ ពីភាពស្អាតស្អំរបស់គាត់ ទាក់ទិននឹងអំពើរដ្ឋប្រហារយោធាមិនបានសម្រេច នៅតួកគីកាលពីថ្ងៃទី១៥ កក្កដា ហើយលោកបានអំពាវនាវ ឲ្យបង្កើតគណកម្មការពិសេសមួយ ដើម្បីធ្វើការស៊ើបអង្កេត រកអ្នកទទួលខុសត្រូវពិតប្រាកដ នៃការធ្វើរដ្ឋប្រហារ។
គណកម្មាធិការពិសេសនេះ គឺលោកបានទាមទារឲ្យវាជាការចូលរួម ដោយសហគមអន្តរជាតិ ដើម្បីធានាដល់ឯករាជ្យភាព ក្នុងការស៊ើបអង្កេត។ សម្រាប់លោក Fathullah Gülen ការចោទប្រកាន់ រឺក៏សេចក្តីសម្រេចនានារបស់តុលាការតួកគី គឺគេមិនអាចទទួលយកបានទេ ដោយសារតែតុលាការតួកគី គ្រាន់តែជាអាយ៉ងនយោបាយ របស់រដ្ឋាភិបាលលោកអ៊ែរដូហ្កាន់តែប៉ុណ្ណោះ។
ជាចុងក្រោយ ក្នុងលិខិតនោះ លោក Fathullah Gülen បានសរសេរថា បើសិនជាគណកម្មាធិការស៊ើបអង្កេតអន្តរជាតិ និងឯករាជ្យនេះ ស្រាវជ្រាវឃើញពីភស្តុតាងនានា ដែលបញ្ជាក់ថាលោក ពិតជាអ្នកដឹកនាំធ្វើរដ្ឋប្រហារមែន នោះលោកស្ម័គ្រចិត្តត្រឡប់ទៅតួកគី ហើយប្រគល់ខ្លួនចូលទៅចំពោះមុខតុលាការ ដើម្បីទទួលទោសតាមច្បាប់។
រដ្ឋាភិបាលអាមេរិក កំពុងទ័លច្រក៖
ការសម្រេចចិត្តថាត្រូវប្រគល់ខ្លួនលោកFathullah Gülen ទៅឲ្យតួកគី រឺក៏អត់ គឺជារឿងមួយដែលកំពុងតែធ្វើឲ្យរដ្ឋាភិបាលសហរដ្ឋអាមេរិក ឈឺក្បាលខ្លាំងសម្បើមណាស់។ វាប្រៀបបានដូចជាជញ្ជីងដែលត្រូវថ្លឹងថ្លែង រវាងការការពារតម្លៃយុត្តិធម៌និងប្រជាធិបតេយ្យ ជាមួយនឹងការការពារផលប្រយោជន៍សេដ្ឋកិច្ច និងយុទ្ធសាស្ត្រនយោបាយ ដែលអាមេរិកមានជាមួយនឹងតួកគី។ វាជាជម្រើស ដែលមិនងាយស្រួល ក្នុងការសម្រេចចិត្តទេ។
កាលពី ៣ថ្ងៃមុននេះ រដ្ឋមន្ត្រីក្រសួងយុត្តិធម៌តួកគី បានគំរាមទៅរដ្ឋាភិបាលសហរដ្ឋអាមេរិកថា បើសិនជាអាមេរិក មិនព្រមប្រគល់ខ្លួន មេក្លោងភេរវកម្មទេ គឺអាមេរិកត្រូវត្រៀមខ្លួនខាតបង់ទៅ ជាមួយនឹងទំនាក់ទំនងទ្វេរភាគីក្នុងគ្រប់វិស័យជាមួយនឹងតួកគី។ មេក្លោងភេរវកម្មនេះ គឺគេចង់សំដៅ ទៅលើលោក Fathullah Gülen នេះឯង។ លោកប្រធានាធិបតី អ៊ែរដូហ្កាន់ ធ្លាប់បានចោទប្រកាន់សហរដ្ឋអាមេរិក ថាជាអ្នកចិញ្ចឹមទំនុកបំរុង និងការពារលោក Fathullah Gülen ទៀតផង។ មិនត្រឹមតែប៉ុណ្ណោះ មន្ត្រីរដ្ឋាភិបាលតួកគី បានអះអាងទៀតថា ប្រជាជនតួកគី កំពុងស្អប់ខ្ពើមសហរដ្ឋអាមេរិក ព្រោះអាមេរិកនៅតែបន្តលាក់ជនល្មើស។
យ៉ាងណាក៏ដោយ សម្រាប់លោក Reid Weingarten មេធាវីការពារលោក Fathullah Gülen បានបញ្ជាក់ថា រហូតមកត្រឹមពេលនេះ គឺវាគ្មានភស្តុតាងជាក់ស្តែង អ្វីទាំងអស់ ដែលបញ្ជាក់ពីការជាប់ពាក់ព័ន្ធដោយផ្ទាល់ រឺដោយប្រយោលរបស់កូនក្តីលោក ទៅនឹងការរៀបចំធ្វើរដ្ឋប្រហារ។ ឯកសារនានា ដែលរដ្ឋាភិបាលតួកគីបង្ហាញ គឺវាជាការរៀបចំតម្លើងសុទ្ធសាធ ដែលមិនអាចឲ្យគេជឿទុកចិត្តបានទេ។
កន្លងមក លោកចន ឃែរី ធ្លាប់បានបញ្ជាក់ហើយថា ចង់ឲ្យអាមេរិកប្រគល់ខ្លួន លោក Fathullah Gülen តួកគី ត្រូវប្រគល់ភស្តុតាងជាក់លាក់ ជាមុនសិន។ ហើយតាមការផ្តល់ដំណឹងចុងក្រោយនេះ តួកគី បានបញ្ជូនសំណុំឯកសារចំនួន៨៥កញ្ចប់ ដែលបង្ហាញពីការជាប់ពាក់ព័ន្ធរបស់លោក Fathullah Gülen ទៅនឹងអំពើឧក្រិដ្ឋរដ្ឋប្រហារ។ មន្ត្រីម្នាក់របស់ក្រសួងការបរទេសអាមេរិក បានបញ្ជាក់ថា ក្រសួងយុត្តិធម៌អាមេរិក កំពុងតែពិនិត្យមើលឯកសារទាំងអស់នេះដោយប្រុងប្រយ័ត្នជាទីបំផុត។ តាមប្រភពដដែល បញ្ជាក់ថា សហរដ្ឋអាមេរិក កំពុងតែប្រឈមមុខនឹងកាលៈទេសៈមួយលំបាក នឹងតឹងទ្រូងខ្លាំងណាស់។ តាមពាក្យចចាមអារ៉ាម ពីខាងមន្ត្រីទូតតួកគីថា លោកចន ឃែរី នឹងទៅតួកគីនៅចុងខែសីហានេះ តែយ៉ាងណា ខាងក្រសួងការបរទេសអាមេរិក មិនបានបញ្ជាក់អ្វីទេ។
ទន្ទឹមពេលនេះ ការតាមប្រម៉ាញ់ក្រុមប្រឆាំង កំពុងបន្តយ៉ាងសកម្មនៅតួកគី៖
ចលនាបោសសម្អាត ក្រុមប្រឆាំងគឺនៅតែបន្ត។ ដូចយើងដឹងហើយ ថាមន្ត្រីធំៗ ជាពិសេសទាហាន និងប៉ូលីស មន្ត្រីរដ្ឋការ ក្រសួងនានា ដូចជាក្រសួងយុត្តិធម៌ ក្រសួងអប់រំជាដើម ប្រមាណ ជាង១០ម៉ឺននាក់ ត្រូវបានគេលប់ឈ្មោះចោលពីការងារ ហើយនឹង៤ពាន់នាក់ កំពុងជាប់ឃុំ ដោយពុំបានឆ្លងកាត់ការកាត់ទោសដោយយុត្តិធម៌ទេ។ គ្រូបង្រៀន ប្រមាណជា២ម៉ឺន១ពាន់នាក់ ត្រូវបានគេហាមឃាត់ លែងឲ្យបង្រៀនសិស្ស។
វិស័យអប់រំគឺជាសរសេរដ៏រឹងមាំ របស់បណ្តាញចលនាលោក Fathullah Gülen ដែលបានចាក់ឫស នៅបណ្តាប្រទេសជាច្រើន នៅទូទាំងពិភពលោក។ គ្រាន់តែនៅសហរដ្ឋអាមេរិកមួយ មានសាលាឯកជនដែលជាបណ្តាញរបស់លោក Fathullah Gülen ចំនួនដល់ទៅ១៣០ឯណោះ។ ដូច្នេះហើយ ទើបរដ្ឋាភិបាលលោក អ៊ែរដូហ្កាន់ មានបំណងវាយបំបាក់សរសរទ្រូងនេះ ព្រោះការផ្សព្វផ្សាយគំនិតស្មារតីនយោបាយ គឺធ្វើឡើងនៅតាមសាលារៀន ហើយវាក៏ជាប្រភពប្រាក់ចំណូល របស់បណ្តាញលោក Fathullah Gülen ផងដែរ។
រដ្ឋាភិបាលតួកគី បានទាមទារឲ្យប្រទេសជាច្រើន បិទសាលារៀនតួកគី ដែលជាបណ្តាញរបស់លោក Fathullah Gülen ។ តែភាគច្រើន គេមិនធ្វើតាមទេ លើកលែងតែប្រទេសមួយចំនួនដូចជាអាហ្ស៊ែកបៃហ្សង់ ជាដើម ដែលបានសុខចិត្តចុះចាញ់ ធ្វើតាមការដាក់សំពាធរបស់តួកគី។ ក្រៅពីចំណុចទាំងអស់នេះ រដ្ឋាភិបាលលោកអ៊ែរដូហ្កាន់ បានកោះហៅ និងបញ្ចប់បេសកកម្ម មន្ត្រីការទូតបំរើការតាមស្ថានទូតតួកគី ទូទាំងពិភពលោក ចំនួន២០៨នាក់។ តែក្រសួងការបរទេសតួកគី បានបញ្ជាក់ថ្មីៗនេះថា ក្នុងចំណោម២០៨នាក់នេះ មាន៣២នាក់ បានរត់គេចខ្លួន សំងំលាក់ខ្លួននៅបរទេស មិនព្រមចូលស្រុកទេ។ នៅថ្ងៃសៅរ៍ទី ១៣សីហានេះ តុលាការតួកគីទើបបានចេញដីកាចាប់ខ្លួន កីឡាករបាល់ទាត់ដ៏ល្បីមួយរូបឈ្មោះ Hakan Sükür ដែលគេចោទថាស្និទ្ធស្នាលនិងលោក Fathullah Gülen ។
សូមបញ្ជាក់ដែរថា ប៉ុន្មានសប្តាហ៍ចុងក្រោយនេះ គឺមានការផ្អើលឈូរឆរ ខ្លាំងណាស់ មន្ត្រីទូតណា ដែលដឹងខ្លួន ត្រូវគេកោះហៅ បាននាំក្រុមគ្រួសារ រត់ទៅសុំសិទ្ធិជ្រកកោន ក្នុងប្រទេសផ្សង។ អ្នកខ្លះ បានរត់គេចពីតួកគី ទៅកាន់ប្រទេសជិតខាង ដូចជាអ៊ីតាលី ក្រិកជាដើម។ យើងឃើញថា សកម្មភាពតាមប្រមាញ់បក្សពួកប្រឆាំង គឺធ្វើឡើងគ្រប់ច្រកល្ហក ដែលនេះគឺវាបង្កជាបរិយាកាសភ័យខ្លាច ខ្លាំងណាស់នៅតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ