ប្រធានាធិបតីបារាំង ព្យាករថា ២០១៧ ជាឆ្នាំយកជ័យលើភេរវនិយម
ចុះផ្សាយនៅថ្ងៃ៖
ស្តាប់ - ០៦:២៥
លោកប្រធានាធិបតីបារាំង ហ្វ្រង់ស័រ ហូឡង់ បានបើកទំព័រឆ្នាំថ្មី ២០១៧ ដោយអញ្ជើញទៅបំពេញទស្សនកិច្ចនៅប្រទេសអ៊ីរ៉ាក់ នៅថ្ងៃចន្ទនេះ ដើម្បីលើកទឹកចិត្តដល់ទាហានបារាំង ដែលកំពុងបំពេញបេសកកម្មប្រយុទ្ធប្រឆាំងនឹងពួកអង្គការរដ្ឋអ៊ីស្លាម។ អង្គការរដ្ឋអ៊ីស្លាម ដែលផ្គើនពិភពលោក តាមរយៈអំពើភេរវកម្មមរណៈឥតឈប់ឈរ។ ប៉ុន្តែ លោកប្រធានាធិបតីបារាំង សង្ឃឹមថា ២០១៧នេះ ជាឆ្នាំជោគជ័យលើពួកភេរវនិយម។
អមដំណើរដោយរដ្ឋមន្ត្រីក្រសួងការពារជាតិ លោកហ្វ្រង់ស័រ ហូឡង់ ត្រូវជួបជាដំបូង កងកម្លាំងពិសេសប្រយុទ្ធប្រឆាំងនឹងភេរវកម្ម បន្ទាប់មកទៅជួបកងកម្លាំងពិសេសអ្នកបង្វឹកបង្ហាត់ទាហានគួដឌីស្ថានអ៊ីរ៉ាក់ និង ក៏ត្រូវជួបថ្នាក់ដឹកនាំកំពូលៗរបស់អ៊ីរ៉ាក់។
បារាំងមានទាហានប្រយុទ្ធ កងអាវុធធុនធ្ងន់ប្រមាណជាង៤៥០នាក់ កំពុងធ្វើប្រតិបត្តិការនៅសមរភូមិក្រុងម៉ូស៊ូល ប្រទេសអ៊ីរ៉ាក់ផង មានកងកម្លាំងទ័ពពិសេស ជាគ្រូបង្វិកបង្ហាត់បំពាក់បំប៉នទាហានអ៊ីរ៉ាក់ផង ជាជំនួយក្នុងពេលប្រយុទ្ធផង។ លើសពីនេះទៀត បារាំងមានយន្តហោះចម្បាំង រ៉ាហ្វាល់ ឈរជើងនៅអារ៉ាប់រួម និងហ្ស័កដានី ដែលគិតជាកម្លាំងមានដល់ទៅជាង១២០០នាក់ កំពុងធ្វើប្រតិបត្តិការនៅក្នុងតំបន់ ស្ថិតក្រោមបង្គាប់និងបញ្ជារបស់លោកប្រធានាធិបតី។
បើគិតជាសរុប បារាំងបានផ្តល់ការគាំទ្រយោធាយ៉ាងច្រើនដល់អ៊ីរ៉ាក់ លំដាប់ទីពីរ បន្ទាប់ពីសហរដ្ឋអាមេរិក បើគិតក្នុងរង្វង់សម្ព័ន្ធអន្តរជាតិប្រយុទ្ធប្រឆាំងនឹងពួកអង្គការរដ្ឋអ៊ីស្លាម ដឹកនាំដោយអាមេរិក។
កម្ចាត់ភេរវជននៅអ៊ីរ៉ាក់ បង្ការកុំឱ្យមានភេរវកម្មនៅបារាំង
លោក ហ្វ្រង់ស័រ ហូឡង់ គឺជាប្រមុខដឹកនាំប្រទេសដ៏ធំសំខាន់ជាងគេ តែម្នាក់គត់ក្នុងសម្ព័ន្ធអន្តរជាតិ ដែលបានអញ្ជើញទៅអ៊ីរ៉ាក់ គិតចាប់តាំងពីសម្ព័ន្ធនេះបើប្រតិបត្តិការយោធាមក និងធ្លាប់អញ្ជើញទៅអ៊ីរ៉ាក់ម្តងហើយកាលពីខែកញ្ញា២០១៤។ ពីព្រោះ លោកប្រធានាធិបតី ដែលបានប្រកាសបើកយុទ្ធនាការប្រឆាំងនឹងអំពើភេរវនិយមតាំងពីឆ្នាំ២០១២មក ចង់បញ្ជាក់អំពីមុះមុតរបស់បារាំងក្នុងការប្រយុទ្ធប្រឆាំងនឹងភេរវនិយម ហើយ ការសកម្មភាពយោធារបស់បារាំងនៅអ៊ីរ៉ាក់ ថាជាការពារកុំឱ្យមានភេរវកម្មនៅក្នុងប្រទេសបារាំង។
លោក ហ្វ្រង់ស័រ ហូឡង់ ៖
“ខ្ញុំចង់បង្ហាញថាខ្ញុំគិតដល់ប្រតិបត្តិការ Chammal ប្រឆាំងពួកអង្គការរដ្ឋអ៊ីស្លាមប៉ុណ្ណា ! សូមជូនពរឆ្នាំថ្មី ! ឆ្នាំដែលនាំជោគជ័យទាំងស្រុងលើពួកជីហាតនៅអ៊ីរ៉ាក់។ កម្ចាត់ពួកអង្គការរដ្ឋអ៊ីស្លាមនៅអ៊ីរ៉ាក់ គឺដូចជាបានការពារកុំឱ្យភេរវកម្មនៅក្នុងទឹកដីបារាំង។ ចូលរួមចំណែកស្ថាបនាអ៊ីរ៉ាក់ ឡើងវិញ ក៏ជាលក្ខខណ្ឌបន្ថែមមួយទៀតក្នុងទប់ស្កាត់មិនឱ្យពួកអង្គការរដ្ឋអ៊ីស្លាម អាចបង្កភេរវកម្មក្នុងទឹកដីបារាំងបាន”។
សម្រាប់អ្នកវិភាគនៅស្រុក គេយល់ថា នេះជារឿងធម្មតាទេ ដែលលោកហ្វ្រង់ស័រ ហូឡង់ ផ្តល់តម្លៃដល់ដំណើរទស្សនកិច្ច នៅអ៊ីរ៉ាក់នោះ។ តាមធម្មតា ទស្សនកិច្ចបែបនេះ ត្រូវមានប្រយោជន៍នយោបាយខ្លាំង ប្រសិនបើលោកហ្វ្រង់ស័រ ហូឡង់ ត្រូវឈរឈ្មោះជាប្រធានាធិបតីអាណត្តិថ្មី ប៉ុន្តែពេលនេះ បើទោះបីជាមិនបានប្រយោជន៍បោះឆ្នោតក្តី ក៏លោកហូឡង់ ចង់បង្ហាញអំពីភាពមេដឹកនាំ គិតប្រយោជន៍ជាតិជាខ្ពស់ជាងអ្វីៗទាំងអស់ និងដើម្បីបង្ហាញថាលោកជាប្រធានាធិបតី ជាមេបាដឹកនាំប្រទេស ការពារប្រជាពលរដ្ឋ ជាមេទ័ព ដឹកនាំការគំរាមកំហែងភេរវកម្ម ដែលនៅតែធ្ងន់ធ្ងរខ្លាំង នាបច្ចុប្បន្ននេះ។
មិនសូវមានប្រជាប្រិយភាព នៅក្នុងប្រទេសមែន តែលោកមានកត្តិយសនិងមានស្នាដៃច្រើន ក្នុងកិច្ចការក្រៅប្រទេស ! ពលរដ្ឋបារាំងភាគច្រើន សុទ្ធតែបានទទួលស្គាល់សមត្ថភាពដឹកនាំរបស់លោកលើឆាកអន្តរជាតិ និងក្នុងការធ្វើសង្គ្រាមប្រយុទ្ធប្រឆាំងនឹងពួកភេរវនិយម។ តាំងពីបានក្លាយជាប្រធានាធិបតីមក លោក ហ្វ្រង់ស័រហូឡង់ បាននាំប្រទេសបារាំងទៅចេញធ្វើអន្តរាគមន៍យោធា មួយហើយមួយទៀត មិនដែលមានប្រធានាធិបតីមុនៗណាធ្លាប់ធ្វើឡើយ ដំបូងនៅម៉ាលី បន្ទាប់មកនៅអាហ្វ្រិកកណ្តាល រួចអ៊ីរ៉ាក់ នៅខែកញ្ញា២០១៤ និងស៊ីរី ចាប់ពីខែកញ្ញា ២០១៥។
ភេរវកម្មបំផ្ទុះរថយន្តស្វាគមន៍លោកហូឡង់
ដំណើរទស្សនកិច្ចរបស់លោកហ្វ្រង់ស័រ ហូឡង់ ស្ថិតក្រោមការការពារសន្តិសុខយ៉ាងហ្មត់ចត់បំផុត និងរក្សាកម្មវិធីយ៉ាងសំងាត់រហូតនាទីចុងក្រោយ ព្រោះការគំរាមកំហែងភេរវកម្មមមានកំរិតខ្ពស់ខ្លាំង។ កាលពីពីរថ្ងៃមុន តួកគីបានរងភេរវកម្មដែលជាស្នាដៃរបស់ពួកអង្គការរដ្ឋអ៊ីស្លាម ក្នុងថ្ងៃបុណ្យឆ្លងឆ្នាំសកលតែម្តង។ ហើយក្នុងពេលទន្ទឹមគ្នានេះ ដែរ អ៊ីរ៉ាក់ដែលទើបរងភេរវកម្មកាលពីពីរថ្ងៃមុនដែរ ទើបត្រូវរងភេរវកម្មថ្មីមួយនៅថ្ងៃនេះ ក្រោយពីលោកហ្វ្រង់ស័រ ហូឡង់ ចុះជាន់ទឹកដីអ៊ីរ៉ាក់ បានប៉ុន្មានម៉ោង។ ជាភេរវកម្មបំផ្ទុះរថយន្ត បង្កឡើងដោយពួកអង្គការរដ្ឋអ៊ីស្លាមផ្តាច់ជីវិតមនុស្សយ៉ាងហោចណាស់៣២នាក់ និងរបួសជាង៦០នាក់។
អញ្ចឹងហើយបានជាលោកហ្វ្រង់ស័រ ហូឡង់ ប្រឹងអះអាងបញ្ជាក់ហើយបញ្ជាក់ទៀត អំពីភាពចាំបាច់ក្នុងបន្តប្រឹងប្រែង ធានាសុវត្ថិភាព យូរអង្វែង ក្រោយបរាជ័យរបស់ពួកអង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ