បារាំង៖ប៉ារីសរម្លឹកខួបពីរឆ្នាំនៃភេរវកម្មកាលពីខែមករា ឆ្នាំ ២០១៥
នៅក្នុងប្រទេសបារាំង រដ្ឋាភិបាល និងសាលាក្រុងប៉ារីសបានរៀបចំក្នុងថ្ងៃព្រហស្បតិ៍ ទី៥ មករានូវពិធីគោរពវិញ្ញាណក្ខន្ធដល់ជនរងគ្រោះស្លាប់ក្នុងអំពើភេរវកម្មចំកណ្តាលក្រុងប៉ារីសកាលពី ២ឆ្នាំមុន។ គឺជាអំពើភេរវកម្មវាយប្រហារលើទស្សនាវដ្តីថ្លុកកំប្លែង Charlie Hebdo និងការចាប់មនុស្សធ្វើជាថ្នូររួចសម្លាប់ចោលនៅក្នុងហាងលក់ទំនិញរបស់ជនជាតិជ្វីហ្វ Hyper Cacher។ ពិធីគោរពវិញ្ញាណក្ខន្ធបានចូលរួមដោយចៅហ្វាយក្រុងប៉ារីស និងរដ្ឋមន្រ្តីក្រសួងមហាផ្ទៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
គេពិតជានៅចាំបានមិនភ្លេចកាលពីថ្ងៃទី៧ មករា ឆ្នាំ ២០១៥ ថ្ងៃដែលប្រទេស និងពលរដ្ឋបារាំងបានធ្លាក់ក្នុងអំពើភេរវកម្មយ៉ាងសាហាវដោយចាប់ផ្តើមមុនគេនៅទីស្នាក់ការទស្សនាវដ្តីថ្លុកកំប្លែង Charlie Hebdo។ កាលណោះ បងប្អូនប្រុសបង្កើតជីហាត Kouachi បានលួចចូលក្នុងទីស្នាក់ការ Charlie Hebdo រួចបើកការបាញ់រះដោយបណ្តាលឲ្យស្លាប់មនុស្សចំនួន ១១នាក់ ក្នុងនោះមានអ្នកគូររូបល្បីៗ ដូចយ៉ាងលោក Cabu លោក Wolinksi ឬមួយលោក Charb ជាដើម។ ២ថ្ងៃក្រោយមក ពោលក្នុងថ្ងៃទី៩ មករា ឆ្នាំ ២០១៥ ដដែល មានជីហាតម្នាក់ទៀតឈ្មោះ Amédy Coulibaly បានចាប់មនុស្សធ្វើជាថ្នូរនៅក្នុងហាងលក់ទំនិញ Hyper Cacher របស់ជនជាតិជ្វីហ្វដោយបានសម្លាប់មនុស្ស ៥នាក់។
ក្រោយព្រឹត្តិការណ៍នៅ Charlie Hebdo ភ្លាម បារាំង និងពិភពលោកបានចូលរួមផ្តន្ទាទោសលើទង្វើដ៏ឆ្កួតលីលា ព្រមទាំងចែករំលែកទុក្ខជាមួយក្រុមគ្រួសារជនរងគ្រោះក្រោមសារថា « ខ្ញុំជា Charlie Hebdo »។ នៅក្នុងពិធីរម្លឹកខួបគម្រប់ ២ឆ្នាំនាថ្ងៃព្រហស្បតិ៍ ទី៥ មករា ចៅហ្វាយក្រុងប៉ារីសលោកស្រី Anne Hidalgo និងលោករដ្ឋមន្រ្តីក្រសួងមហាផ្ទៃ Bruno Le Roux បានដាក់កម្រងផ្កានៅពីមុខអតីតអាគាររបស់ Charlie Hebdo និងធ្វើការស្មឹងស្មាតរយៈពេល ១នាទីជាមួយបុគ្គលិករបស់ Charlie Hebdo និងក្រុមគ្រួសារជនរងគ្រោះជិត ឆ្ងាយ រួមទាំងអ្នករស់ក្នុងទីក្រុងប៉ារីសជាច្រើននាក់ផងដែរ។
បន្ទាប់មក ពិធីគោរពវិញ្ញាណក្ខន្ធក៏បានរៀបចំ និងបញ្ចប់នៅមុខហាង Hyper Cacher ស្ថិតជាយក្រុងប៉ារីស។ ដោយឡែក នាឱកាសខួប ២ឆ្នាំនេះ ទស្សនាវដ្តីថ្លុកកំប្លែង Charlie Hebdo បានចេញផ្សាយលេខថ្មីក្រោមចំណងជើងចំអកឡកឡាយថា « ២០១៧ ទីបំផុតបានឃើញចុងនៃរូងភ្នំហើយ» ជាមួយនឹងរូបកំប្លែងដែលមានមនុស្សម្នាក់កំពុងសម្លឹងមើលចុងកាំភ្លើងកាន់ដោយអ្នកកាន់សាសនាអ៊ីស្លាមម្នាក់។ សូមជម្រាបជូនថាជានិច្ចកាល រូបភាពថ្លុកកំប្លែងរបស់ Charlie Hebdo ដែលគូររូបឥស្សរជន ឬអ្នកកាន់សាសនាមានបង្កដោយអត្ថន័យ និងច្រើនបង្កឲ្យមានភាពក្តៅក្រហាយ រួមទាំងទទួលការគំរាមកំហែងពីអ្នកពាក់ព័ន្ធផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ