ភាគីប្រឆាំងស៊ីរី មិនព្រមវត្តមានក្នុងកិច្ចចរចា នៅក្រុង Astana
កិច្ចចរចា ចាត់ចែងឡើងថ្ងៃអង្គារម្សិលមិញ នៅក្រុង Astana លើកនេះជាលើកទី៣ ដោយមានការគាំទ្រ របស់រុស្ស៊ី អ៊ីរ៉ង់ និងតួកគី ស្រាប់តែមិនសម្រេចដូចចិត្ត ដោយមកពី ការធ្វើពហិការ ពីខាងភាគីប្រឆាំងស៊ីរី ដែលសោកស្តាយចំពោះការបន្តទៅនៃការវាយប្រហាររុស្ស៊ី នៅតំបន់កាន់កាប់ដោយពួកឧទ្ទាមស៊ីរី និងចំពោះការមិនសូវអើពើរបស់ម៉ូស្គូ ក្រើនរំលឹក កងទ័ពស៊ីរីឲ្យគោរពតាមបទឈប់បាញ់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ក្នុងឋានៈជាដៃគូដ៏ចម្បងនៃរបបលោកប្រធានាធិបតីស៊ីរី Bachar al Assad រុស្ស៊ី បានសំដែងការងឿងឆ្ងល់ និង ខ្វះជំនឿលើការពន្យល់ ពីខាងពួកឧទ្ទាមស៊ីរីចំពោះ អវត្តមាននេះ។ ចំណែកក្រុង Damas ចោទក្រុង Ankara ថាមិនបំពេញតាមអភិក្រមក្រុង Astana ។ គិតតាំងពីដើមឆ្នាំនេះមក ក្រុង Astana រដ្ឋធានីកាហ្សាក់ស្ថាន បានទទួលពីរលើកទៅហើយ ជំនួបស្តីអំពី ស៊ីរី គឺ កាលពីថ្ងៃ២៣-២៤មករា និង កាលពីកណ្តាលខែកុម្ភៈ ហើយរៀងរាល់តែលើក គឺក្រោមការឧបត្ថម្ភ របស់រុស្ស៊ី អ៊ីរ៉ង់ និង តួកគី។
គោលដៅចោទដោយ ៣ ប្រទេសនេះ គឺពង្រឹងរបបឈប់បាញ់នៅស៊ីរី ដែលបានចូលជាធរមាន កាលពីចុងខែធ្នូ ក្រោយពីកងទ័ពដែលច្បាំងនៅខាងរដ្ឋាភិបាលស៊ីរី បានទទួលជ័យជំនះក្នុងយុទ្ធនាការដណ្តើមយកបានក្រុង Alep ជាក្រុងទី២ ស្ថិតនៅខាងជើងប្រទេសស៊ីរី។
រដ្ឋមន្ត្រីការបរទេសរុស្ស៊ី លោក Serguei Lavrov ម្សិលមិញ បង្ហើបឲ្យដឹងថា លោករដ្ឋមន្ត្រី ការពារជាតិរុស្ស៊ី បានទាក់ទងជាមួយមេបញ្ជាការខ្លះនៃក្រុមពួកឧទ្ទាមស៊ីរី ដែលមិនព្រមទៅ ចូលរួមក្នុងកិច្ចចរចា ទាំងចង្អុលឲ្យឃើញថា ម៉ូស្គូក្តាប់ស្ថានការណ៍ បានពេញទីក្នុងដៃខ្លួន។
ចំណែកអ្នកនាំពាក្យវិមានក្រេមឡាំង លោក Dmitri Peskov ចាត់ទុកស្ថានការណ៍ថា “សាំញ៉ាំ ក្រៃ”។ តាមសំដីគាត់ ៖ បរិបទនៃការពិភាក្សា ធ្លាក់ក្នុងភាពស្មុគស្មាញ ដោយមកពីគោលជំហរ ខុសគ្នាប្រកាន់យកដោយបណ្តាសាមីប្រទេស។ ទោះយ៉ាងណាក្តី ក៏ការងារនៅតែបន្តទៅ។
រីឯ អ្នកនាំពាក្យរបស់ ឧត្តមគណៈកម្មាធិការសម្រាប់ធ្វើកិច្ចចរចា ដែលជាស្ថាប័នកំពូល នៃ ភាគីប្រឆាំង បានបញ្ជាក់ថា ភាគីនេះនៅមិនទាន់ត្រៀមខ្លួនទៅកាន់ក្រុង Astana ទេ ប៉ុន្តែ បានឲ្យតម្រុយ ថាពួកគេអាចប្រែចិត្តគំនិតទេតើ ប្រសិនបើមានចម្លើយពីខាងរុស្ស៊ី ដែលពួកគេនៅរង់ចាំទទួល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ