អង្គការរដ្ឋអ៊ីស្លាមចុះទន់ខ្សោយនៅមូស៊ូល រីឯអាមេរិកបង្កើនចំនួនទ័ពនៅភាគខាងជើងស៊ីរី
ក្រុមប្រដាប់អាវុធជីហាតនៃអង្គការរដ្ឋអ៊ីស្លាម កំពុងតែចុះទន់ខ្សោយនៅចំពោះមុខកងកម្លាំងអ៊ីរ៉ាក់នៅMossoul និងនៅក្រោមសម្ពាធដ៏ធ្ងន់ធ្ងរផងដែរនៅស៊ីរីដែលអាមេរិកនឹងបង្កើនចំនួនយោធារបស់ខ្លួនដើម្បីប្រយុទ្ធកំចាត់ឲ្យខ្ទេចពួកអ៊ីស្លាមជីហាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
យោងតាមអ្នកនាំពាក្យម្នាក់នៃកងយោធាអាមេរិក ទីក្រុងវ៉ាស៊ីនតោន នឹងបញ្ជូនទាហានអាមេរិកចំនួន៤០០នាក់ជាបន្ថែមទៀត ដើម្បីជួយគាំទ្រការវាយប្រយុទ្ធរបស់កងសម្ព័ន្ធភាព Kurdes និង arabes ដែលកំពុងធ្វើការវាយប្រយុទ្ធប្រឆាំងពួកជីហាតនៅ Raqa ដែនអំណាចរបស់អង្គការរដ្ឋអ៊ីស្លាមនៅលើទឹកដីស៊ីរី។ សូមបញ្ជាក់ថា ទាហានអាមរិកជើងមុនដែលមានវត្តមានរួចហើយនៅភាគខាងជើងស៊ីរីនោះ មានគ្នាចំនួន ៥០០នាក់។
ម្យ៉ាងទៀតក្នុងចំណោមទាហានអាមេរិកថ្មីទាំងនោះ មួយភាគជាទាហានម៉ារីនដែលត្រូវដាក់ប្រចាំការនៅតំបន់Raqa។ ទាហានអាមេរិកមួយផ្នែកទៀត ដែលជាកងកម្លាំងពិសេស ត្រូវបញ្ជូនទៅកាន់តំបន់ Minbej ស្ថិតនៅឆ្ងាយបន្តិចក្នុងភាគខាងជើងស៊ីរី ដើម្បីរារាំងទប់បង្អាក់ការវាយប្រយុទ្ធគ្នាដ៏ខ្លាំងក្លារវាងកម្លាំងតួកគីនិងកងសម្ព័ន្ធភាពគឺចលនាឧទ្ទាមស៊ីរី។
គួររំលឹកថា រដ្ឋបាលរបស់លោក Donald Trump បច្ចុប្បន្ននេះ កំពុងតែពិនិត្យពិច្ច័យលើផែនការមួយដើម្បីយកជ័យជំនះទៅលើអង្គការរដ្ឋអ៊ីស្លាម។
ផែនការដែលលោកប្រធានាធិបតីអាមេរិកថ្មី បានសុំស្នើដល់ក្រសួង Pentagone អាមេរិកបន្ទាប់ពីគាត់បានឡើងកាន់មុខតំណែងជាប្រធានាធិបតីអាមេរិក។
នៅ Mossoulក្នុងទឹកដីអ៊ីរ៉ាក់ នៅក្នុងចំណោម ប្រជាជនជាច្រើនរយពាន់នាក់ដែលកំពុងស្ថិត នៅ ម៉ូស៊ូលប៉ែកខាងលិចប្រទេស មានតែប្រជាជន ចំនួន ៥ម៉ឺននាក់ប៉ុណ្ណោះដែលបានភៀសខ្លួនរួចផុតពីក្រញាំរបស់ពួកជីហាតនិងបានចូលទៅដល់ទីជំរំសំរាប់ទទួលជនភៀសខ្លួន។ យោងតាមជនភៀសខ្លួន នៅម៉ូស៊ូល ពួកជីហាតបានយកមនុស្សធ្វើជាខែលពួកវា រីឯជីវភាពរបស់ពួកគេវិញ មានការលំបាកនិងទុក្ខវេទនាយ៉ាងក្រៃលែងដោយសារការអត់ឃ្លាន។
ទន្ទឹមនេះ លោកស្រី Amal Clooney ដែលជាមេធាវីនិងក៏ជាសកម្មជនសិទ្ធមនុស្ស នៅថ្ងៃព្រហស្បតិ៍ម្សិលមិញ បានអំពាវនាវសុំឲ្យប្រទេសអ៊ីរ៉ាក់ យល់ព្រមឲ្យមានការបើកស៊ើបអង្កេតមួយរបស់ អ.ស.ប.នៅលើ អំពើឃោឃៅដែលបានបង្កឡើងដោយអង្គការរដ្ឋអ៊ីស្លាមនៅក្នុងប្រទេសអ៊ីរ៉ាក់និងក៏ដើម្បីនាំខ្លួនពួកអ្នកទទួលខុសត្រូវទាំងអស់នោះ យកទៅកាត់ទោសនៅមុខតុលាការផងដែរ។
ម្យ៉ាងទៀតយោងតាមអង្គការការពារសិទ្ធិមនុស្សស៊ីរី ពួកជីហាតប្រដាប់អាវុធចំនួន១៧នាក់ដែលមានសញ្ជាតិម៉ារ៉ុក បានស្លាប់កាលពីថ្ងៃព្រហស្បតិ៍ម្សិលមិញក្រោមការវាយប្រហាររបស់កងទ័ពអាកាសរុស្ស៊ីនៅក្នុងតំបន់ Maskana ក្នុងប៉ែកខាងកើតខេត្តអាឡិប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ