អសបចោទពួកឧទ្ទាម និងកងទ័ពរដ្ឋាភិបាលស៊ីរី គាំទ្រដោយរុស្ស៊ី ពីបទឧក្រិដ្ឋកម្មសង្រ្គាម
ភាគីជម្លោះនៅប្រទេសស៊ីរី បានប្រព្រឹត្តបទឧក្រិដ្ឋកម្មសង្រ្គាម។ តាមរបាយការណ៍របស់អង្គការសហប្រជាជាតិ ចេញផ្សាយនៅថ្ងៃពុធម្សិលមិញ ទាំងក្រុមឧទ្ទាម ហើយនិងរបបស៊ីរី ដែលគាំទ្រដោយកងកម្លាំងរុស្ស៊ី និងអ៊ីរ៉ង់ត្រូវជាប់ចោទពីបទឧក្រិដ្ឋកម្ម សង្រ្គាម សម្លាប់មនុស្ស នៅទីក្រុងអាឡិប ក្នុងប្រទេសស៊ីរី។
ចុះផ្សាយនៅថ្ងៃ៖
របាយការណ៍របស់អង្គការសហប្រជាជាតិ បានបង្ហាញឲ្យឃើញថា ឧក្រិដ្ឋកម្មសង្រ្គាម ត្រូវបានគេប្រព្រឹត្ត ធ្វើឡើង នៅទីក្រុងអាឡិប ដែលរបបស៊ីរី គាំទ្រដោយកងទ័ពរុស្ស៊ី និងអ៊ីរ៉ង់ទើបវាយដណ្តើមយកបានពីពួកឧទ្ទាម កាលពីពេលថ្មីៗនេះ។ ឧក្រិដ្ឋកម្មសង្រ្គាម ព្រោះរាល់ប្រតិបត្តិការយោធា និងការប្រយុទ្ធគ្នា រវាងភាគីជម្លោះទាំងពីរ បានសំដៅវាយប្រហារដោយចេតនាទៅលើក្រុមប្រជាជនស៊ីវិល ហើយនិងភ្នាក់ងារផ្តល់ជំនួយមនុស្សធម៌។
តាមរបាយការណ៍ របស់អង្គការសហប្រជាជាតិ ប្រតិបត្តិការទ័ពអាកាសរបស់រដ្ឋាភិបាលស៊ីរី ហើយនិងរុស្ស៊ី ទៅលើទីក្រុងអាឡិប ភាគខាងកើត ពី ខែកក្កដា ទៅដល់ខែកញ្ញាបានសម្លាប់ប្រជាជនស៊ីវិលជាច្រើនរយនាក់ និងបានបំផ្លាញមន្ទីរពេទ្យជាច្រើនកន្លែង។ គ្រាប់បែក ធុងបង្កប់ដោយគ្រឿងផ្ទុះ ត្រូវបានទម្លាក់ទៅលើទីតាំង ដែលសំបូររស់នៅ កកកុញ ដោយប្រជាជនស៊ីវិល។
មីស៊ីល បាញ់ពីដី គ្រាប់បែក ធុងគ្រឿងផ្ទុះ ធុងក្លរ ហើយនិងគ្រាប់បែកទម្លាក់ពីលើយន្តហោះ ទាំងនេះ ជាសព្វាវុធដែលគេបានប្រើសម្លាប់ជីវិតមនុស្សនៅក្នុងការប្រយុទ្ធគ្នា នៅទីក្រុងអាឡិប។ តាមអ្នកអង្កេតការណ៍របស់អង្គការសហប្រជាជាតិ ទាំង ទាហានរដ្ឋាភិបាលស៊ីរី ហើយនិងយន្តហោះរុស្ស៊ីសុទ្ធតែបានប្រើអាវុធជាតិផ្ទុះខាងលើនេះ។ អ្នកស៊ើបអង្កេតរបស់អង្គការសហប្រជាជាតិបានចោទផងដែរ រដ្ឋាភិបាលស៊ីរី ថា មានចេតនា និងផែនការច្បាស់លាស់ ក្នុងការវាយប្រហារទៅលើក្បួនរថយន្តដឹកជំនួយមនុស្សធម៌របស់កាកបាទក្រហម ហើយនិងអង្គការសហប្រជាជាតិ នៅភាគខាងលិចក្រុងអាឡិប។ ការវាយប្រហារទៅលើក្បួនរថយន្ត នៅខែកញ្ញា ឆ្នាំ ២០១៦ ដែលបានសម្លាប់បុគ្គលិកមនុស្សធម៌ចំនួន ១៤នាក់ បានធ្វើឲ្យគេផ្អាកបេសកកម្មផ្តល់ជំនួយ ដល់ប្រជាជនស៊ីរី ដែលនៅជាប់គាំង រងគ្រោះដោយសារ ការខ្វះចំណីអាហារ និងការប្រយុទ្ធគ្នារវាងពួកឧទ្ទាម ហើយនិងទ័ពរដ្ឋាភិបាលស៊ីរី ដែលមានជំនួយពីរុស្ស៊ី និងអ៊ីរ៉ង់។
ក្នុងរឿងប្រព្រឹត្តបទឧក្រិដ្ឋសង្រ្គាមនៅអាឡិប របាយការណ៍របស់អង្គការសហប្រជាជាតិ មិនបានចោទតែភាគីរុស្ស៊ី និងទាហានស៊ីរី នោះទេ។ ពួកឧទ្ទាមស៊ីរីក៏ជាប់ចោទនៅក្នុងបទប្រព្រឹត្តឧក្រិដ្ឋកម្មសង្រ្គាមនេះដែរ ដោយសារតែពួកគេបានយកប្រជាជនស៊ីវិលមកធ្វើជាខែល បាំងការពារខ្លួនពីការវាយប្រហាររបស់ទ័ពអាកាសស៊ីរី។ សម្រាប់អ្នកស៊ើបអង្កេត ក្រុមឧទ្ទាមក៏បានបាញ់ផងដែរ គ្រាប់ផ្លោងទៅលើសង្កាត់រស់នៅរបស់ប្រជាជនស៊ីវិលនៅភាគខាងលិចទីក្រុងអាឡិប និងបានបាញ់សម្លាប់ ប្រហារជីវិតក្រៅច្បាប់ ទាហានរដ្ឋាភិបាលដែលពួកគេចាប់បាន នៅក្នុងសមរភូមិ។
កន្លងមក អង្គការសហប្រជាជាតិធ្លាប់រកឃើញហើយថា មានឧក្រិដ្ឋកម្មប្រឆាំងមនុស្សជាតិ កើតឡើង នៅក្នុង សង្រ្គាមស៊ីរី ជាង ៥ឆ្នាំ ដែលបានសម្លាប់មនុស្សជិត៣សែន។ រុស្ស៊ីផ្ទាល់ធ្លាប់ត្រូវបានអង្គការការពារសិទ្ធិមនុស្សAmnesty International ចោទថាបានប្រព្រឹត្តឧក្រិដ្ឋកម្មប្រឆាំងមនុស្សជាតិ និងបានទាមទារឲ្យគេនាំជនដៃដល់កាត់ទោសនៅតុលាការព្រហ្មទណ្ឌអន្តរជាតិ។ ប៉ុន្តែ រុស្ស៊ី កាលពីម្សិលម្ង៉ៃ បានចេញមុខការពារ មិនឲ្យក្រុមប្រឹក្សាសន្តិសុខ ដាក់ទណ្ឌកម្មទៅលើស៊ីរី ដែលរងការចោទប្រកាន់ថា បានប្រើអាវុធគីមី នៅក្នុងសង្រ្គាមប្រយុទ្ធជាមួយពួកឧទ្ទាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ