អាល្លឺម៉ង់កំពុងអង្កេតដានអង្គការរដ្ឋអ៊ីស្លាម ក្រោយមានបំផ្ទុះប្រឆាំងរថយន្តកីឡាករបាល់ទាត់
ការប្រកួតកីឡាបាល់ទាត់ ពាក់កណ្តាលផ្តាច់ព្រ័ត្រ ដើម្បីដណ្តើមពានរង្វាន់អឺរ៉ុប ដែលគ្រោងធ្វើនៅថ្ងៃ អង្គារទី ១១មេសា ត្រូវបានលើកពេលមកប្រកួតនៅថ្ងៃពុធនេះវិញ បន្ទាប់ពីមានការបំផ្ទុះបីផ្ទួនៗបន្តបន្ទាប់គ្នា ប្រឆាំងនឹងរថយន្តដឹកកីឡាករអាល្លឺម៉ង់។ ហេតុការណ៍នេះបានបង្កឱ្យប៉ូលិសម្នាក់ និងកីឡាករម្នាក់រងរបួសនៅដៃ។ បើតាមប្រភពប៉ូលិសអាល្លឺម៉ង់ នេះជាការប៉ុនប៉ងវាយប្រហារដោយចេតនានិងដោយផ្ទាល់ប្រឆាំងក្រុមកីឡាបាល់ទាត់ Dortmund អាល្លឺម៉ង់។
ចុះផ្សាយនៅថ្ងៃ៖
រថយន្តដឹកកីឡាករបាល់ទាត់ឆ្ពោះទៅស្តាត ទើបចេញផុតពីចំណតរបស់សណ្ឋាគារបានបន្តិច ស្រាប់សំឡេងផ្ទុះ បានលាន់ឮឡើងនៅក្បែរឡាន ចំនួនបី បន្តបន្ទាប់គ្នា។ កញ្ចក់ឡានបានបែក ខ្ទាតអំបែងទៅប៉ះកីឡាករម្នាក់ ដែលជាអ្នកខ្សែការពារឱ្យរងរបួសនៅដៃ។ ប៉ូលិសបើកម៉ូតូ នាំក្បួនរថយន្តកីឡាករម្នាក់ទៀត ក៏បានរងរបួសក្នុងហេតុការណ៍បំផ្ទុះនោះដែរ។
គ្រឿងផ្ទុះនោះទំនងជាត្រូវបានគេយកមកផ្លុងទុក គ្របភួយ នៅរបងផ្លូវក្បែរសណ្ឋាគារ ដែលកីឡាករអាល្លឺម៉ង់សម្រាកនៅ។ នេះបើតាមប្រភពប៉ូលិសអាល្លឺម៉ង់ ដែលបានរកឃើញសំបុត្រមួយ នៅកន្លែងកើតហេតុ សរសេរបញ្ជក់ថា ការបំផ្ទុះនេះជាចម្លើយតបទៅនឹងទង្វើរបស់អាល្លឺម៉ង់ ដែលចូលរួមធ្វើសកម្មភាពតានដានអង្គការរដ្ឋអ៊ីស្លាមនៅស៊ីរី។
ប៉ុន្តែក្រុមអ្នកអង្កេតមិនទុកចិត្តលើខ្លឹមសារក្នុងលិខិតនោះទេ ដោយយល់ថាអាចសារបង្វែងដាន ព្រោះទន្ទឹមគ្នានោះ បើតាមទស្សនាវដ្ឋីFOCUS គេរកឃើញមានការផ្សព្វផ្សាយលិខិតមួយទៀត នៅក្នុងវិបសៃត៍អ្នកប្រឆាំងពួកហ្វាស៊ីស ប្រកាសទទួលស្គាល់ស្នាដៃបំផ្ទុះនៅយប់មិញ ថាជាការសងសឹកនឹងក្លឹបបាល់ទាត់Dortmund ដែលតែងអនុគ្រោះឱ្យពួកប្រកាន់ពូជសាសន៍ និងអ្នកមាននិន្នាការណាហ្ស៊ី បានធ្វើគាំទ្រក្លឹប។
អាល្លឺម៉ង់ដែលស្ថិតក្រោមស្ថានភាពការពារសន្តិសុខខ្ពស់បំផុត តាំងពីមានភេរវកម្មបើកឡានកិនមនុស្សក្នុងថ្ងៃបុណ្យណូអែល ខែធ្នូ២០១៦ បានដំឡើងកំរិតរក្សាសន្តិសុខនិងសុវត្ថិភាពនៅតាមក្រុង និងពិសេសនៅតាមពហុកីឡាដ្ឋាន។ ក្រុមកីឡាករBayern Munich និង Real Madrid គូប្រកួតពាក់កណ្តាលផ្តាច់ព្រ័ត្រមួយក្រុមទៀត ក៏បានទទួលការការពារយ៉ាងហ្មត់ចត់។
បន្ទាប់ពីបានប្រកាសភ្លាមលើកពេលប្រកួតកីឡាពាក់កណ្តាលផ្តាច់ព្រ័ត្ររវាង ក្រុមកីឡាករDortmund អាល្លឺម៉ង់ និងម៉ូណាកូរបស់បារាំង ពីអង្គារម្សិលមិញមកល្ងាចថ្ងៃពុធ សហព័ន្ធកីឡាបាល់ទាត់អឺរ៉ុប បានរក្សាសិទ្ធិសម្រេចលើកប្រកួតនេះទៀតក៏ថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ