អាល្លឺម៉ង់ជឿជាក់ថា ការវាយប្រហារលើរថយន្តដឹកកីឡាករបាល់ទាត់ Dortmund ជាអំពើភេរវកម្ម
នៅក្នុងប្រទេសអាល្លឺម៉ង់ ការស៊ើបអង្កេតពាក់ព័ន្ធនឹងការវាយប្រហារលើរថយន្តដឹកកីឡាករបាល់ទាត់ Dortmund ក្នុងយប់ថ្ងៃអង្គារ ទី១១ មេសាបាននិងកំពុងបន្តធ្វើយ៉ាងសកម្ម ហើយដានអ៊ីស្លាមនិយមជ្រុលនៅបន្តជាទិសដៅអាទិភាពតែមួយគត់របស់ក្រុមអ្នកស៊ើបអង្កេត។ រដ្ឋអាជ្ញាអាល្លឺម៉ង់បានអះអាងនៅថ្ងៃព្រហស្បតិ៍ ទី១៣ មេសាដោយគ្មានមន្ទិលសង្ស័យថា ការវាយប្រហារដោយគ្រាប់បែកទៅលើរថយន្តដឹកកីឡាករបាល់ទាត់ Dortmund គឺជាការវាយប្រហារភេរវកម្ម។ ទន្ទឹមគ្នា ជនសង្ស័យឃាត់ខ្លួនម្នាក់ត្រូវបានរដ្ឋអាជ្ញាបញ្ជាក់ថា មិនមានជាប់ពាក់ព័ន្ធនឹងការវាយប្រហារនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
គឺនៅក្នុងសេចក្តីប្រកាសព័ត៌មានមួយចេញផ្សាយក្នុងថ្ងៃព្រហស្បតិ៍ ទី១៣ មេសានេះដែលរដ្ឋអាជ្ញាអាល្លឺម៉ង់បានប្រាប់ឲ្យដឹងថា រហូតមកដល់ពេលនេះ ការស៊ើបអង្កេតមិនបានរកឃើញភស្តុតាងណាមួយដែលបង្ហាញពីការចូលរួមរបស់ជនសង្ស័យឃាត់ខ្លួននៅក្រោយការវាយប្រហារលើរថយន្តដឹកកីឡាករបាល់ទាត់ Dortmund ទេ។ តែរដ្ឋអាជ្ញាបានបន្ថែមថា ការឃុំខ្លួនរូបជនសង្ស័យនោះនៅបន្តមានទាក់ទងនឹងការចូលរួមជាមួយអង្គការរដ្ឋអ៊ីស្លាមក្នុងពេលដែលរូបជនសង្ស័យនោះបានស្នាក់នៅក្នុងប្រទេសអ៊ីរ៉ាក់។
ជនសង្ស័យដែលរដ្ឋអាជ្ញាអាល្លឺម៉ង់បានលើកឡើងនោះ គឺជាជនជាតិអ៊ីរ៉ាក់អាយុ ២៦ឆ្នាំ និងចាប់ខ្លួននាថ្ងៃពុធ ទី១២ មេសា។ គួររម្លឹកជូនថា ក្រោយការវាយប្រហារលើរថយន្តដឹកកីឡាករបាល់ទាត់ Dortmund នាយប់ថ្ងៃអង្គារ ទី១១ មេសាដែលបានបណ្តាលឲ្យរបួសមនុស្សពីរនាក់មក ក្រុមអ្នកស៊ើបអង្កេតបានតម្រង់ការស៊ើបអង្កេតលើដានអ៊ីស្លាមនិយមជ្រុលដោយចូលឆែកឆេរក្នុងផ្ទះរបស់បុរសពីរនាក់ដែលជាសកម្មជនរបស់ចលនាអ៊ីស្លាមនិយមជ្រុល ក្នុងនោះ បានឃាត់ខ្លួនតែរូបជនជាតិអ៊ីរ៉ាក់ម្នាក់គត់។
កាសែតអាល្លឺម៉ង់មួយឈ្មោះ Bild ចេញផ្សាយក្នុងថ្ងៃព្រហស្បតិ៍ ទី១៣ មេសាឲ្យដឹងថា ជនជាតិអ៊ីរ៉ាក់រូបនោះបានស្ថិតក្រោមការតាមដានរបស់ប៉ូលិសយូរណាស់មកហើយទាក់ទងនឹងកិច្ចសន្ទនាគួរឲ្យសង្ស័យតាមទូរស័ព្ទនាពេលកន្លងមក។ គឺជាកិច្ចសន្ទនាដែលបានធ្វើឲ្យប៉ូលិសគិតថា ជនជាតិអ៊ីរ៉ាក់រូបនោះមានលាក់អាវុធក្នុងផ្ទះរបស់គេ។
សូមជម្រាបជូនថា ការដែលក្រុមអ្នកស៊ើបអង្កេតបានតម្រង់លើដានអ៊ីស្លាមនិយមជ្រុលលើករណីវាយប្រហារលើរថយន្តដឹកកីឡាករបាល់ទាត់ Dortmund ក៏ដោយសារពួកគេបានរកឃើញសំបុត្រមួយសរសេរដោយឈ្មោះ Allah នៅកន្លែងកើតហេតុ។ ខ្លឹមសារសំបុត្របានអំពាវនាវរដ្ឋាភិបាលអាល្លឺម៉ង់ឲ្យបញ្ឈប់ការចូលរួមជាមួយកម្លាំងសម្ព័ន្ធមិត្តវាយប្រហារអង្គការរដ្ឋអ៊ីស្លាមក្នុងប្រទេសស៊ីរី។ ខណៈនេះ រដ្ឋអំណាចអាល្លឺម៉ង់កំពុងសិក្សា ផ្ទៀងផ្ទាត់លើសំបុត្រនោះយ៉ាងប្រយ័ត្នប្រយែងដោយខ្លាចជាសំបុត្រក្លែងក្លាយបង្វែងដានការពិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ