មហោស្រពភាពយន្តកានបើកទ្វារក្រោមការពង្រឹងសន្តិសុខដ៏តឹងមិនធ្លាប់មាន
មហោស្រពភាពយន្តអន្តរជាតិកានចាប់ផ្តើមបើកទ្វារ ពីថ្ងៃពុធនេះ រហូតដល់ថ្ងៃទី ២៨ឧសភាខាងមុខ។ ខ្សែភាពយន្តចំនួន១៩មកពី១២ប្រទេសត្រូវបានជ្រើសរើសសម្រាប់ការប្រកួតប្រជែងដណ្តើមតាល់ប័ត្រមាស ដែលនៅឆ្នាំនេះត្រូវបានច្នៃឡើងជាពិសេសជាមួយនឹងការដាំគ្រាប់ពេជ្រពីពានរង្វាន់មាស តម្លៃ២ម៉ឺនអឺរូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៨:០៦
មហោស្រព កាន ដែលជាមហោស្រពភាពយន្តដ៏ល្បីចាប់ផ្តើមបើកសម្ពោធ នៅម៉ោង៧យប់ ដែលត្រូវនឹងម៉ោង១២អធ្រាត្រ ម៉ោងនៅប្រទេសកម្ពុជា។ ទោះជាពិធីនៅមិនទាន់ចាប់ផ្តើមមែន ប៉ុន្តែ គេដឹងហើយថា តើតារាណាខ្លះដែលនឹងលេចមុខនៅលើកម្រាលព្រំក្រហម នៅក្នុងពិធីបើកសម្ពោធមហោស្រពកាននៅយប់នេះ។ អ្នកស្រីនីកូល ឃីតមែន តារាភាពយន្តអូស្រ្តាលី ជូលៀន ម៉រ តារាអាមេរិកាំង ស្ហាឡុត ហ្កាំងស្បួរ តារាបារាំង ឬអ្នកដឹកនាំរឿងជប៉ុន តារាភាពយន្តអាមេរិកាំង វីល ស្មីត ជាដើម ដែលចូលរួមក្នុងគណៈមេប្រយោគដាក់ពិន្ទុ ជាដើម នឹងមានមុខជាមួយនឹងតារាល្បីៗជាច្រើននាក់ផ្សេងទៀត នៅលើជណ្តើរក្រាលកម្រំព្រំរបស់មហោស្រពកាន។
ដោយសារឆ្នាំនេះមហោស្រពភាពយន្តកានមានអាយុ៧០ឆ្នាំ មហោស្រព ត្រូវបានរៀបចំឡើងថ្មីប្លែកខុសពីឆ្នាំមុន នៅត្រង់ថា លើកនេះ អ្នករៀបចំមហោស្រពកានបានសម្រិតសម្រាំងជាពិសេស រង្វាន់តាល់ប័ត្រមាស ដែលគេត្រូវប្រគល់ទៅឲ្យខ្សែភាពយន្តដែលល្អដាច់គេ។ តាមអ្នករៀបចំមហោស្រព រង្វាន់តាល់ប័ត្រមាសឆ្នាំនេះ នឹងមានដាំអមដោយគ្រាប់ពេជ្រតូចៗ ដល់ទៅជាង ១៦០គ្រាប់ នៅលើស្លឹកតាល់ប័ត្រដែលធ្វើពីមាសសុទ្ធ។
នៅឆ្នាំនេះ មានខ្សែភាពយន្តអន្តរជាតិចំនួន ១៩ ចូលរួមប្រកួតប្រជែងដណ្តើមតាល់ប័ត្រមាសរបស់មហោស្រពកាន និងមានខ្សែភាពយន្តជាង៤០ទៀតដែលជ្រើសរើសឲ្យចាក់បញ្ចាំងក្នុងមហោស្រព ប៉ុន្តែ ក្នុងរយៈពេល១០ឆ្នាំចុងក្រោយនេះ នេះជាលើកទី១ ដែលគ្មានខ្សែភាពយន្តខ្មែររបស់លោកប៉ាន់ រិទ្ធី ឬជូ ដាវីចូលរួម បង្ហាញមុខនឹងគេនៅក្នុងមហោស្រពកាន។
សង្រ្គាមប៉ាការជាមួយNetflix
មហោស្រពកានមិនបានរលូន តាំងពីមិនទាន់ចាប់ផ្តើមបើកទ្វារជាផ្លូវការម៉្លេះ ពោលគឺបន្ទាប់ពីមហោស្រពបានសម្រេចជ្រើសរើសខ្សែភាពយន្តពីរ គឺមួយជារឿងកូរ៉េOKJA របស់សមិទ្ធិករកូរ៉េខាងត្បូងBong Joon Ho និងមួយទៀតជារឿងអាមេរិកាំងThe MEYEROWITZ STORIES របស់Noah BAUMBACH ដែលផលិតដោយក្រុមហ៊ុនអាមេរិកាំងNetflix បណ្តាញទូរទស្សន៍អ៊ីនធ័រនែត។ នេះជាលើកទី១ ដែលមហោស្រពបានជ្រើសរើសខ្សែភាពយន្តដែលផលិតសម្រាប់តែអ្នកមើលអ៊ីនធ័រនែត ឲ្យចូលរួមក្នុងការប្រកួតប្រជែងផ្លូវការ នៅក្នុងមហោស្រព។
អ្នករៀបចំមហោស្រពហើយនិងក្រុមហ៊ុនអាមេរិកាំង Netflix (មានវត្តមាននៅស្រុកខ្មែរតាំងពីដើមឆ្នាំ២០១៦) បានចាប់ខ្វែងគំនិតគ្នា ពីរឿងការដាក់បញ្ចាំងខ្សែភាពយន្តទាំងពីររបស់ Netflixនៅតាមរោងកុននៅ ស្រុកបារាំង។ តាមច្បាប់ ទម្លាប់ប្រពៃណីរបស់មហោស្រពកាន រាល់ខ្សែភាពយន្ត មិនថា បារាំងឬបរទេស ដែលត្រូវជ្រើសរើសឲ្យចូលរួមប្រកួតដណ្តើមតាល់ប័ត្រមាស គឺត្រូវតែដាក់បញ្ចាំងជាមុនសិននៅតាមរោងកុននៅបារាំង បន្ទាប់មកត្រូវរង់ចាំ ៣ឆ្នាំទើបអាចដាក់ឲ្យគេជាវមើលរឿងកុននោះនៅលើអ៊ីនធ័រនែត។ មហោស្រព និងសហព័ន្ធភាពយន្តបារាំងទាមទារយ៉ាងដូច្នេះ ព្រោះតែចង់ជំរុញឲ្យមនុស្សទៅមើលកុន នៅរោង។ ម្យ៉ាង លុយបានមកពីការលក់សំបុត្រ ហើយនិងពន្ធដែលបានមកពីឧស្សាហកម្មភាពយន្ត គឺជាចំណូល សំខាន់សម្រាប់រដ្ឋ។
ក្រុមហ៊ុន Netflixដែលមានអ្នកជាវតាមអ៊ីនធ័រនែតប្រមាណ ១០០លាននាក់នៅក្នុងពិភពលោក បានជំទាស់ដាច់ខាតនឹងការទាមទាររបស់មហោស្រព និងសហព័ន្ធភាពយន្តបារាំង ព្រោះថា Netflixដែលមានរបរសំខាន់គឺផលិតកុន សម្រាប់ដាក់ឲ្យគេមើលជាវ នៅលើអ៊ីនធ័រនែត។ នៅចន្ទ ទី ១៥ឧសភា ពីរថ្ងៃមុនបើកមហោស្រពភាពយន្តកាន ថ្នាក់ដឹកនាំរបស់ Netflixបានអំពាវនាវឲ្យមហោស្រពភាពយន្តកានផ្លាស់ប្តូរទំលាប់ចាស់ ព្រោះនៅសម័យបច្ចេកវិទ្យាទំនើប មនុស្សបានផ្លាស់ប្តូរទម្លាប់មើលកុន គឺមិនសូវទៅមើលនៅរោងដូចមុននោះទេ។ សម្រាប់ Netflix លក្ខខណ្ឌកំណត់ដោយមហោស្រពដែលថា គេត្រូវរង់ចាំដល់ទៅ៣ឆ្នាំ ដើម្បីអាចដាក់ឲ្យជាវមើលតាមអ៊ីនធ័រនែត គឺយូរណាស់។ លក្ខខណ្ឌកំណត់ដោយមហោស្រពកាន នឹងក្លាយជាឧបសគ្គសំខាន់ ខ្ទាស់ជើង មិនឲ្យវិស័យភាពយន្តវិវឌ្ឍទៅមុខ ជាពិសេសនៅក្នុងកាលសម័យដែលមនុស្សចាប់មានទម្លាប់មើលកុន នៅលើអេក្រង់តូចៗ ឬនៅលើទូរស័ព្ទក៏មាននោះ។
សង្រ្គាមប៉ាការលើកនេះ កំពុងធ្វើឲ្យគេឃើញថា ទស្សនៈទៅលើខ្សែភាពយន្ត កំពុងប្រែប្រួល គឺត្រូវតែចេះសម្របខ្លួន ទៅតាមសម័យឌីជីថល សម័យអ៊ីនធ័រនែត បច្ចុប្បន្ននេះ។
ផើងផ្កាយក្សសម្រាប់បាំងកុំឲ្យឡានកាំម៉្ញុងរបស់ភេរវជនបើកកិនលើក្រុមមនុស្ស
នៅឆ្នាំនេះ មហោស្រពភាពយន្តកានត្រូវបានរៀបចំឡើង នៅក្រោមការការពារ រឹតបន្តឹងសន្តិសុខយ៉ាងតឹងរ៉ឹងបំផុត ដែលមិនធ្លាប់មាន។ នៅក្នុងកាលៈទេសៈដែលបារាំងស្ថិតក្នុងស្ថានភាពប្រកាសអាសន្ននៅឡើយ ដោយសារការគំរាមកំហែងភេរវកម្ម អាជ្ញាធរក្រុងកាន ក៏ដូចជាប៉ូលិសជាតិ បានចាត់វិធានការចំនួន៣បន្ថែម ពីលើការពង្រាយប៉ូលិស និងទាហាននៅតាមផ្លូវ។
ទីមួយ គឺការតាំងពង្រាយផើងផ្កាយក្សនៅតាមច្រកផ្លូវសំខាន់ៗ ដែលសំដៅទៅកាន់មហោស្រពកាន។ ប្រធានប៉ូលិសក្រុងកានបាននិយាយថា ផើងផ្កាយក្សមិនមែនគ្រាន់តែដើម្បីតាំងលម្អតែប៉ុណ្ណោះទេ ប៉ុន្តែ តាមពិតវាត្រូវគេដើម្បីទុកគ្រាន់ជារនាំងបាំងការពារ នៅក្នុងករណីដែលភេរវជនចង់ប្រើរថយន្តបើកកិនសម្លាប់មនុស្ស ដូចនៅ ទីក្រុងនីស នៅ ប៊ែរឡាំង ឬនៅទីក្រុងឡុងដ៍កាលពីប៉ុន្មានខែមុន។
ក្រុងកាននេះ ស្ថិតនៅមិនឆ្ងាយប៉ុន្មានពីទីក្រុងនីស ជាទី ដែលកាលពី១០ខែមុន ភេរវជនម្នាក់ដែលប្រកាសទទួលស្គាល់ដោយ ក្រុមជីហាតអង្គការរដ្ឋអ៊ីស្លាម បានបើកឡានកាំម៉្ញុងសម្លាប់មនុស្ស៨៦នាក់ នៅពេលដែលមនុស្សម្នារកំពុងឈរមើលកាំជ្រួចនៅថ្ងៃបុណ្យជាតិ ១៤កក្កដា។
អាជ្ញាធរបារាំងចង់បញ្ជៀសកុំឲ្យសេណារីយ៉ូអាក្រក់នេះកើតមាននៅទីក្រុងកាន ដែលមិនត្រឹមជាទីក្រុងទេសចរណ៍ ប៉ុន្តែ ជាទីក្រុងបេះដូងសម្រាប់រៀបចំមហោស្រពភាពយន្តអន្តរជាតិដ៏ល្បីឈ្មោះក្នុងពិភពលោក។
ក្នុងក្របខ័ណ្ឌពង្រឹងសន្តិសុខកម្រិតខ្ពស់នេះដែរ ក្រៅតែពីផើងផ្កាយក្សដែលបញ្ឈរជើងចាំជារនាំងបាំងឡានកាំម៉្ញុងសម្លាប់មនុស្ស អាជ្ញាធរនៅបានបំពាក់ផងដែរ កាមេរ៉ាជាង៥០០នៅគ្រប់ កែងជ្រុងផ្លូវ គ្រប់ច្រកចេញចូល ទៅកាន់តំបន់ដែលមានរៀបចំមហោស្រព។ នេះគេនៅមិនទាន់និយាយពីប៉ូលិស ទាហានដែលដើរជាក្រុមៗ ល្បាតជាមួយកាំភ្លើងវែង ហើយនិងការតាមដានស៊ើបការណ៍សម្ងាត់របស់ប៉ូលិសជាតិផង។ បន្ថែមពីប៉ូលិសដែលស្លៀកពាក់ស៊ីវិល ឈរលាយឡំក្នុងហ្វូងមនុស្ស ប៉ូលិសក្រុងកាននៅបានទទួលជំនួយគាំទ្រពីប្រជាជនកាន ប្រមាណ ២០នាក់ ដែលបានស្ម័គ្រចិត្តធ្វើជាភ្នែកជាច្រមុះរបស់ប៉ូលិស និងរាយការណ៍ភ្លាមនៅពេលឃើញមានករណីសង្ស័យធ្វើភេរវកម្ម។៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ