អំពើពុករលួយ៖តុលាការបារាំងស៊ើបអង្កេតកិច្ចសន្យាលក់នាវាមុជទឹកបារាំងអោយប្រេស៊ីល
កាសែតបារាំង Le Parisien បានចុះផ្សាយថា តុលាការបារាំងស៊ើបអង្កេតលើកិច្ចសន្យាលក់នាវាមុជទឹកបារាំងទៅអោយប្រេស៊ីល ឆ្នាំ២០០៨ ក្នុងអាណត្តិលោកសាកូហ្ស៊ី។ ជាកិច្ចសន្យាតម្លៃ៦៧០០លានដុល្លារ។ តុលាការបារាំងសង្ស័យថា អាចមានការស៊ីសំណូកសូកប៉ាន់ណាមួយ ទើបបារាំងអាចសម្រេចកិច្ចសន្យាលក់អាវុធដ៏ធំធេងមួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ទាក់ទងការសង្ស័យស៊ីសំណូកថវិកាសាធារណៈនៅបរទេស តុលាការបារាំងបានបើកការស៊ើបអង្កេតលើកិច្ចសន្យាលក់នាវាមុជទឹកបារាំងអោយប្រេស៊ីល តាំងពីខែតុលា ឆ្នាំ២០១៦មក។ យោងតាមសារព័ត៌មានបារាំង Le Parisien កិច្ចសន្យានេះមានតម្លៃតម្លៃ៦៧០០លានអឺរ៉ូ ទាក់ទងនឹងការលក់នាវាមុជទឹកបារាំង៥គ្រឿង ទៅអោយប្រេស៊ីល ក្នុងនោះមាននាវាមុជទឹកដើរដោយថាមពលនុយក្លេអ៊ែរមួយគ្រឿង។
បារាំងនិងប្រេស៊ីលបានចុះហត្ថលេខាលើកិច្ចសន្យានេះ កាលពីខែធ្នូ ឆ្នាំ២០០៨ ពេលប្រធានាធិបតី សាកូហ្ស៊ី បំពេញទស្សនកិច្ចនៅប្រេស៊ីលជួបប្រធានាធិបតីលូឡា។ កិច្ចសន្យានេះក៏តំរូវអោយមានការផ្ទេរបច្ចេកវិទ្យាយោធាមួយចំនួនទៅអោយប្រេស៊ីលដែរ។ តើអាចមានការស៊ីសំណូកសូកប៉ាន់ណាមួយទេ ទើបបានជាបារាំងសម្រេចបានកិច្ចសន្យាលក់អាវុធមហាសាលមួយនេះបាន ?
ស្របពេលនេះដែរ តុលាការបារាំងក៏កំពុងស៊ើបអង្កេតលើការសម្រេចអោយប្រេស៊ីលធ្វើម្ចាស់ផ្ទះរៀបចំកីឡាអូឡាំពិក ឆ្នាំ២០១៦ ដែរ។ គួររំលឹកថា ជប៉ុនដែលបានដាក់បេក្ខភាពរៀបចំកីឡាអូឡាំពិក ឆ្នាំ២០១៦ដែរនោះ បានបរិហារពីការដែលបារាំងលំអៀងទៅរកប្រេស៊ីល។ អ្វីដែលគេរឹតតែចាប់អារម្មណ៍និងសង្ស័យដែរនោះ គឺថា ការសម្រេចអោយប្រេស៊ីលធ្វើម្ចាស់ផ្ទះរៀបចំកីឡាអូឡាំពិកនេះ បានធ្វើឡើងចំពេលបារាំងនិងប្រេស៊ីលចុះហត្ថលេខាលើកិច្ចសន្យាទិញលក់នាវាមុជទឹកបារាំងនេះតែម្តង។ ក្រុមស៊ើបអង្កេតកំពុងចោទសួរថា តើអាចមានការស៊ីសំណូកណាមួយទាក់ទងនឹងហេតុការណ៍ទាំង២នេះដែរទេ?
ទាក់ទងអំពើពុករលួយក្នុងស្រុកប្រេស៊ីលវិញ ថ្ងៃអាទិត្យនេះ ក្រុមឆ្វេងនិយម និងសហជីព ព្រមទាំងប្រជាជនប្រេស៊ីលកំពុងត្រៀមបន្តធ្វើបាតុកម្មទាមទារអោយប្រធានាធិបតីមីស្ហែល តេមែរ ចុះពីតំណែង ទាមទារអោយរៀបចំការបោះឆ្នោតជាថ្មីទៀត។ តុលាការកំពុងស៊ើបអង្កេតលោកតេមែរពីបទពុករលួយ។ លោកតេមែរសុំអោយតុលាការព្យួរការស៊ើបអង្កេត លោកលើកឡើងថា ភស្តុតាងប្រឆាំងរូបលោក ជារឿងដែលគេប្រឌិតឡើងទាំងស្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ