ទំនាក់ទំនងរវាងអាល្លឺម៉ង់និងតួកគីកាន់តែតានតឹងនឹងគ្នា
ថ្ងៃព្រហស្បតិ៍នេះ អាល្លឺម៉ង់បានតម្លើងសម្លេងដាក់តួកគី ដោយបានប្រកាសបំបែរទិសដៅនយោបាយថ្មីរបស់ខ្លួនជាមួយតួកគី ពិសេសគឺនយោបាយសេដ្ឋកិច្ចតែម្តង។ ទំនាក់ទំនងរវាងអាល្លឺម៉ង់នឹងតួកគីកាន់តែធ្លាក់ចុះ តាំងពីដើមខែកក្កដាមក ក្រោយអាជ្ញាធរតួកគីចាប់ខ្លួនក្រុមអ្នកការពារសិទ្ធិមនុស្សនៅក្រុងអ៊ីស្តង់ប៊ូល ក្នុងនោះមានពលរដ្ឋអាល្លឺម៉ង់មួយរូបដែលតួកគីកំពុងឃុំខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ក្នុងការបំបែរទិសដៅនយោបាយ និងសេដ្ឋកិច្ចជាមួយតួកគី រដ្ខាភិបាលអាល្លឺម៉ង់បានអំពាវនាវ ថ្ងៃព្រហស្បតិ៍នេះ អោយពលរដ្ឋអាល្លឺម៉ង់ដែលធ្វើដំណើរទៅតួកគី អោយពួកគេប្រុងប្រយ័ត្នកាន់តែខ្ពស់ ទោះបីជាស្នាក់នៅតួកគីក្នុងរយៈពេលខ្លីក៏ដោយចុះ។
ភាពតានតឹងរវាងអាល្លឺម៉ង់និងតួកគី បានកើតឡើងកាលពីថ្ងៃ៥កក្កដា ក្រោយតួកគីបានចាប់ខ្លួនក្រុមការពារសិទ្ធិមនុស្សមួយក្រុម នៅក្រុងអ៊ីស្តង់ប៊ូល ក្នុងនោះមានពលរដ្ឋអាល្លឺម៉ង់មួយរូបឈ្មោះ Peter Steudtner ហើយក៏មានលោកស្រី Idil Eserជាប្រធានអង្គការ Amnesty International នៅតួកគីដែរ។ តួកគីបានសម្រេចបន្តឃុំខ្លួនពលរដ្ឋអាល្លឺម៉ង់ និងអ្នកការពារសិទ្ធិមនុស្សមួយចំនួន។ តួកគីចោទថាពលរដ្ឋអាល្លឺម៉ង់ បានបង្កបទឧក្រិដ្ឋក្នុងនាមជាអង្គការភេរវកម្ម។ អាល្លឺម៉ង់បានទាមទារងោយដោះលែងពលរដ្ឋអាល្លឺម៉ង់ និងបានកោះហៅឯកអគ្គរដ្ឋទូតតួកគីនៅក្រុងប៊ែរឡាំង អោយចូលបំភ្លឺ។
អាល្លឺម៉ង់បដិសេធការចោទប្រកាន់របស់តួកគី ដោយលើកឡើងថា ពលរដ្ឋអាល្លឺម៉ង់រូបនោះ គ្មានទំនាក់ទំនងអ្វីពិសេសជាមួយតួកគីទេ។ ប្រមុខការទូតអាល្លឺម៉ង់លោក Sigmar Gabriel ចោទថា តួកគីរំលោភសិទ្ធិមនុស្ស និងបានងាកឆ្ងាយពីតម្លៃអឺរ៉ុប ឆ្ងាយពីតម្លៃអង្គការអូតង់។ ក្នុងការបំបែរទិសដៅនយោបាយដាក់ពិន័យសេដ្ឋកិច្ចចំពោះតួកគី ប្រមុខការទូតអាល្លឺម៉ង់គ្រោងសើរើឡើងវិញនូវឥណទាន រឺក៏ជំនួយផ្សេងៗដែលអាល្លឺម៉ង់ជួយដល់ផ្នែកនាំចេញ រឺសហគ្រាសអាល្លឺម៉ង់ដែលបោះទីតាំងនៅតួកគី។ អាល្លឺម៉ង់ប្រាប់ដែរថា នឹងពិភាក្សាជាមួយសហភាពអឺរ៉ុបពីមូលនិធិដែលអឺរ៉ុបជួយតួកគី ក្នុងក្របខណ្ឌមុនចូលជាសមាជិកអឺរ៉ុបនោះ។ តែអាល្លឺម៉ង់ត្រូវរៀបចំការបោះឆ្នោតសភា២ខែខាងមុខនេះ ដូច្នេះ ប្រហែលមិនហ៊ានលេងខ្លាំងជាមួយតួកគីទេ ព្រោះតួកគីមានកិច្ចព្រមព្រៀងអន្តោប្រវេសន៍ជាមួយអឺរ៉ុប។ នៅតួកគីមានជនភៀសខ្លួនស៊ីរីច្រើន។ បើតួកគីខឹងខ្លាំង តួកគីអាចព្រលែងជនភៀសខ្លួនអោយហូរចូលអឺរ៉ុប ចូលដល់ទឹកដីអាល្លឺម៉់ង់បាន។
ការប្រកាសអោយពលរដ្ឋអាល្លឺម៉ង់កាន់តែប្រុងប្រយ័ត្នខ្ពស់ក្នុងការធ្វើដំណើរទៅតួកគី ធ្វើអោយតួកគីខឹងសម្បារជាខ្លាំង និងបញ្ចេញប្រតិកម្មថា អាល្លឺម៉ង់គ្មានភាពទទួលខុសត្រូវខ្ពស់ផ្នែកនយោបាយទេ។ តួកគីបានរំលឹកឡើងវិញថា តួកគីគិតគូររក្សាទំនាក់ទំនងល្អជាមួយអាល្លឺម៉ង់ ប៉ុន្តែលុះត្រាតែមានការគោរពផលប្រយោជន៍គ្នាទៅវិញទៅមកដែរ។
យោងតាមកាសែតអាល្លឺម៉ង់ តួកគីឃុំខ្លួនពលរដ្ឋអាល្លឺម៉ង់ ដើម្បីជាថ្នូរដោះដូរជាមួយជនជាតិតួកគីដែលរត់ភៀសខ្លួនទៅអាល្លឺម៉ង់ក្រោយរដ្ឋប្រហារមិនបានសម្រេច ថ្ងៃ១៥កក្កដាឆ្នាំ២០១៦។ ពេលនេះ តួកគីមានពលរដ្ឋអាល្លឺម៉ង់៩រូបក្នុងដៃ ក្នុងនោះមាន៤រូបមានសញ្ជាតិតួកគីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ