អ.ស.ប មានភស្តុតាង គ្រប់គ្រាន់ ដើម្បីចោទប្រកាន់ប្រធានាធិបតីស៊ីរី ពីបទឧក្រិដ្ឋកម្មសង្រ្គាម
គណៈកម្មការស៊ើបអង្កេតរបស់អង្គការសហប្រជាជាតិប្រមូលបានភស្តុតាង និងឯកសារ គ្រប់គ្រាន់ ដែលអាចឲ្យគេបើកសវនការ ជំនុំជម្រះ លោកប្រធានាធិបតីស៊ីរី ស្ហា អាល់ អាសាដ ពីបទប្រព្រឹត្តឧក្រិដ្ឋកម្មសង្រ្គាម។ សមាជិកម្នាក់ របស់គណៈកម្មការ គឺលោកស្រី Clara Del Ponte បាននិយាយយ៉ាងដូច្នេះ ប្រាប់កាសែត ស្វ៊ីស នៅថ្ងៃអាទិត្យទី ១៣ សីហា ២០១៧។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
លោកស្រី Clara Del Ponte អតីតរដ្ឋអាជ្ញាស្វ៊ីសបានចូលរួមនៅក្នុងគណៈកម្មការរបស់អង្គការសហប្រជាជាតិ ដែលស៊ើបអង្កេតទៅលើបទឧក្រិដ្ឋនានាៗ ដែលបានកើតឡើង នៅក្នុងទឹកដីស៊ីរី។ ចាប់តាំងពីចាប់ផ្តើមសកម្មភាពរបស់ខ្លួន នៅឆ្នាំ ២០១២ គណៈកម្មការស៊ើបអង្កេតរបស់អង្គការសហប្រជាជាតិបានប្រមូលបានភស្តុតាង ជាច្រើន ស្តីពីការប្រើប្រាស់អាវុធគីមី ការវាយប្រហារទៅលើក្បួនដឹកជញ្ជូនជំនួយមនុស្ស ហើយនិងការសម្លាប់ប្រល័យពូជសាសន៍ទៅលើជនជាតិ Yazidiនៅស៊ីរី ជាដើម។
ចាប់តាំងពីផ្ទុះសង្រ្គាមស៊ីវិល នៅស៊ីរី នៅឆ្នាំ ២០១១ ប្រជាជនស៊ីរី ជិត ៥សែននាក់ បានស្លាប់ និងបាត់ខ្លួន។ អង្គការតាមដានឃ្លាំមើលសិទ្ធិមនុស្សស៊ីរី ដែលមានទីតាំងនៅទីក្រុងឡុងដ៍ ធ្លាប់អះអាងពីរការរកឃើញរណ្តៅសាកសព ជាច្រើន ដែលគេជឿថា ជាក្រុមទាហានប្រឆាំង ដែលត្រូវរដ្ឋាភិបាលស៊ីរី បាញ់សម្លាប់រង្គាល នៅពេលវាយយកបានទីតាំងរបស់ក្រុមប្រឆាំង ដូចជានៅទីក្រុងហូម ជាដើម។
នៅក្នុងបទសម្ភាសន៍ ជាមួយកាសែតស្វ៊ីស នៅថ្ងៃអាទិត្យម្សិលមិញ លោកស្រី Del Ponte ដែលធ្លាប់ស៊ើបអង្កេតលើឧក្រិដ្ឋកម្ម នៅប្រទេសរវ៉ាន់ដា និងយូហ្គោស្លាវីជាដើម បាននិយាយថា លោកស្រី ជឿជាក់យ៉ាងមុតមាំ ថា មានភស្តុតាងគ្រប់គ្រាន់ ដើម្បីឲ្យគេអាចផ្តន្ទាទោសប្រធានាធិបតីស៊ីរី លោកបាសា្ហរ អាល់ អាសាដ ពីបទឧក្រិដ្ឋកម្មសង្រ្គាម។
គណៈកម្មការស៊ើបអង្កេតរបស់អង្គការសហប្រជាជាតិ បានរកឃើញផងដែរ បទឧក្រិដ្ឋកម្មសង្រ្គាម ប្រព្រឹត្តដោយ កងទ័ព និងចារកិច្ចសម្ងាត់របស់រដ្ឋាភិបាលស៊ីរី។ គណៈកម្មការធ្លាប់បានចេញផ្សាយ ជាញឹកញាប់របាយការណ៍ ដែលបង្ហាញពីលទ្ធផលនៃការស៊ើបអង្កេត ប៉ុន្តែ នៅក្រោយ ការស៊ើបអង្កេត អស់រយៈពេល ៦ឆ្នាំ ក្រុមប្រឹក្សាសន្តិសុខ ហាក់មិនចង់បញ្ជូនសំណុំរឿងនេះ ទៅតុលាការព្រហ្មទណ្ឌអន្តរជាតិ នៅទីក្រុងឡាអេនោះទេ។
សម្រាប់លោកស្រី Del Ponte រុស្ស៊ី ដែលជាសម្ព័ន្ធមិត្តរបស់រដ្ឋាភិបាលស៊ីរី នឹង ប្រើសិទ្ធិវេតូ ដើម្បីរារាំងកុំឲ្យគេអាចនាំយកប្រធានាធិបស៊ីរីយកកាត់ទោស នៅតុលាការព្រហ្មទ័ណ្ឌ។ លោកស្រីសោកស្តាយថា ក្រុមប្រឹក្សាសន្តិសុខរបស់អង្គការសហប្រជាជាតិគ្មានសមត្ថភាពបង្កើតតុលាការពិសេស ដើម្បីជំនុំជម្រះរដ្ឋាភិបាលស៊ីរី ពីបទប្រព្រឹត្ត ឧក្រិដ្ឋកម្មសង្រ្គាម។ គឺហេតុផលនេះហើយ ដែលធ្វើឲ្យលោកស្រី Clara Del Ponte សម្រេចដើរចេញពីគណៈកម្មការស៊ើបអង្កេតរបស់អង្គការសហប្រជាជាតិ កាលពីថ្ងៃសប្តាហ៍មុន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ