បន្ទាប់ពីនៅទ្រឹងអស់ជាច្រើនឆ្នាំ កំណើនសេដ្ឋកិច្ចបារាំងបានស្ទុះឡើងក្នុងឆ្នាំ ២០១៧
នៅក្នុងប្រទេសបារាំង ស្ថានភាពសុខភាពសេដ្ឋកិច្ចបានប្រសើរឡើងក្នុងឆ្នាំ ២០១៧ បើធៀបនឹងឆ្នាំ ២០១៦។ តួលេខផ្សព្វផ្សាយដោយវិទ្យាស្ថានស្ថិតិ និងសិក្សាសេដ្ឋកិច្ចជាតិបានឲ្យដឹងនៅថ្ងៃអង្គារ ទី៣០ មករានេះថា កំណើនសេដ្ឋកិច្ចក្នុងឆ្នាំ ២០១៧មានអត្រា ១,៩% ទល់នឹង ១,១% ក្នុងឆ្នាំ ២០១៦។ ១,៩% ជាកំណើនមួយដ៏ខ្ពស់ដែលបារាំងមិនធ្លាប់ទទួលបានទេ បើគិតតាំងពី ៦ឆ្នាំកន្លងទៅ។
ចុះផ្សាយនៅថ្ងៃ៖
ស្តាប់ - ០២:១១
តួលេខនៃកំណើនសេដ្ឋកិច្ចបារាំងឆ្នាំ ២០១៧ ចំនួន ១,៩% ដែលវិទ្យាស្ថានស្ថិតិ និងសិក្សាសេដ្ឋកិច្ចជាតិហៅកាត់ថា Insee បានចុះផ្សាយជាផ្លូវការថ្ងៃនេះ គឺជាតួលេខមួយដូចដែល Insee និងធនាគារបារាំងបានរំពឹងទុកនាពេលថ្មីៗកន្លងទៅ។ តែ Insee បានទទួលស្គាល់ថា គឺសន្ទុះកំណើនសេដ្ឋកិច្ចនៅត្រីមាសទី៤ លើសពីការគិតទុកដែលបានអនុញ្ញាតឲ្យមានកំណើនសេដ្ឋកិច្ច ១,៩% សម្រាប់ឆ្នាំ ២០១៧។ នៅខាងរដ្ឋាភិបាលវិញ ច្បាប់ហិរញ្ញវត្ថុដែលទើបអនុម័តនាដំណាច់ឆ្នាំ ២០១៧ បានប្រមើលមើលកំណើនសេដ្ឋកិច្ចក្នុងកម្រិតតែ ១,៧% ប៉ុណ្ណោះសម្រាប់ឆ្នាំ ២០១៧។
តែនៅពេលនោះនាឱកាសជូនពរឆ្នាំថ្មីឆ្នាំសកល លោករដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ Bruno Le Maire ក៏បានប្រាប់ឲ្យដឹងផងដែរថា កំណើនសេដ្ឋកិច្ចអាចនឹងទទួលបានលើសពីការប្រមើលទុក។ តាម Insee កំណើនសេដ្ឋកិច្ចដែលទទួលបានសម្រាប់ឆ្នាំ ២០១៧ បានមកពីកំណើនវិនិយោគរបស់រោងចក្រសហគ្រាស និងពលរដ្ឋទូទៅ។ ក្នុងឆ្នាំ ២០១៧ វិនិយោគរបស់រោង ចក្រសហគ្រាសបានកើនឡើងចំនួន ៤,៣% ទល់នឹង ៣,៤% ក្នុងឆ្នាំ ២០១៦ រីឯវិនិយោគរបស់ពលរដ្ឋទូទៅវិញបានកើនឡើងចំនួន ៥,១% ក្នុងឆ្នាំ ២០១៧ទល់នឹង ២,៤% ក្នុងឆ្នាំ ២០១៦។
បន្ទាប់មក ការចំណាយទិញរបស់របរប្រើប្រាស់ និងសេវាផ្សេងៗបានកើនឡើងចំនួន ១,៣% ក្នុងឆ្នាំ ២០១៧។ កត្តាបន្ទាប់ទៀត គឺកំណើននៃការនាំទំនិញបារាំងចេញទៅបរទេសដែលកើន ៣,៥% ក្នុងឆ្នាំ ២០១៧ទល់នឹង ១,៩% ក្នុងឆ្នាំ ២០១៦។ ចំណែកការនាំចូលវិញក៏មានការកើនឡើងបន្តិចបន្តួច ពោលពី ៤,២% ក្នុងឆ្នាំ ២០១៦ ទៅ ៤,៣% ក្នុងឆ្នាំ ២០១៧។ Insee បានសន្និដ្ឋានជារួមថា កំណើនសេដ្ឋកិច្ចបារាំងមានភាពរឹងមាំ និងអាចប្រសើរថែមទៀតនៅឆ្នាំខាងមុខ បើអ្វីៗនឹងមានដំណើរការដូចឆ្នាំ ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ