អង់គ្លេសអាចនឹងកាត់ជំនួយដល់អង្គការOxfam ព្រោះរឿងអាស្រូវផ្លូវភេទ
រដ្ឋាភិបាលអង់គ្លេសនឹងទទួលជួបអ្នកទទួលខុសត្រូវអង្គការOxfam នៅថ្ងៃចន្ទទី ១២ កុម្ភៈនេះ ដើម្បីបំភ្លឺព័ត៌មានស្តីពីរឿងអាស្រូវផ្លូវភេទ ក្នុងរង្វង់អង្គការ។ តាំងពីពីរបីថ្ងៃមកនេះ មានការផ្សព្វផ្សាយព័ត៌មានអាស្រូវថា អ្នកទទួលខុសត្រូវអង្គការOxfam បានជួលស្ត្រីពេស្យាមកបំរើផ្លូវភេទ នៅក្នុងពេលអង្គការចេញធ្វើបេសកកម្មនៅប្រទេសហៃទី កាលពីឆ្នាំ ២០១១ ដើម្បីជួយប្រទេសពីគ្រោះមហន្តរាយរញ្ជួយដីឆ្នាំ២០១០។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
រដ្ឋលេខាធិការក្រសួងអភិវឌ្ឍន៍អន្តរជាតិ នឹងជួបអ្នកទទួលខុសត្រូវអង្គការOxfam នៅថ្ងៃចន្ទ ដើម្បីផ្តល់ឱកាសឱ្យអង្គការពន្យល់បំភ្លឺ ដោយផ្ទាល់មាត់ ទាក់ទងនឹងរឿងអាស្រូវផ្លូវភេទនោះ ថាពិតជាមានប៉ះពាល់ដល់បញ្ហាសីលធម៌មែនដែរឬអត់។ ប្រសិនបើតំណាងអង្គការមិនអាចបកស្រាយឱ្យអស់សាច់រឿងទេ នោះរដ្ឋាភិបាលអង់គ្លេស មិនអាចធ្វើការជាមួយអង្គការនេះបានទៀតឡើយ។ នេះជាប្រសាសន៍របស់លោកស្រីរដ្ឋលេខាធិការ ទៅកាន់អ្នកកាសែតទូរទស្សន៍BBC។
លោកស្រីបានបន្ទោសថា អង្គការបានធ្វើសេចក្តីសម្រេចមិនត្រឹមត្រូវ ដោយមិនបានបញ្ជូនព័ត៌មានលម្អិតទាក់ទងនឹងរឿងអាស្រូវចោទប្រកាន់លើបុគ្គលិករបស់អង្គការមកឱ្យអាជ្ញាធរ និងគណៈកម្មការ ជាអ្នកគ្រប់គ្រង់អង្គការបានដឹងរឿង និងអាចផ្តល់ដំណោះស្រាយផ្សេង មិនរាលដាលមកដល់ថ្ងៃនេះទេ។
Oxfam ជាសហព័ន្ធអង្គការមនុស្សធម៌ មានទីស្នាក់ការនៅប្រទេសអង់គ្លេស។ អង្គការទទួលជំនួយហិរញ្ញវត្ថុពីក្រសួងអភិវឌ្ឍន៍អន្តរជាតិអង់គ្លេស ប្រមាណជិត១០%នៃតម្រូវការសរុប។ កាលពីឆ្នាំ២០១១ ក្រោយពីមានផ្ទុះរឿងអាស្រូវផ្លូវភេទភ្លាម អង្គការបានបើកអង្កេតភ្លាម។ កាលណោះ បុគ្គលិករបស់អង្គការចំនួនបួននាក់ត្រូវបានបណ្តេញចេញ និងបីនាក់ផ្សេងទៀតបានលាលែងចេញពីតំណែង មុនការបិទបញ្ចប់អង្កេតទៅទៀត។
គណៈកម្មការរបស់អង្គការក៏បានទទួលរបាយការណ៍អង្កេតនោះ ដែលលើកឡើងតែអំពីឥរិយាបថផ្លូវភេទមិនសមស្រប ការបំភិតបំភ័យ ការបំពារបំពាន របស់បុគ្គលិកអង្គការ តែគ្មានសរសេរសោះអំពីសកម្មភាពរំលោភបំពានផ្លូវភេទលើអ្នកទទួលជំនួយពីអង្គការ ឬអំពីសក្តានុពលនៃឧក្រិដ្ឋកម្មផ្លូវភេទ លើកុមារ។
សូមបញ្ជាក់ថា រឿងអាស្រូវផ្លូវភេទនេះបានផ្ទុះឡើងជាថ្មី បន្ទាប់ពីសារព័ត៌មានTimesបានចេញផ្សាយសេចក្តីអង្កេតរបស់ខ្លួន កាលពីថ្ងៃសុក្រ ថាអង្គការOxfam បានជួលក្មេងពេស្យាមួយក្រុមមកបំរើដល់ផ្ទះ និងសណ្ឋាគារ។ ប្រភពអង្កេតមានទាំងរូបភាពវីដេអូស្រីបពេស្យាទាំងនោះពាក់អាវយឺតផ្លាកអង្គការOxfamទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ