លោកពូទីន ត្រៀមទៅក្រុងវ៉ាស៊ីនតោន ហើយបានអញ្ជើញ លោកត្រាំ មកម៉ូស្គូ
ថ្ងៃសុក្រ ២៧ កក្កដា លោកប្រធានាធិបតីរុស្ស៊ី វ៉ា្លឌីមៀរ ពូទីន បានថ្លែងថា លោក "ត្រៀមទៅ កាន់ក្រុងវ៉ាស៊ីនតោន” ដើម្បីជួបលោក ដូណាល់ ត្រាំ និង ថែមទាំងបានអះអាងថា គាត់បានអញ្ជើញ លោក ប្រធានាធិបតីអាមេរិកាំង ឲ្យមកធ្វើទស្សនកិច្ចនៅម៉ូស្គូវិញ។ សេចក្តីថ្លែងការណ៍នេះ បន្លឺឡើង ក្រោយពីមាន ប្រព្រឹត្តទៅ ជំនួបកំពូលរុស្ស៊ី-អាមេរិក ជាលើកដំបូង នៅឯរដ្ឋធានីហ្វាំងឡង់ ១២ ថ្ងៃមុន ដែលបន្ទាប់មក បានបង្កជា រលកទិតៀន នៅសរអា។
ចុះផ្សាយនៅថ្ងៃ៖
“យើងត្រៀមអញ្ជើញលោកប្រធានាធិបតីត្រាំ មកធ្វើទស្សនកិច្ចនៅម៉ូស្គូ គាត់មានសេចក្តីអញ្ជើញ នេះ ខ្ញុំបានជម្រាបគាត់អំពីរឿងនេះ។ ខ្ញុំផ្ទាល់ ត្រៀមទៅកាន់ក្រុងវ៉ាស៊ីនតោន” - លោកពូទីន បានថ្លែង ថ្ងៃសុក្រ ២៧ កក្កដា ក្នុងសន្និសីទកាសែតនៅក្រុង Johannesbourg ឧទ្ទិសដល់ការបិទបញ្ចប់ កិច្ចប្រជុំ កំពូល នៃក្រុម ៥ ប្រទេស BRICS ដែលក្នុងនោះមាន ប្រេស៊ីល រុស្ស៊ី ឥណ្ឌា ចិន អាហ្វ្រិកខាងត្បូង។
“ប៉ុន្តែ ខ្ញុំបានគូសបញ្ជាក់ទៅលោកត្រាំជាថ្មីថា ខ្ញុំសុខចិត្តទៅក្រុងវ៉ាស៊ីនតោន លុះណាតែនៅទីនោះ មាន បង្កើតបានលក្ខណៈសមស្រប សម្រាប់ធ្វើការងារ“ - លោកពូទីន បានក្រើនរំលឹក។
មេដឹកនាំរុស្ស៊ី កត់សម្គាល់តមកទៀត ៖ ជំនួបកន្លងទៅជាមួយលោកត្រាំ សុទ្ធតែ”មានប្រយោជន៍”។ ការ ទាក់ទងគ្នា ក្នុងកម្រិតនយោបាយខ្ពស់បំផុត គឺជារឿងចាំបាច់។ ម្យ៉ាងទៀត រដ្ឋបុរសទាំងពីរ “ មិនអាច ពិភាក្សាគ្នា តាមទូរសព្ទ ឲ្យបានសព្វគ្រប់ឡើយ។
កាលពីថ្ងៃពុធ សេតវិមាន បានប្រកាសថា ៖ ជំនួបរវាងលោកត្រាំនិងលោកពូទីន ដែលនៅដើមឡើយ គ្រោងប្រព្រឹត្តទៅ នៅក្រុងវ៉ាស៊ីនតោន ក្នុង ត្រីមាសទី៤ ឆ្នាំនេះ នឹងត្រូវលើកទៅ”ឆ្នាំក្រោយ”ឯណោះ។
មូលហេតុមកពី ការអង្កេតអំពីរឿងដែលថា “រុស្ស៊ី បានលូកដៃចូលក្នុងការបោះឆ្នោតប្រធានាធិបតីនៅសរអា ឆ្នាំ ២០១៦ នៅមិនទាន់ចប់នៅឡើយ -ការអង្កេតដែលត្រូវលោកត្រាំ ហៅថាជា ប្រតិបត្តិការ” ប្រមាញ់អ្នក មានគំនិតផ្សេង” ដើម្បីអុកឡុក កុំឲ្យគាត់រៀបរយទំនាក់ទំនងបានស្រួលបួល ជាមួយរុស្ស៊ី។
លោកពូទីន ក្នុងសន្និសីទកាសែតនោះ ក៏បានបង្ហើបឲ្យដឹងថា គាត់អាចជួបលោកត្រាំ ក្នុងបរិវេណ នៃ វេទិកាអន្តរជាតិ បែបយ៉ាងជំនួបកំពូល APEC ក្នុងខែវិច្ឆិកា រួចមក ក្នុងជំនួបកំពូល G-20 នៅ អាហ្សង់ទីន។
ប្រមុខរដ្ឋរុស្ស៊ី ក៏បានស្ងើចសរសើរ សមភាគីអាមេរិកាំងរបស់គាត់ គឺលោក ត្រាំ ដែលក្រោយពីជាប់ឆ្នោតជា ប្រធានាធិបតី តែងខិតខំបំពេញពាក្យសន្យារបស់ខ្លួន នៅពីមុខអ្នកស្រុកម្ចាស់ឆ្នោតអាមេរិកាំង ខុសពីអ្នកខ្លះ ដែលក្រោយពីឈ្នះឆ្នោត គឺភ្លេចបាត់ពាក្យសន្យា ក្នុងសម័យឃោសនាបោះឆ្នោត។
អំពីរលកបោកកញ្ជោ្រកក្នុងក្រុងវ៉ាស៊ីនតោន ដែលទិតៀន លោកត្រាំគ្មានប្រណី ថាគាត់ហាកបី ចង់ ស្រុះ ស្រួល ជាមួយរុស្ស៊ី ក្រោយពីមានប្រព្រឹត្តទៅជំនួបកំពូលរុស្ស៊ី-អាមេរិក នៅឯរដ្ឋធានីហ្វាំងឡង់ កាលពីថ្ងៃ ១៦ កក្កដា លោកពូទីន ដោយថ្លែងម្សិលមិញ ក្នុងសន្និសីទសារពត៏មាននៅក្រុង Johannesbourg បាន ប្រកាសថា ៖ រលកនោះ គឺសឲ្យឃើញពី ការលំបាកដែលកើតមានក្នុងជីវភាពនយោបាយផ្ទៃក្នុង សរអា ទេតើ ចំណែកជីវិតចេះតែមានដំណើរទៅមុខ ហើយ ជំនួបយើង នឹងបន្តប្រព្រឹត្តទៅ តទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ