ក្រុងឡុងដ៍ ចេញដីកាចាប់ខ្លួន ពលរដ្ឋរុស្ស៊ីពីរនាក់ ក្នុងរឿងបំពុលដោយប្រើសារធាតុគីមី
ថ្ងៃពុធទី ៥ កញ្ញា ប៉ូលីសអង់គ្លេស បានប្រកាសចេញដីកាពីរ ដើម្បីចាប់ខ្លួនបុរសរុស្ស៊ីពីរនាក់ គឺ ឈ្មោះ Alexander Petrov និង Ruslan Bochirov ក្នុងរឿងបំពុលអតីតភ្នាក់ងារចារកិច្ចរុស្ស៊ី លោក Serguei Skripal និងកូនស្រីគាត់ អ្នកស្រី Youlia ដោយប្រើសារធាតុគីមី Novitchok ដែលអង់គ្លេស ចាត់ទុកថា មានប្រភពទៅពីរុស្ស៊ី- ការបំពុលនេះ បានប្រព្រឹត្តទៅ នៅក្នុងប្រទេសអង់គ្លេសផ្ទាល់ កាលពីខែមីនា។
ចុះផ្សាយនៅថ្ងៃ៖
ឈ្មោះបុរសរុស្ស៊ីពីរនោះ ត្រូវសន្មត់ថាជា រហ័សនាមទេតើ- សេចក្តីនេះថ្លែងដោយ នាយកអង្គភាព អង់គ្លេសខាងប្រឆាំងភេរវកម្ម លោក Neil Basu នៅពីមុខពួកអ្នកកាសែត ទាំងកត់សម្គាល់ថា អ្នកទាំងពីរ តាមមើលទៅ បានធ្វើដំណើរក្រោមឈ្មោះក្លែងសោះ ហើយលិខិតឆ្លងដែនដែលគេប្រើ គឺត្រូវបានចេញ ដោយប្រទេសរុស្ស៊ី។ ទាំងបង្ហាញរូបថតបុរស Alexander Petrov និង Ruslan Bochirov លោក Neil Basu អំពាវនាវសាធារណជនក្នុងលោក ឲ្យជួយកំណត់អត្តសញ្ញាណជាតិរុស្ស៊ីពីរនាក់នោះ។
ក្នុងសេចក្តីថ្លែងការណ៍ខ្លួន មហាអយ្យកាអង់គ្លេស បានលំអិតអំពី ការចោទប្រកាន់បី ទល់នឹងបុរសរុស្ស៊ី ពីរនាក់នោះ គឺ ៖ ទី១-ឃុបឃិតគ្នាដើម្បីប្រព្រឹត្តឃាតកម្មដោយចេតនា ទី២-ប៉ុនប៉ងសម្លាប់លោក Skripal និងកូនស្រីគាត់ ព្រមទាំងប៉ូលិសម្នាក់ ដែលឆ្លងដោយធាតុពុលនោះ នៅពេលជួយសង្គ្រោះអ្នករងគ្រោះជា ឪពុកនិងកូននោះ កាលពីដើម ខែ មីនា នៅទីក្រុង Salisbury ប៉ែកនិរតីអង់គ្លេស ទី៣ -គេយកតាមខ្លួន ហើយប្រើវាតែម្តង គឺ សារធាតុពុល Novitchok ដែលមានប្រសិទ្ធិភាពខ្លាំង ខាងធ្វើឲ្យពិការ ដល់សរសៃប្រសាទ។
នាយកអង្គភាព អង់គ្លេសខាងប្រឆាំងភេរវកម្ម លោក Neil Basu បានលំអិតថា ៖ ពលរដ្ឋរុស្ស៊ីពីរនាក់ ដែលជាប់សង្ស័យនោះ “បានទៅដល់ក្រុងឡុងដ៍ នាថ្ងៃទី ២ មីនា នៅអាកាសយានដ្ឋាន Gatwick តាម ជើងយន្ដហោះ រុស្ស៊ី SU2588 ។ គេបានស្នាក់នៅក្នុងសណ្ឋាគារ មុននឹងបន្តដំណើរទៅកាន់ក្រុង Salisbury នៅថ្ងៃ ៣ មីនា ដើម្បី “ស្គាល់ទឹកដីអង់គ្លេស”។ ហើយតាមយោបល់យើង នៅថ្ងៃ ៤ មីនា គេបានរាយធាតុពុល Novitchok នៅនឹងមាត់ទ្វារលំនៅដ្ឋាន លោក Serguei Skripal មុននឹងចាកចេញ ពីប្រទេសអង់គ្លេសទៅវិញ នៅថ្ងៃនោះឯង តាមអាកាសយានដ្ឋាន Heathrow ក្រុងឡុងដ៍។
ក្រោយឮ ពីក្រុងឡុងដ៍ ដំណឹងស្តីអំពី ដីកាចាប់ខ្លួនពលរដ្ឋរុស្ស៊ីពីរនាក់នោះ អ្នកនាំពាក្យក្រសួងការបរទេស រុស្ស៊ីលោកស្រី Maria Zakharova បានប្រតិកម្មថា ប្រទេសរុស្ស៊ីមិនដឹងទេ តើបុរសទាំងពីរនោះ ជានរណា។ តាមសំដីគាត់ ៖ ទាំងឈ្មោះ ទាំងរូបថត របស់អ្នកទាំងពីរ ដែលផ្សព្វផ្សាយជាសាធារណៈ ដោយមធ្យោបាយឃោសនាមហាជន ឥតដំណាលប្រាប់យើងអំពីរឿងអ្វី សោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ